ប្រទេសអង់គ្លេស ៖ សហព័ន្ធបាល់ទាត់ពិភពលោក (FIFA) បានស្នើសុំអនុញ្ញាតឲ្យមានការប្តូរកីឡាករបានចំនួន៥នាក់នៅពេលការប្រកួតបាល់ទាត់ចាប់ផ្តើមឡើងវិញ ក្នុងគោលបំណងកាត់បន្ថយផលប៉ះពាល់លើកាលវិភាគប្រកួតដែលកំពុងជាប់គាំង ។ ជាធម្មតាការប្តូរកីឡាករត្រូវបានអនុញ្ញាតបានចំនួន ៣ នាក់តែប៉ុណ្ណោះ…
ប្រទេសអង់គ្លេស ៖ សហព័ន្ធបាល់ទាត់ពិភពលោក (FIFA) បានស្នើសុំអនុញ្ញាតឲ្យមានការប្តូរកីឡាករបានចំនួន៥នាក់នៅពេលការប្រកួតបាល់ទាត់ចាប់ផ្តើមឡើងវិញ ក្នុងគោលបំណងកាត់បន្ថយផលប៉ះពាល់លើកាលវិភាគប្រកួតដែលកំពុងជាប់គាំង ។
ជាធម្មតាការប្តូរកីឡាករត្រូវបានអនុញ្ញាតបានចំនួន ៣ នាក់តែប៉ុណ្ណោះ ប៉ុន្តែជាមួយនឹងការផ្លាស់ប្តូរថ្មីនេះ បន្ទាប់ពី FIFA បានមើលឃើញថាកាលវិភាគដ៏មមាញឹក នឹងកើតមានសម្រាប់ការប្រកួតលីគ ដែលពួកគេអាចប្រឈមមុខនៅពេលរដូវកាលចាប់ផ្តើមឡើងវិញ ។
ផែនការនេះ អាចត្រូវបានអនុវត្តដោយអ្នករៀបចំសម្រាប់ការប្រកួតក្នុងស្រុក ហើយគ្រោងនឹងអនុវត្តរហូតដល់ចុងបញ្ចប់នៃរដូវកាល ២០២១ ។
អ្នកនាំពាក្យរបស់ FIFA បានប្រាប់ BBC Sport យ៉ាងដូច្នេះថា «បច្ចុប្បន្នបញ្ហាសុខភាពគឺជាអទិភាពចម្បងមុនគេ ហើយគ្មានការប្រកួតប្រជែងណាមួយដែលត្រូវប្រថុយនឹងគ្រោះថ្នាក់ដល់ជីវិតមនុស្សនោះទេ»។
«បាល់ទាត់គួរតែចាប់ផ្តើមឡើងវិញ នៅពេលដែលអាជ្ញាធរសុខាភិបាល និងរដ្ឋាភិបាលនិយាយថា វាពិតជាមានសុវត្ថិភាព និងមិនរំខានដល់សេវាកម្មសុខភាពសាធារណៈ ។ សុវត្ថិភាពរបស់កីឡាករ គឺជាអាទិភាពមួយក្នុងចំណោមអាទិភាពចម្បងរបស់ FIFA ។ កង្វល់មួយក្នុងរឿងនេះ គឺកាលវិភាគការប្រកួតដ៏ញឹកញាប់ អាចមានហានិភ័យនៃការរងរបួសសម្រាប់កីឡាករ» ។
«សំណើនេះនឹងត្រូវការមានការយល់ព្រមពីក្រុមប្រឹក្សាភិបាលសមាគមបាល់ទាត់អន្តរជាតិ (IFAB) និងស្ថាប័នបង្កើតច្បាប់បាល់ទាត់ថា តើវាត្រូវបានអនុវត្តតាមការសំរេចចិត្តរបស់អ្នករៀបចំការប្រកួត ដែលពាក់ព័ន្ធដែរឬទេ?» នេះបើតាមសម្តីរបស់អ្នកនាំពាក្យ FIFA ៕
ចែករំលែកព័តមាននេះ