រាជធានីភ្នំពេញ៖ ក្រសួងការបរទេសនិងសហប្រតិបត្តិការអន្តរជាតិបានចេញសេចក្តីជូនព័ងត៌មានមួយស្តីអំពីកិច្ចសន្ទនាតាមទូរស័ព្ទនៅរសៀលថ្ងៃទី២៧ ខែមេសា ឆ្នាំ២០២០ ម្សិលមិញ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន ដោយក្នុងនោះបានរំលេចចេញនូវព័ត៌មានមួយថា ប្រទេសចិនរង់ចាំស្វាគមន៍សម្តេចតេជោ ហ៊ុន សែន នាយករដ្ឋមន្ត្រីកម្ពុជាទៅទស្សនកិច្ចនៅទីក្រុងវូហាន (Wuhan) ក្រោយវិបត្តិ COVID-19 ចប់ ។
យ៉ាងណាមិញប្រភពដដែលមិនបានបញ្ជាក់លម្អិតថា តើសម្តេចលោកនឹងអញ្ជើញទៅ Wuhan នៅថ្ងៃខែឆ្នាំណាលម្អិតនោះទេ បើទោះបីជាពេលនេះស្ថានភាពវីរុសកូវីដ ១៩ នៅទីក្រុងចិនមួយនេះបានស្ងប់ស្ងាត់និងគ្រប់គ្រងស្ថានការណ៍បានក៏ដោយ ។ ក៏ប៉ុន្តែ លោក វ៉ាង យី បានអះអាងថា នឹងបន្តជួយកម្ពុជាតទៅទៀតដើម្បីជម្រុញការអភិវឌ្ឍន៍ឲ្យកាន់តែខ្លាំងក្លាបន្ថែមទៅទៀត ។
នេះបើតាមកិច្ចសន្ទនាតាមទូរស័ព្ទ ។ ក្នុងនោះផងដែរ លោក ប្រាក់ សុខុន បានកោតសរសើរជោគជ័យដែលប្រទេសចិនសម្រេចបានក្នុងការទប់ស្កាត់ជំងឺ COVID-19 តាមរយៈការធ្វើពលិកម្មខ្លួនឯងដ៏ធំធេង និងការរួមកម្លាំងជាធ្លុងមួយរបស់បក្ស រដ្ឋាភិបាល និងប្រជាជនចិនទាំងមូល ក្នុងការទប់ស្កាត់ការរីករាលដាល និងការព្យាបាលអ្នកជំងឺ។ លោកក៏បានសរសើរ និងអរគុណចិនដែលបានបោះដៃជួយដល់ប្រទេសជាច្រើននៅលើលោកតាមការបញ្ជូនគ្រូពេទ្យ សម្ភារពេទ្យ និងថ្នាំ ចែករំលែកមេរៀន បទពិសោធន៍ ដែលនេះជាការបង្ហាញពីសាមគ្គីភាព និងការទទួលខុសត្រូវជាអន្តរជាតិពិតៗ។
លោកឧបនាយករដ្ឋមន្ត្រី ក៏បានអរគុណចិនដែលបានបញ្ជូនគ្រូពេទ្យ និងសម្ភារពេទ្យទាំងពីខាងស៊ីវិល និងយោធា ជួយផ្គត់ផ្គង់វត្ថុធាតុដើម ដើម្បីឱ្យរោងចក្រនៅកម្ពុជាបន្តដំណើរការ ជួយយកចិត្តទុកដាក់ចំពោះពលរដ្ឋ និងនិស្សិតខ្មែរនៅប្រទេសចិន ក៏ដូចជាជួយផ្តល់បទពិសោធន៍ដល់កងកម្លាំងមួកខៀវកម្ពុជានៅលីបង់ និងនៅម៉ាលីផងដែរ ។
ចំណែក លោក វ៉ាង យី នៅក្នុងកិច្ចសន្ទនានោះ ក៏បានរម្លឹកអំពីកិច្ចប្រឹងប្រែងរបស់ប្រទេសចិនទាំងមូលក្នុងការជំនះវិបត្តិ គ្រប់គ្រងវិបត្តិតាមរយៈវិធានការដ៏តឹងរឹងនានា និងគូសបញ្ជាក់ពីតម្រូវការក្នុងការរក្សាការប្រុងប្រយ័ត្នតទៅទៀត ។
ក្នុងនោះផងដែរ លោកក៏បាននិយាយថា ឆ្នាំនេះជាខួប២០ឆ្នាំ នៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងកម្ពុជា ហើយប្រទេសទាំងពីរ នឹងបន្តអនុវត្តកិច្ចព្រមព្រៀងទាំងឡាយដើម្បីជ្រោងទំនាក់ទំនងទ្វេភាគីរបស់យើងទៅកាន់កំរិតកាន់តែខ្ពស់ថែមទៀត។ លោកបានបន្តថា អាទិភាពរបស់យើង គឺបន្តជំរុញកិច្ចសហប្រិបត្តិការក្នុងក្របខណ្ឌនានា ជំរុញសេដ្ឋកិច្ចឱ្យងើបឡើងវិញពីវិបត្តិCOVID-19 ដោយផ្តោតការយកចិត្តទុកដាក់លើវិស័យសំខាន់ៗដែលបានព្រមព្រៀងគ្នាកន្លងមក ។
សូមរម្លឹកថា សម្តេចតេជោ ហ៊ុន សែន គឺជាថ្នាក់ដឹកនាំតែម្នាក់គត់លើពិភពលោក ដែលបានអញ្ជើញទៅកាន់ប្រទេសចិននាពេលចិនកំពុងប្រឈមមុខការផ្ទុះវីរុសកូវីដ-១៩ ៕
ចែករំលែកព័តមាននេះ