ខេត្តកណ្តាល ៖ សំណុំរឿងមន្ត្រីយោធាពាក់ស័ក្តិ៤ដែលជាប់ចោទថា បានបាញ់សម្លាប់ប្រពន្ធដោយសារភ្លើងប្រចណ្ឌទៅតាមការសន្និដ្ឋានរបស់មហាជននោះ ពេលនេះគឺបានដឹងពីមូលហេតុអស់ហើយ ។តាមការរៀបរាប់របស់លោក គឹម សារី អាយុ៥៨ឆ្នាំ ជាប្តីបានឱ្យដឹងថា…
ខេត្តកណ្តាល ៖ សំណុំរឿងមន្ត្រីយោធាពាក់ស័ក្តិ៤ដែលជាប់ចោទថា បានបាញ់សម្លាប់ប្រពន្ធដោយសារភ្លើងប្រចណ្ឌទៅតាមការសន្និដ្ឋានរបស់មហាជននោះ ពេលនេះគឺបានដឹងពីមូលហេតុអស់ហើយ ។តាមការរៀបរាប់របស់លោក គឹម សារី អាយុ៥៨ឆ្នាំ ជាប្តីបានឱ្យដឹងថា នៅវេលាម៉ោង៩ព្រឹកថ្ងៃទី២៦ ខែមេសា គាត់បានចេញពីហាងលក់បាយគុយទាវរបស់ខ្លួននៅចាក់អង្រែក្រោម ខណ្ឌមានជ័យ រាជធានីភ្នំពេញ ត្រឡប់ទៅផ្ទះនៅស្រុកស្អាងវិញ តែមិនឃើញប្រពន្ធនៅផ្ទះទេ មិនដឹងថាទៅទីណាទេ ។
រហូតដល់ម៉ោង១និង៤០នាទីរសៀល ប្រពន្ធគាត់បានទូរស័ព្ទឱ្យទៅយកនៅមុខផ្សារឡាក់គី ព្រះនារាយណ៍ចាក់អង្រែក្រោម ហើយរូបគាត់ក៏បើករថយន្តទៅយកប្រពន្ធ ។ នៅតាមផ្លូវ ប្រពន្ធគាត់ចេះតែរំឭកពីរឿងគាត់មិនដែលចូលផ្ទះទៀងម៉ោងទេ រហូតដល់យប់ៗជ្រៅទើបចូលផ្ទះ និងចោទថាមានស្រី ក៏មានការតមាត់ថា យាយឯងឱ្យខ្ញុំចូលផ្ទះទៀងម៉ោងម៉េចកើត ផ្ទះធ្វើមិនទាន់ហើយផង បើឱ្យខ្ញុំនៅតែផ្ទះ មានលុយឯណាឱ្យចៅទៅរៀន និងធ្វើផ្ទះ ។
ពេលនោះ ស្រាប់តែប្រពន្ធស្រែកឡូឡាខ្លាំងៗនៅក្នុងរថយន្ត ថែមទាំងទាញកាបូបដាក់កាំភ្លើងរបស់គាត់ទៀត ។ ដោយឃើញសភាពមិនស្រួលគាត់ក៏ឈប់រថយន្តក្បែរចិញ្ចើមផ្លូវជាតិលេខ២ដណ្ដើមកាំភ្លើងពីប្រពន្ធវិញ ហើយដោយសារការដណ្ដើមចុះឡើងនេះក៏បណ្តាលឲ្យផ្ទុះ១គ្រាប់ ត្រូវចំក្រោមចង្កាលើបំពង់ខ្យល់ខាងឆ្វេងរបស់ប្រពន្ធបណ្ដាលឱ្យស្លាប់តែម្តង ។
តាមការសារភាពឲ្យដឹងទៀតថា បន្ទាប់មកគាត់បានដឹកប្រពន្ធមកផ្ទះវិញ នៅស្រុកស្អាងនិងទូរស័ព្ទទៅនគរបាលខេត្ត ហើយមួយសន្ទុះក្រោយមក ក៏មាននគរបាលស្រុកនិងកងរាជអាវុធហត្ថស្រុកស្អាងមកដល់និងឃាត់ខ្លួន ។ សមត្ថកិច្ចបានប្រាប់ថា មន្ត្រីយោធារូបនេះឈ្មោះ គឹម សារី អាយុ៥៨ឆ្នាំ ជាជំនួយការ
ក្រសួងការពារជាតិ ។ ឯប្រពន្ធដែលស្លាប់ឈ្មោះសោម សារៀម អាយុ៥៩ឆ្នាំ មានទីលំនៅបច្ចុប្បន្នភូមិព្រែករុន ឃុំព្រែកគយ ស្រុកស្អាងខេត្តកណ្ដាល និងមានស្រុកកំណើតនៅខេត្តបន្ទាយមានជ័យ ។
ជនសង្ស័យរួមនឹងវត្ថុតាង ត្រូវបានកងរាជអាវុធខេត្ត កសាងសំណុំរឿងបញ្ជូនទៅសាលាដំបូងខេត្ត នារសៀលថ្ងៃទី២៧ ខែមេសា ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ