រាជធានីភ្នំពេញ៖ នៅប៉ុន្មានឆ្នាំចុងក្រោយនេះដំណាំ ឬគ្រាប់ស្វាយចន្ទី ហាក់ពុំសូវ មានបញ្ហាទាក់ទងនឹងទីផ្សារដូចទៅនឹងកសិផលដាំដុះក្នុងស្រុកដទៃទៀតនោះទេ ពោលតម្លៃគ្រាប់ស្វាយចន្ទីនៅតែធ្វើឱ្យកសិករ ឬក្រុមហ៊ុនកែច្នៃអាចទទួលយកបាន ដែលត្រង់នេះមានន័យថាតម្លៃទីផ្សារគ្រាប់ស្វាយចន្ទីនៅមានហាងឆេងល្អ ទោះបីជារាងធ្លាក់ថ្លៃបន្តិចក្តី ។
លោក អ៊ុន គឹមសាន នាយកក្រុមហ៊ុនកែច្នៃគ្រាប់ស្វាយចន្ទី សានតាណាអាហ្គ្រោប្រដាក់បានឱ្យដឹងថា ក្រុមហ៊ុនធ្វើការអភិវឌ្ឍដំណាំស្វាយចន្ទីច្រើនឆ្នាំមកហើយលើផ្ទៃដីចំនួន ៨៥០ហិកតាហើយបច្ចុប្បន្នប្រមូលផលបានលើផ្ទៃដី ២៥០ហិកតាដោយប្រើប្រាស់ពូជ M23 ផ្តល់ទិន្នផលបាន៤-៥តោនក្នុងមួយហិកតា។ លោកបានលើកឡើងថា ឆ្នាំ២០១៧ ចាប់ផ្តើមសាងសង់រោងចក្រកែច្នៃ វេចខ្ចប់ នាំចេញទៅកាន់ទីផ្សារចិនធំជាងគេ មានទីផ្សារអឺរ៉ុប កូរ៉េខាងត្បូង។ រោងចក្រអាចធ្វើការកែច្នៃបាន១០តោនក្នុងមួយថ្ងៃ, មានលទ្ធភាពហាលសម្ងួតបាន ៣៥តោន ហើយមួយចំនួនធំនៃបរិមាណផលគ្រាប់ស្វាយចន្ទី ក្រុមហ៊ុនប្រមូលទិញពី ៣៥ សហគមន៍នៅទូទាំងខេត្តព្រះវិហារ ។
បើតាមលោកនាយកក្រុមហ៊ុនរូបនេះបានឲ្យដឹងថាទិសដៅអនាគតក្រុមហ៊ុនចង់ពង្រីកផ្ទៃដីដាំដុះឲ្យដល់១.០០០ហិកតា ត្រូវការផលស្រស់ ១០.៥០០តោនក្នុងមួយឆ្នាំ ហើយដើម្បីផលិតផលិតផលសម្រេចឲ្យបាន ៣០.០០តោនក្នុងមួយឆ្នាំ។
យ៉ាងណាមិញ លោកបានបញ្ជាក់ថា «បច្ចុប្បន្នតម្លៃគ្រាប់ស្វាយចន្ទីគឺមានតម្លៃ ៤.៥០០រៀលក្នុងមួយគីឡូក្រាម ខណៈមុនសម័យកូវីដ-១៩ ធ្វើទុក្ខបុកម្នេញគឺគ្រាប់ស្វាយចន្ទីរមានតម្លៃរង្វង់ ៦.៥០០-៧០០០រៀលក្នុងមួយគីឡូក្រាម»។ទោះបីជាតម្លៃរាងធ្លាក់ចុះបន្តិចមែន តែតម្លៃនៅតែអាចទទួលយកបានហើយក៏នៅទទួលបានការគាំំទ្រនៅលើទីផ្សារនៅតែពេញនិយម គេមើលឃើញកសិករ ឬក្រុមហ៊ុនបានបង្ហាញទំនោរនៃការផលិត ឬការដាំដុះ ឲ្យមានការកើនឡើងនៅក្នុងផែនការរបស់ខ្លួន។
យោងតាមក្រសួងកសិកម្ម រុក្ខាប្រមាញ់និងនេសាទបានឲ្យដឹងថា ម្ចាស់សិប្បកម្មកែច្នៃគ្រាប់ស្វាយចន្ទីមួយកន្លែង ឈ្មោះ ជ័យសំបូរ បានឱ្យដឹងថាសិប្បកម្មកែច្នៃគ្រាប់ស្វាយចន្ទី ដែលបានបង្កើតឡើង ៥ឆ្នាំមកហើយដោយផ្តើមជាលក្ខណៈគ្រួសារបន្តិចម្តងៗ ឈានមកដល់បច្ចុប្បន្នសិប្បកម្មនេះមានសមាជិក ៤០គ្រួសារ និង ៣៥គ្រួសារទៀតជាអ្នកផ្គត់ផ្គង់វត្ថុធាតុដើម។
តាមអ្នកស្រី អ៊ិនឡៃហួយបញ្ជាក់ថា «សិប្បកម្មកែច្នៃនេះ ធ្វើឡើងដោយដៃ ហើយផលិតផលមានទីផ្សារល្អ ជាពិសេសទីផ្សារប្រទេសជប៉ុន និងផ្សារទំនើបធំៗនៅក្នុងរាជធានីភ្នំពេញ។ បច្ចុប្បន្នមានលទ្ធភាពផលិតបាន ២តោនក្នុងមួយខែ និងទិញផលិតផលស្រស់ ២០០តោនហើយនៅពេលអនាគតគ្រោងនឹងបង្កើនបរិមាណផលិតដើម្បីឆ្លើយតបតាមតម្រូវការ»។
ក្រោយពីស្តាប់ការធ្វើបទបង្ហាញអំពីដំណើរការខ្សែច្រវាក់ផលិតកម្មកែច្នៃគ្រាប់ស្វាយចន្ទី លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានវាយតម្លៃខ្ពស់ និងកោតសរសើរចំពោះក្រុមហ៊ុនដែលបានដាក់ទុនវិនិយោគធ្វើការអភិវឌ្ឍវិស័យផលិតកម្មស្វាយចន្ទីតាំងពីចំណុចចាប់ផ្តើម រហូតដល់ផលិតផលសម្រេចដើម្បីនាំចេញ ស្របតាមគោលនយោបាយរបស់រាជរដ្ឋាភិបាល ក៏ដូចរបស់ក្រសួងក្នុងការអភិវឌ្ឍបែបខ្សែច្រវាក់ផលិតកម្មពេញលេញ គ្រប់ជ្រុងជ្រោយពី A ដល់ Z ក្នុងបំណងប្រើប្រាស់វត្ថុធាតុដើមក្នុងស្រុកឲ្យអស់លទ្ធភាព សេវាកម្ម បង្កើតការងារ បង្កើនតម្លៃបន្ថែមជំរុញការនាំចេញ បង្កើតស្តង់ដារ និងធានាគុណភាព ដើម្បីធ្វើការប្រកួតប្រជែង និងបង្ហាញទីផ្សារអន្តរជាតិថាជាផលិតផលកម្ពុជា។ទាំងនេះគឺជាឆន្ទ:របស់ក្រសួង ។
លោករដ្ឋមន្ត្រីបានលើកឡើងថា «ដើម្បីពង្រីកសក្តានុពលផលិត កែច្នៃ និងបង្កើនបរិមាណនាំចេញ ដោយត្រូវធ្វើផលិតកម្មកសិកម្មតាមកិច្ចសន្យាជាមួយសហគមន៍ផលិត ដោយត្រូវសហការជាមួយនាយកដ្ឋានកសិ-ឧស្សាហកម្ម និងមន្ទីរកសិកម្ម រុក្ខាប្រមាញ់ និងនេសាទខេត្ត។ ត្រូវខិតខំស្វែងរកប្រភពឥណទានពីធនាគារអភិវឌ្ឍអាស៊ី ធនាគារពិភពលោក ធនាគារអភិវឌ្ឍជនបទ និងកសិកម្ម ដើម្បីពង្រីកសមត្ថភាពផលិតនាពេលអនាគត»៕
ចែករំលែកព័តមាននេះ