ខេត្តក្រចេះ ៖ អភិបាលខេត្តក្រចេះ លោក វ៉ា ថន បានមានប្រសាសន៍ព្រមាន និងចាត់វិធានការចំពោះអាជ្ញាធរស្រុក-ក្រុងទូទាំងខេត្ត ដែលមិនធ្វើការបង្ក្រាបបទល្មើសព្រៃឈើ និងក្រុមអ្នកសារព័ត៌មានមួយចំនួនធំសព្វថ្ងៃកំពុងមានសកម្មភាពបោះទីតាំងឈរជើង បង្កភាពអនាធិបតេយ្យ ក្នុងដែនសមត្ថកិច្ចរបស់ខ្លួនទេនោះ។
ការថ្លែងដោយសង្កត់ធ្ងន់របស់គណៈអភិបាលខេត្តក្រចេះ លោក វ៉ា ថន គឺបាន ធ្វើឡើងក្នុងកិច្ចប្រជុំបូកសរុបលទ្ធផលការងារលើគ្រប់វិស័យប្រចាំខែ មេសា នៅព្រឹកថ្ងៃទី៣០ មេសា នៅសាលប្រជុំសាលាខេត្តក្រចេះ ដោយមានការអញ្ជើញចូលរួមពីលោក លោកស្រី អភិបាលខេត្ត ស្រុក ក្រុង មេបញ្ជាការកងកម្លាំងប្រដាប់អាវុធទាំង៣ប្រភេទ និងលោក លោក ស្រីប្រធានអនុប្រធានមន្ទីរជុំវិញខេត្ត។
អភិបាលខេត្តក្រចេះ លោក វ៉ា ថន ប្រធានអង្គប្រជុំ បានចាត់ឲ្យអាជ្ញាធរស្រុក សហការជាមួយរដ្ឋបាលព្រៃឈើ ត្រូវធ្វើបោសសម្អាតក្រុមឈ្មួញដឹកឈើ និងដឹកអនុផលព្រៃឈើគ្រប់ទ្រង់ទ្រាយ ដែលឈ្មួញបាននិងកំពុងតែដឹកជញ្ជូនខុសច្បាប់ តាមគ្រប់មធ្យោបាយនិងរូបភាព ។ បន្ថែមពីលើនេះ លោកអភិបាលខេត្ត ក៏ព្រមានទៅលើក្រុមអ្នកការសែតមួយចំនួនដែល យករូបលោកទៅបង្ហោះចោទប្រកាន់ពាក់ព័ន្ធបទល្មើសព្រៃឈើទាំងអស់នោះផងដែរ ។
បើតាមសេចក្តីរាយការណ៍បានឲ្យដឹងថា សព្វថ្ងៃបទល្មើសព្រៃឈើនៅតែបន្តកើតមាន ការដឹកជញ្ជូនខុសច្បាប់ជាហូរហែរនៅតាមស្រុកមួយចំនួនដូចជា ស្រុកសំបូរ ស្រុកព្រែក ប្រសព្វ និងនៅស្រុកឆ្លូង។ ហើយឈើទាំងអស់នោះភាគច្រើនមានប្រភពដឹកចេញខុសច្បាប់ ពីតំបន់ព្រៃឡង់ ដែលជាព្រៃគ្រប់គ្រប់ដោយមន្ទីរបរិស្ថានខេត្ត។
ទន្ទឹមនិងបទល្មើសការដឹកជញ្ជូនឈើនៅតែកើតមាន ចំនួនអ្នកកាសែតក៏មានតួលេខកាន់តែច្រើនដូចគ្នា។
សេចក្តីរាយការណ៍បានឲ្យដឹងទៀតថា អ្នកកាន់កាតកាសែតមិនតិចជាង៥០០នាក់ សព្វថ្ងៃបាននិងកំពុងតែបោះទីតាំងឈរជើងដេកសំកុកយ៉ាងអនាធិបតេយ្យចាំស្ទាក់ និងប្រដេញយកលុយពឈ្មួញដឹកឈើ នៅតាមស្រុកគោលដៅ ដែលកំពុងតែមានសកម្មភាពចរាចរណ៍ឈើទាំងអស់នោះ។
កន្លងមក សកម្មភាពការសំកុកប្រដេញកាក់យកលុយពីអ្នកដឹកឈើតាមម៉ូតូ រ៉ឺម៉ក និងគោយន្ត ពីក្រុមអ្នកកាសែត មានចំនួនជាច្រើនរយនាក់ទាំងនោះ បានបង្កការប៉ះពាល់ដល់ ការស់នៅរបស់ពលរដ្ឋក្នុងមូលដ្ឋានជាហូរហែ ។
តាមរយៈការធ្វើវេទិការសាធារណៈ ពលរដ្ឋនៅមូលដ្ឋានាទាំងនោះ បានអំបាវនាវឲ្យអាជ្ញាធរមានវិធានការលើក្រុមកុងត្រូលជជុះពីអ្នកកាន់កាតកាសែតទាំងអស់នោះ តែអាជ្ញាធរនៅមិនទាន់មានសកម្មភាពឆ្លើយតបនៅឡើយទេ៕
ចែករំលែកព័តមាននេះ