ប្រទេសថៃ ៖ គណៈរដ្ឋមន្ត្រីថៃនៅថ្ងៃអង្គារ៍នេះ បានសម្រេចបន្តដាក់ប្រទេសក្នុងគ្រាអាសន្នជាផ្លូវការ ដើម្បីគ្រប់គ្រងជំងឺកូវីដ១៩ សម្រាប់មួយខែទៀតដល់ថ្ងៃទី៣១ ខែឧសភា និងបន្តរក្សាបំរាមគោចរ និងដាក់គោលការណ៍ណែនាំសម្រាប់បន្ធូរបន្ថយការបិទអាជីវកម្ម។
អ្នកនាំពាក្យរដ្ឋាភិបាល លោក Narumon Pinyosinwat បាននិយាយថា គណៈរដ្ឋមន្ត្រីបានយល់ស្របនឹងសំណើររបស់ក្រុមប្រឹក្សាសន្តិសុខជាតិថា ស្ថានភាពនៃភាពអាសន្នត្រូវបន្តចាប់ពីថ្ងៃទី១ ដល់ថ្ងៃទី៣១ ខែឧសភា។
គណៈរដ្ឋមន្ត្រីក៏បានប្តេជ្ញាចិត្តក្នុងការថែរក្សានូវវិធានការត្រួតពិនិត្យជំងឺកូវីដ។ ចរាចរណ៍ចូលតាមផ្លូវគោកទឹក និងខ្យល់ នឹងនៅមានការរឹតបន្តឹងនៅឡើយ។ ជើងហោះហើរក្នុងស្រុកនឹងត្រូវហាមឃាត់ក្នុងរយៈពេលមួយខែទៀត ចាប់ពីថ្ងៃទី១ ដល់ ថ្ងៃទី៣១ ខែឧសភា។
បំរាមគោចរ នឹងនៅតែមានចាប់ពីម៉ោង១០យប់ ដល់៤ព្រឹក។ ការធ្វើដំណើរទៅបរទេសដែលមិនចាំបាច់ត្រូវតែលុបចោល ឬពន្យារពេល។ មនុស្សនឹងត្រូវហាមឃាត់មិនឱ្យចូលតំបន់ដែលមានមនុស្សច្រើន។ អភិបាលខេត្តនឹងកំណត់ការដាក់កម្រិតដោយខ្លួនឯង។
គណៈរដ្ឋមន្ត្រីក៏បានបញ្ជាឱ្យក្រសួងការបរទេសកំណត់ចំនួនជនជាតិថៃយ៉ាងឆាប់រហ័សនៅក្នុងប្រទេសដទៃទៀត ដែលចង់វិលត្រឡប់ទៅស្រុកកំណើតវិញ។ ទាក់ទងនឹងការបន្ធូរបន្ថយវិធានការគ្រប់គ្រងជំងឺ គណៈរដ្ឋមន្ត្រីបានដោះស្រាយថា សុខភាពសាធារណៈ គឺជាកត្តាកំណត់ចម្បង។
គួរបញ្ជាក់ផងដែរថា នៅព្រឹកនេះ ចំនួនករណីឆ្លងសរុបនៃជំងឺកូវីដ១៩ នៅប្រទេសថៃមាន ២៩៣៨ករណី ករណីឆ្លងថ្មី ៧ករណី ករណីបាត់បង់ជីវិតសរុប ៥៤ករណី ករណីបាត់បង់ជីវិតថ្មី២ករណី និង ករណីជាសះស្បើយសរុប ២៦៥២ករណី៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ