វ៉ាស៊ីនតោន ៖ មន្ទីរប៉ង់តាហ្គោន បានបញ្ចេញវីដេអូ ផ្លូវការចំនួន៣ ដែលថតដោយអាកាសយានិក កងទ័ពជើងទឹកសហរដ្ឋអាមេរិក ដែលវីដេអូបង្ហាញពីវត្ថុម្យ៉ាងហាក់ដូចជា UFO នៅកណ្តាលអាកាស ។
ក្រសួងការពារជាតិ បាននិយាយកាលពីថ្ងៃចន្ទនេះថា ការបញ្ចេញវីដេអូនេះ ដើម្បីកុំឲ្យយល់ច្រឡំណាមួយរបស់សាធារណជន ថាតើរូបភាពដែលបានផ្សព្វផ្សាយ មានពិត ឬមិនមានទេ ? ឬមួយគ្មានវីដេអូទាំងនោះទេ ?
សេចក្តីថ្លែងការណ៍របស់មន្ទីរប៉ង់តាហ្គោន បាននិយាយថា “បាតុភូតដែលថតបានពីលើអាកាស សង្កេតឃើញនៅក្នុងវីដេអូ នៅតែមានលក្ខណៈ “មិនស្គាល់អត្តសញ្ញាណ” ។
វីដេអូមួយ ត្រូវបានថត នៅក្នុងខែវិច្ឆិកា ឆ្នាំ២០០៤ និងវីដេអូពីរផ្សេងទៀត ថតនៅខែមករា ឆ្នាំ២០១៥ វីដេអូ ពណ៌សខ្មៅនេះ ធ្លាប់ត្រូវបានលេចធ្លាយ ហើយកងទ័ពជើងទឹក បានទទួលស្គាល់ថា នេះជាវីដេអូ របស់ពួកគេ ។
នៅក្នុងវីដេអូមួយ អ្នកបើកយន្តហោះកងទ័ពជើងទឹកសហរដ្ឋអាមេរិក តាមវត្ថុមួយ នៅលើពពក អ្នកបើកយន្តហោះម្នាក់ ឆ្ងល់ថា តើវាជាយន្តហោះគ្មានមនុស្សបើក ? ម្នាក់ទៀតនិយាយថា “មើលនោះ” វត្ថុ វាចាប់ផ្តើមវិល ។
អ្នកបើកយន្តហោះ ចូលនិវត្តន៍របស់កងទ័ពជើងទឹកអាមេរិកលោក David Fravor ដែលបានឃើញ “UFOs” ក្នុងឆ្នាំ២០០៤ បានប្រាប់ CNN ថា វត្ថុនោះបានផ្លាស់ប្តូរខុសប្រក្រតី ។
លោក Fravor បានប្រាប់ទូរទស្សន៍ CNN ក្នុងឆ្នាំ២០១៧ ថា “នៅពេលខ្ញុំចូលទៅជិតវា… វាបានពន្លឿន ទៅភាគខាងត្បូងយ៉ាងលឿន ហើយបានបាត់ខ្លួន ក្នុងរយៈពេលមិនដល់ពីរវិនាទីផង” ។
លោកបន្ត “វាកើតឡើងភ្លាមៗ ដូចជាគ្រាប់បាល់ប៉េងប៉ុង បុកនឹងជញ្ជាំងហើយវាលោតទៅផ្លូវផ្សេងទៀត” អ៊ីចឹង ។
វីដេអូចំនួន៣ គឺ FLIR, GOFAST និង GIMBAL អាចទាញយកបាន នៅលើគេហទំព័រកងទ័ពជើងទឹកសហរដ្ឋអាមេរិក
ចែករំលែកព័តមាននេះ