ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឱ្យដឹងថា លំនៅឋានមួយខ្នងដែលមានទំហំ៥x៩ម៉ែត្រ ជញ្ជាំងក្តារ ប្រក់ស័ង្គសី និងម៉ូតូចំនួន២គ្រឿង ព្រមទាំងរថយន្ត១គ្រឿងម៉ាកហ៊ីយ៉ាន់ដាយ និងទ្រព្យសម្បត្តិជាច្រើនផ្សេងៗទៀត ត្រូវបានអគ្គិភ័យឆាបឆេះហ្មត់គ្មានសល់ បង្កឱ្យមានការភ្ញាក់ផ្អើលកាលពីម៉ោង៨និង៤៩នាទីយប់ ថ្ងៃទី២៧ ខែមេសា ឆ្នាំ២០២០ ស្ថិតនៅក្នុងភូមិពោធិ៍ចាស់ ឃុំបេង ស្រុកបន្ទាយអម្ពឹល។
សេចក្តីរាយការណ៍បន្តថា ម្ចាស់ផ្ទះខាងលើមានឈ្មោះ បេ វុត្ថា ភេទប្រុស អាយុ៤៣ឆ្នាំ មុខរបរជាទាហាន មានប្រពន្ធឈ្មោះ វ៉ាន់ សុខណា អាយុ៤១ឆ្នាំ មានកូន២ស្រីនាក់ រស់នៅក្នុងភូមិ-ឃុំកើតហេតុខាងលើ។
បើតាមប៉ូលិសស្រុកបន្ទាយអម្ពឹលបានឱ្យដឹងថា មានអ្នកភូមិនៅកន្លែងកើតហេតុបានទូរស័ព្ទរាយការណ៍មកសមត្ថកិច្ចថា មានអគ្គិភ័យបានឆាបឆេះលំនៅឋានមួយខ្នងយ៉ាងសន្ធោសន្ធៅ ។ ក្រោយពីទទួលដំណឹងនេះភ្លាម ប៉ូលិសបានចេញរថយន្តពន្លត់អគ្គិភ័យមួយគ្រឿងធ្វើអន្តរាគមន៍ តែមិនអាចជួយបាននោះទេ ពីព្រោះវាហួសពេលទៅហើយ។
សមត្ថកិច្ចបានបញ្ជាក់ថា ចំពោះមូលហេតុដែលបណ្តាលឱ្យឆាបឆេះផ្ទះខាងលើនេះ គឺបណ្តាលមកម្ចាស់ផ្ទះបានបញ្ឆេះម៉ាស៊ីនភ្លើងបំភ្លឺផ្ទះទុកចោល ហើយក៏នាំប្រពន្ធ និងកូនចេញទៅដើលេងនៅឯក្រុងសំរោងបាត់ទៅ ទើបបណ្តាលឱ្យម៉ាស៊ីនភ្លើងនោះទុស្សេចរន្តអគ្គិសនីចេញជាអណ្តាតភ្លើងឆាបឆេះតែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ