លោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft បានបន្តចេញមុខមាត់ដើម្បីចែករំលែកពីចំណេះដឹង និងបទពិសោធន៍លើការផ្ទុះជំងឺកូវីដ ១៩ និងបាននិយាយថា ការផ្ទុះជំងឺនេះប្រៀបបានជាការយល់សប្តិអាក្រក់ ហើយជាព្រឹត្តិការណ៍ដែលមនុស្សនឹងចងចាំអស់រយៈពេលជាច្រើនឆ្នាំ ។
លោកបាននិយាយក្នុងបទសម្ភាស៍មួយកាលពីថ្ងៃសុក្រជាមួយសារព័ត៌មាន NBC ថា ពិភពលោកត្រូវការរយៈពេលយូរទៀតទើបអ្វីៗអាចត្រលប់មកកាន់សភាពដូចដើមវិញ ។ លោកបានបន្តថា «ខ្ញុំចង់និយាយថាពួកយើងឆ្លងផុតវាបានពាក់កណ្តាលហើយ ។ តែខ្ញុំមិនគិតដូច្នេះទេ» ។
មហាសេដ្ឋីរូបនេះគិតថា សហរដ្ឋអាមេរិក ដែលជាប្រទេសមហាអំណាច អាចនឹងត្រូវការជាច្រើនខែ ឬឆ្នាំទៀតទើបអាចផលិតវ៉ាក់សាំងទ្រង់ទ្រាយធំបាន ។ យ៉ាងណាក្តី លោកសង្ឃឹមថាវ៉ាក់សាំងអាចនឹងត្រូវបានបង្កើតក្នុងពេលឆាប់ៗ ។
លោកបានបកស្រាយក្នុងបទសម្ភាសន៍ខាងលើថា «ជាទូទៅ វ៉ាក់សាំងត្រូវការច្រើនជាង ៥ឆ្នាំទៀតព្រោះវាមានច្រើនដំណាក់កាល» ។ ប៉ុន្តែលោកបានបន្ថែមថា លោកមើលឃើញភស្តុតាងដែលបង្ហាញថាវ៉ាក់សាំងសម្រាប់កូវីដ ១៩ អាចនឹងត្រូវបានផលិតក្នុងកំឡុងពេលពី ១៨ ទៅ ២៤ខែពិតមែន ។ លោកក៏បានចែករំលែកថាវ៉ាក់សាំងអាចនឹងមាននៅពាក់កណ្តាលឆ្នាំ ២០២១ ខាងមុខនេះ ។
មកដល់ពេលបច្ចុប្បន្ន មូលនិធិសប្បុរសធម៌របស់លោក ហ្គេតស៍ គឺ Bill & Melinda Gates Foundation បានសន្យាថានឹងបរិច្ចាគ ២៥០លានដុល្លារដើម្បីជួយផលិតវ៉ាក់សាំងសម្រាប់វីរុសកូរ៉ូណាដែលជាវិធីតែមួយទេក្នុងការធ្វើឲ្យពិភពលោកត្រលប់ទៅកាន់សភាពដូចដើមវិញបាន ។
ក្នុងពេលថ្មីៗនេះលោក ហ្គេតស៍ ក៏បានចេញមុខមាត់យ៉ាងសកម្មក្នុងការរិះគន់ការឆ្លើយតបរបស់រដ្ឋាភិបាលអាមេរិកសម្រាប់កូវីដ ១៩ ដែរ ។ កាលពីខែមិនា លោកបាននិយាយថា សហរដ្ឋអាមេរិកមិនបានចេញសកម្មភាពលឿនគ្រប់គ្រាន់ដើម្បីចៀសវាងការបិទសេដ្ឋកិច្ចទាំងមូលទេ ហើយថែមទាំងនិយាយថាការសម្រេចចិត្តរបស់លោកប្រធានាធិបតី ដូណាល់ ត្រាំ (Donald Trump) ក្នុងការផ្អាកការបរិច្ចាគទៅដល់អង្គការសុខភាពពិភពលោកថាជាការសម្រេចចិត្តដ៏គ្រោះថ្នាក់ថែមទៀត ៕
ចែករំលែកព័តមាននេះ