ខ្សែបម្រើ Cesc Fabregas របស់ក្រុម Monaco បានធ្វើការបញ្ជាក់ដោយខ្លួនឯងថា យាយទួតរបស់ខ្លួនមានវ័យ៩៥ឆ្នាំ ដែលរស់នៅប្រទេសអេស្ប៉ាញ បានជាសះស្បើយពីជំងឺរលាកផ្លូវដង្ហើមដែលបណ្តាលមកពីវីរុសកូវីដ១៩ហើយ ។
អតីតកីឡាករក្រុម Arsenal, Chelsea និង Barcelona រូបនេះ បានបញ្ជាក់ដំណឹងខាងលើនេះតាមរយៈគណនី Twitter របស់ខ្លួនកាលពីថ្ងៃ ពុធ ដោយបានសរសេរថា៖ «គាត់បានយកឈ្នះលើវីរុសនេះនៅអាយុ ៩៥ ឆ្នាំ ។ កាលពីម្សិលមិញការធ្វើតេស្តបានបង្ហាញថា អវិជ្ជមាន!» ។
កីឡាកររូបនេះបានបន្តថា «យាយទួតរបស់ខ្ញុំគឺជាវីរនារីដ៏អស្ចារ្យម្នាក់ ប៉ុន្តែគ្មាននរណាម្នាក់អាចធ្វើបានដោយគ្មានជំនួយពីគិលានុបដ្ឋាយិកា និងគ្រូពេទ្យទាំងអស់ដែលកំពុងដាក់ជីវិតរបស់ពួកគេអំឡុងពេលនេះ ដើម្បីឲ្យយើងទាំងអស់គ្នាមានភាពប្រសើរឡើង និងរស់នៅបានប្រសើរជាងនេះបន្តិច ក្នុងគ្រាដ៏លំបាកនេះ» ។
កីឡាករវ័យ ៣២ឆ្នាំរូបនេះក៏ត្រូវបានគេរាយការណ៍ថា បានយល់ព្រមសំណើកាត់ប្រាក់ខែរបស់ខ្លួននៅក្រុម Monaco រហូតដល់ខែ កក្កដា ដើម្បីជួយក្លិបទប់ទល់នឹងផលប៉ះពាល់ខាងសេដ្ឋកិច្ចដោយសារវីរុសកូវីដ១៩ ។
សូមរំលឹកជូនថា កាលពីថ្ងៃអង្គារកន្លងទៅថ្មីៗនេះ លោកនាយករដ្ឋមន្ត្រីបារាំង Edouard Philippe បានធ្វើការប្រកាសថា ព្រឹត្តិការណ៍កីឡាទាំងអស់ នឹងមិនអាចចាប់ផ្តើមវិញនៅមុនខែកញ្ញាបានឡើយ ដែលបានធ្វើឲ្យក្របខ័ណ្ឌ Ligue 1, 2 រដូវកាលនេះ សម្រេចរំសាយចោល ៕ (ដកស្រង់ចេញពី ESPN)
ចែករំលែកព័តមាននេះ