ប្រទេសថៃ ៖ រូបភាពក្រុមបុរសសាច់ដុំឈរលក់ទុរេនជាច្រើនសន្លឹកដែលត្រូវបានគេបង្ហោះចូលទៅក្នុងបណ្ដាញសង្គមហ្វេសប៊ុកក្នុងរយៈពេលប៉ុន្មានថ្ងៃកន្លងទៅនេះ ទទួលបានការចាប់អារម្មណ៍យ៉ាងខ្លាំងពីសំណាក់អ្នកប្រើប្រាស់បណ្ដាញសង្គមដ៏មានឥទ្ធិពលមួយនេះជាពិសេស
គឺនារីៗតែម្តង។
ក្រោយប្រទះឃើញរូបភាពទាំងនេះរួច មានអ្នកប្រើប្រាស់បណ្ដាញសង្គមជាច្រើនចង់ដឹងថា តើក្រុមបុរសសាច់ដុំទាំងនោះគឺជាអ្នកណា ? នៅទីណា? ហើយសកម្មភាពលក់ទុរេននោះគឺជាការពិតឬសម្តែង?
យោងតាមសារព័ត៌មាន channelnewsasia បានឲ្យដឹងថា សកម្មភាពលក់ទុរេនរបស់ក្រុមបុរសសាច់ដុំទាំងនោះគឺជារឿងពិតដែលបានកើតឡើងនៅក្លិបហាត់ប្រាណមួយកន្លែងក្នុងខេត្តឈៀងមៃ ប្រទេសថៃ ។
ប្រភពខាងលើបានបញ្ជាក់ថា ក្រោយក្លិបហាត់ប្រាណត្រូវបានបិទទ្វារដើម្បីទប់ស្កាត់ការរាតត្បាតនៃជំងឺCOVID-19នោះ ម្ចាស់ក្លិបក៏បានសម្រេចបន្ថែមអាជីវកម្មថ្មីមួយគឺលក់ទុរេន ហើយក្រុមបុរសសាច់ដុំទាំងនោះគឺសុទ្ធតែជាគ្រូបង្វឹកផ្នែកហាត់ប្រាណយកសាច់ដុំប្រចាំនៅក្នុងក្លិបហាត់ប្រាណផងដែរ។
បើតាមម្ចាស់ក្លិបហាត់ប្រាណខាងលើនេះបានឲ្យដឹងថា អាជីវកម្មលក់ទុរេននេះគឺផ្តល់គុណសម្បត្តិចំនួន២ដល់ក្លិបរបស់គាត់គឺ ទី១ ជួយរកប្រាក់មកជួយទ្រទ្រង់ក្លិបក្នុងអំឡុងពេលក្លិបត្រូវបិទទ្វារមួយរយៈ និងទី២ ជួយផ្តល់ចំណូលដល់ក្រុមគ្រូបង្វឹកដែលបានខកខានមិនបានចំណូលពីការបង្ហាត់ប្រាណ ។
អាជីវកម្មលក់ទុរេន ដែលមានសុទ្ធតែបុរសៗសាច់ដុំធំៗឈរចាំជួយរើស និងចាំជួយបកទុរេននោះទទួលបានការចាប់អារម្មណ៍យ៉ាងខ្លាំងពីសំណាក់អតិថិជនជាពិសេសស្រីៗតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ