អុីតាលី ៖ នាយករដ្ឋមន្ត្រីអុីតាលី លោក Giuseppe Conte បានប្រកាសកាលពីថ្ងៃអាទិត្យថា ការហាមប្រាមពិធីបុណ្យសពរបស់ប្រទេសនេះនឹងត្រូវបញ្ចប់នៅថ្ងៃទី៤ ខែឧសភា។
ថ្លែងនៅក្នុងសន្និសីទសារព័ត៌មាន លោកនាយករដ្ឋមន្ត្រី Conte បានបញ្ជាក់ថា ពិធីបុណ្យសពនឹងត្រូវបានអនុញ្ញាតឱ្យមាននៅខាងក្រៅផ្ទះ ដោយមានសមាជិកគ្រួសារច្រើនបំផុតចំនួន១៥នាក់។
លោកបានបន្តទៀតថា ពិធីសាសនាដទៃទៀតនឹងត្រូវការការយល់ព្រមពីគណៈកម្មការវិទ្យាសាស្ត្រ។ ការិយាល័យរបស់នាយករដ្ឋមន្ត្រីបានលើកឡើងថា៖ «ក្នុងប៉ុន្មានថ្ងៃខាងមុខ គេនឹងធ្វើការសិក្សាទៅលើពិធីនេះ ដើម្បីឱ្យមានភាពកាន់តែច្បាស់លាស់ និង អាចបង្កើនកម្រិតសុវត្ថិភាពឱ្យកាន់តែខ្ពស់ជាអតិបរមា»។
ដោយឡែក នៅក្នុងសេចក្តីថ្លែងការណ៍មួយ អាចារ្យសាសនានៅអុីតាលីបានត្អូញត្អែរ ដោយនិយាយថា ការលើកឡើងរបស់នាយករដ្ឋមន្ត្រី ដែលបានកំណត់ចំនួនអ្នកចូលរួមបុណ្យសព គឺមិនមានភាពទូលំទូលាយនោះទេ។
គួរបញ្ជាក់ផងដែរថា មកដល់ពេលនេះ អុីតាលីមានករណីឆ្លងកូវីដ១៩សរុបចំនួន ១៩៧,៦៧៥ករណី ករណីអ្នកបាត់បង់ជីវិតសរុប ២៦,៦៤៤ករណី និងករណីជាសះស្បើយសរុប៦៤,៩២៨ករណី៕ (យោងតាមប្រភពពី ៖ edition.cnn.com)
ចែករំលែកព័តមាននេះ