រាជធានីភ្នំពេញ ៖ ដើមឈើប្រភេទធ្នង់ប្រមាណជិត១០០០ដើមត្រូវបានអាជ្ញាធររាជធានីដាក់ដាំពង្រាយអមតាមចិញ្ចើមផ្លូវជាតិលេខ៦ ចាប់ពីរង្វង់មូលព្រហ្មមុខបួនរហូតដល់វត្តវារិន្ទ សង្កាត់ព្រែកលាប ស្ថិតក្នុងខណ្ឌជ្រោយចង្វារ ក្នុងគោលបំណងដើម្បីអបអរខួបលើកទី៧០នៃទំនាក់ទំនងរវាងកម្ពុជានិងអាមេរិកនិងការលើកកម្ពស់កិច្ចគាំពារបរិស្ថានបង្កើនសម្រស់បៃតង និងការដាំដើមឈើនេះគឺដើម្បីពង្រីកនូវគម្របពណ៌បៃតងនៅក្នុងរាជធានីភ្នំពេញ ។
ក្នុងពិធីដាំដើមឈើធ្វើឡើងនៅព្រឹកថ្ងៃទី២៧ ខែមេសានេះ លោក នួន ផារ័ត្ន អភិបាលរងរាជធានីភ្នំពេញបានមានប្រសាសន៍ អោយដឹងថា ការដាំដើមឈើនៅពេលនេះគឺដើម្បីពង្រីកនូវគម្របពណ៌បៃតងនៅក្នុងរាជធានីភ្នំពេញ ដែលជាផែនការមួយនៅក្នុងចំណោមផែនការជាច្រើននៃទីក្រុងវ័យឆ្លាតដែលរដ្ឋបាលរាជធានីកំពុងរៀបចំប្លង់មេ ។
លោកបានបញ្ជាក់ថា «ការដាំដើមឈើនៅពេលនេះជាជំហានតូចៗនៅក្នុងជំហានដ៏វែងឆ្ងាយ សំរាប់អភិវឌ្ឍន៍រាជធានីភ្នំពេញដែលធ្វើឲ្យរាជធានីភ្នំពេញកាន់តែមានសោភ័ណស្រស់បំព្រង សម្បូរពណ៌បៃតបនិងការចូលរួមកាត់បន្ថយនៅផលប៉ះពាល់ពីការផ្លាស់ប្តូអាកាសធាតុផងដែរ» ។
លោក ម៉ៃឃើល យូបៀល តំណាងឯកអគ្គរដ្ឋទូតនៃស្ថានទូតអាមេរិកប្រចាំនៅកម្ពុជា មានប្រសាសន៍ឱ្យដឹងថាការដាំដើមឈើនៅពេលនេះ គឺដើម្បីអបអរខួបលើកទី៧០នៃទំនាក់ទំនងរវាងកម្ពុជានិងអាមេរិក ដែលប្រធានបទនៅក្នុងខែនេះទាក់ទងទៅនឹងបញ្ហាបរិស្ថាន។ លោក ម៉ៃឃើល យូបៀល បានបញ្ជាក់អោយដឹងថា ការដាំដើមឈើនាពេល នេះគឺដើម្បីបញ្ជាក់ពីទំនាក់ទំនងដ៏យូរអង្វែងរបស់ប្រទេសទាំងពីរ។
គួរបញ្ជាក់ថាដើមឈើប្រភេទធ្នង់ប្រមាណជិតមួយពាន់ដើម ដែលមានអាយុកាលចន្លោះចាប់ពី៤ឆ្នាំទៅ៦ឆ្នាំដែលរដ្ឋបាលរាជធានីភ្នំពេញទទួលបានពីក្រសួងកសិកម្ម រុក្ខាប្រមាញ់និងនេសាទ តាមរយៈរដ្ឋបាលព្រៃឈើ ត្រូវបានដាក់ដាំពង្រាយតាមបណ្តោយផ្លូវជាតិលេខ៦ចាប់ពីរង្វង់មូលជ្រោយចង្វារ រហូតដល់ព្រំប្រទល់ខេត្តកណ្តាល ៕
ចែករំលែកព័តមាននេះ