ប្រធានផ្នែកវេជ្ជសាស្ត្ររបស់ FIFA លោក Michel D’Hooghe ថ្លែងថា មិនគួរឱ្យមានការប្រកួតបាល់ទាត់ឡើងវិញនោះទេ រហូតដល់ការចាប់ផ្តើមនៃរដូវកាលក្រោយ ដោយមានការព្រួយបារម្ភអំពីការវាយប្រហារជាលើកទី២ នៃវីរុសកូវីដ១៩…
ប្រធានផ្នែកវេជ្ជសាស្ត្ររបស់ FIFA លោក Michel D’Hooghe ថ្លែងថា មិនគួរឱ្យមានការប្រកួតបាល់ទាត់ឡើងវិញនោះទេ រហូតដល់ការចាប់ផ្តើមនៃរដូវកាលក្រោយ ដោយមានការព្រួយបារម្ភអំពីការវាយប្រហារជាលើកទី២ នៃវីរុសកូវីដ១៩ ។
យុទ្ធនាការ Ligue 1, 2 រដូវកាលនេះត្រូវបានបញ្ជាក់ថា រំសាយចោលទាំងស្រុងកាលពីថ្ងៃអង្គារម្សិលមិញ នៅពេលដែលនាយករដ្ឋមន្ត្រីបារាំងលោក Edouard Philippe បានប្រកាសថា បាល់ទាត់អាជីពនឹងមិនអាចចាប់ផ្តើមឡើងវិញនៅមុនខែកញ្ញានោះទេ ។
ស្របពេលដែលលីគកំពូលហូឡង់ Eredivisie ក៏ត្រូវបានលុបចោលផងដែរ រួមជាមួយរដូវកាលលីគក្នុងស្រុកនៅប្រទេសអាហ្សង់ទីន ប៉ុន្តែប្រទេសមួយចំនួនគ្រោងនឹងចាប់ផ្តើមដំណើរការលីគក្នុងស្រុកជាថ្មីម្តងទៀត ជាក់ស្តែងដូចជាប្រទេសអង់គ្លេស អេស្ប៉ាញ អាល្លឺម៉ង់ និងអុីតាលី ។
លោក Michel D’Hooghe មានការព្រួយបារម្ភថា ហិរញ្ញវត្ថុកំពុងត្រូវបានគេយកចិត្តទុកដាក់ខ្ពស់ជាងបញ្ហាសុខភាពសាធារណៈ ។
លោកបានប្រាប់ទៅកាន់សារព័ត៌មាន Telegraph ថា «យើងទាំងអស់គ្នាត្រូវធ្វើការសម្រេចចិត្តជាថ្នាក់ជាតិពីអាជ្ញាធរសាធារណៈ ។ វាសាមញ្ញណាស់ ។ បាល់ទាត់វាមិនសំខាន់ជាងអាយុជីវិតមនុស្សនោះទេ»។
«ប្រសិនបើពួកគេអាចចាប់ផ្តើមរដូវកាល ២០២០-២១ នៅចុងខែសីហា ឬដើមខែកញ្ញា ខ្ញុំពិតជាសប្បាយចិត្តណាស់។ នោះពួកគេនឹងអាចជៀសផុតពីការវាយប្រហារលើកទី ២ ពីវីរុសកូវីដ១៩ ។
លោកបានបន្តទៀតថា «ខ្ញុំបានដឹងថានៅប្រទេសជាច្រើន កំពុងគិតអំពីការលេងបាល់ទាត់ម្តងទៀតដោយមាន ឬគ្មានអ្នកទស្សនាផ្ទាល់» ។ ខ្ញុំបានយល់ និងបានឃើញពីស្ថានភាពជាច្រើននាពេលបច្ចុប្បន្នរវាងសេដ្ឋកិច្ច និងសុខភាព ។ ក្នុងកាលៈទេសៈបែបនេះផ្នែកវេជ្ជសាស្ត្រ គួរតែឈ្នះលើផ្នែកសេដ្ឋកិច្ច ពីព្រោះឥឡូវនេះវាមិនមែនជាបញ្ហារឿងលុយនោះទេ ប៉ុន្តែវាជាបញ្ហានៃជីវិតនិងការស្លាប់» ៕
ចែករំលែកព័តមាននេះ