សូមមេត្តាជាពាក្យសុជីវធម៌ក្នុងជីវិតរស់នៅ មេត្តានេះមាននៅក្នុងសន្ដាននៃបុគ្គលណា នឹងធ្វើឲ្យបុគ្គលនោះចេះចែករំលែកនូវសេចក្ដីសុខដល់ជនទាំងពួងទាំងឡាយ ចេះមានសុជីវធម៌ក្នុងការរស់នៅ ។ តទៅនេះជាពាក្យសូមមេត្តា ៖
សូមមេត្តាកុំធ្វើជាមនុស្សចេះតែរករឿងគេច្រើនពេក, សូមមេត្តា កុំគិតថាមានតែខ្លួនទេដែលចេះដឹងនោះ, សូមមេត្តា កុំធ្វើជាមនុស្សចង់តែឈ្នះគេឲ្យសោះ, សូមមេត្តា លះបង់នូវអំនួតរបស់ខ្លួនចេញផង, សូមមេត្តា គោរពគ្នាទៅវិញទៅមកផង, សូមមេត្តា កុំបង្ខំគេធ្វើឲ្យគេកើតទុក្ខ, សូមមេត្តា កុំជជែកគ្នាច្រើនពេក នាំឱ្យរំខានគេ, សូមមេត្តា ដឹងគុណចំពោះអ្នកមានគុណផង, សូមមេត្តា កុំធ្វើឲ្យអ្នកមានគុណកើតទុក្ខ ។
សូមមេត្តា កុំចេះតែតិះដៀលមនុស្សល្អ, សូមមេត្តា កុំច្រណែនគេ ព្រោះវាគ្មានប្រយោជន៍, សូមមេត្តា ចេះមើលកំហុសរបស់ខ្លួនឯងផង, សូមមេត្តា គិតឃើញអំពើល្អរបស់អ្នកដទៃផង, សូមមេត្តា ចេះដាក់បាត្រព្រះសង្ឃនៅមុខផ្ទះនៃខ្លួនផង,សូមមេត្តា កុំសម្លាប់សត្វព្រោះនាំឲ្យខ្លួនមានអាយុខ្លី, សូមមេត្តា កុំលួចទ្រព្យគេព្រោះនាំឲ្យខ្លួនក្រីក្រជាដើម, សូមមេត្តាកុំប្រព្រឹត្តខុសក្នុងកាមព្រោះនាំឲ្យខ្លួនមានឈ្មោះមិនល្អ មិនមានសេចក្ដីសុខក្នុងគ្រួសារ, សូមមេត្តា កុំនិយាយកុហកគេ នាំឲ្យគេស្អប់ ។
សូមមេត្តា កុំផឹកទឹកស្រវឹងពីព្រោះនាំឲ្យខ្លួនវង្វេងអស់ស្មារតី, សូមមេត្តា កុំសេពគ្រឿងញៀនព្រោះវានាំឲ្យខូចខ្លួន, សូមមេត្តា កុំលេងល្បែងភ្នាល់ព្រោះនាំឲ្យខ្លួនក្ដៅក្រហាយ, សូមមេត្តា កុំសេពគប់មិត្តអាក្រក់វានាំឲ្យខ្លួនអាក្រក់ដែរ, សូមមេត្តា កុំដើរលេងយប់ជ្រៅពេក ព្រោះនាំឲ្យគេចោទប្រកាន់ក្នុងរឿងមិនល្អ, សូមមេត្តា កុំខ្ចីប្រាក់គេច្រើនពេក ព្រោះនាំឲ្យខ្លួនកើតទុក្ខ, សូមមេត្តា ចេះគោរពពាក្យសន្យារបស់ខ្លួនផង, សូមមេត្តា កុំស្រឡាញ់លុយ ជាងស្រឡាញ់ញាតិមិត្ត, សូមមេត្តា កុំស្រឡាញ់លុយ ជាងស្រឡាញ់សេចក្ដីល្អ, សូមមេត្តា ចេះធ្វើបុណ្យឧទ្ទិសកុសលដល់បុព្វការីជនផង…។ សាន សារិន
ចែករំលែកព័តមាននេះ