ប្រទេសអេស្ប៉ាញ ៖ លោកនាយករដ្ឋមន្ត្រី Pedro Sanchez បាននិយាយកាលពីថ្ងៃអង្គារថា កីឡាករបាល់ទាត់អាជីពរបស់ប្រទេសអេស្ប៉ាញអាចចាប់ផ្តើមការហ្វឹកហាត់ឡើងវិញចាប់ពីសប្តាហ៍ក្រោយ ខណៈលោកបានប្រកាសពីផែនការបន្ធូរបន្ថយលើវិធានការខ្លះៗទាក់ទងទៅនឹងវីរុសកូវីដ១៩ និងនាំប្រទេសនេះត្រឡប់ទៅរកភាពប្រក្រតីវិញនៅចុងខែ មិថុនា។
កីឡាករអាចចាប់ផ្តើមការហ្វឹកហាត់ជាលក្ខណៈបុគ្គល (Individual) ចាប់ពីថ្ងៃច័ន្ទ និងអាចហ្វឹកហាត់ជាមួយគ្នាជាក្រុមតូចៗមួយសប្តាហ៍បន្ទាប់ ។
លោក Pedro Sanchez បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃអង្គារថា «កីឡាករបាល់ទាត់អាជីពអាចហ្វឹកហាត់រៀងៗខ្លួនចាប់ពីថ្ងៃទី ៤ ខែ ឧសភាក្នុងដំណាក់កាលទី១ ។ ហើយនៅដំណាក់កាលបន្ទាប់ដែលចាប់ផ្តើមនៅថ្ងៃទី ១១ ខែ ឧសភា ពួកគេអាចធ្វើការហ្វឹកហាត់ជាក្រុមតូចៗ បើទោះបីជាមានការរឹតត្បិតផ្នែកសុវត្ថិភាពសង្គមខុសគ្នាពីខេត្តមួយទៅខេត្តក៏ដោយ» ។
ក្រសួងសុខាភិបាលនឹងវាយតំលៃស្ថានភាពនេះរៀងរាល់ ២សប្តាហ៍ម្តង ដើម្បីកំណត់ថា តើពេលណាដែលអាចអនុញ្ញាតឲ្យមានការហ្វឹកហាត់ជាក្រុមធំ បន្ទាប់មកនឹងសិក្សាពីលទ្ធភាពនៃការចាប់ផ្តើមការប្រកួតប្រជែងឡើងវិញ ។
លោក Pedro Sanchez បានបន្ថែមថា ការបើកឲ្យមានការហ្វឹកហាត់ឡើងវិញ នឹងត្រូវអនុវត្តជាមួយវិធានការអនាម័យ និងការការពារផ្សេងៗទៀតឲ្យកាន់តែប្រសិទ្ធភាពខ្ពស់ ។
ជម្រាបជូនថា ប្រទេសអេស្ប៉ាញជាប្រទេសមានករណីឆ្លងវីរុសកូវីដ១៩ ខ្ពស់ជាងគេលំដាប់ទី ២ បន្ទាប់ពីសហរដ្ឋអាមេរិក។ ករណីឆ្លងក្នុងប្រទេសនេះបានកើនឡើងដល់ជាង ២៣២,០០០ ករណីជាមួយនឹងការស្លាប់ចាប់តាំងពីការផ្ទុះឡើងមកដល់ពេលនេះមានចំនួនសរុប ២៣.៨២២ នាក់។
ប៉ុន្តែចំនួនអ្នកស្លាប់កាលពីថ្ងៃច័ន្ទចំនួន ៣០១ នាក់គឺជាតួលេខធ្លាក់ចុះទី៣ ពីចំនួនខ្ពស់បំផុតគឺ ៩៥០ក្នុងមួយថ្ងៃកាលពីដើមខែមេសា ៕ (ដកស្រង់ចេញពី Reuters)
ចែករំលែកព័តមាននេះ