រាជធានីភ្នំពេញ ៖ ខណៈដែលស្ថានភាពកូវីដ19 កំពុងបន្តរាំងស្ទះ គេកត់សម្គាល់ថាគម្រោងមួយចំនួនត្រូវបានលុប និងពន្យារពេលស្ទើរគ្រប់ផ្នែក ដោយគម្រោងខ្លះត្រូវបានលុបចោល ឬឆាចោលនោះផង។ យ៉ាងណាមិញ យោងតាមការបញ្ជាក់គម្រោងត្រៀមខ្លួនក្នុងការរៀបចំព្រឹត្តិការណ៍ស៊ីហ្គេមលើកដំបូងនៅកម្ពុជា…
រាជធានីភ្នំពេញ ៖ ខណៈដែលស្ថានភាពកូវីដ19 កំពុងបន្តរាំងស្ទះ គេកត់សម្គាល់ថាគម្រោងមួយចំនួនត្រូវបានលុប និងពន្យារពេលស្ទើរគ្រប់ផ្នែក ដោយគម្រោងខ្លះត្រូវបានលុបចោល ឬឆាចោលនោះផង។ យ៉ាងណាមិញ យោងតាមការបញ្ជាក់គម្រោងត្រៀមខ្លួនក្នុងការរៀបចំព្រឹត្តិការណ៍ស៊ីហ្គេមលើកដំបូងនៅកម្ពុជា គឺនៅតែពន្លឿន និងយកចិត្តទុកដាក់ ដោយមិនមានការរយាលដៃនោះឡើយ។
ផ្អែកតាមការបញ្ជាក់របស់គណៈកម្មការជាតិអូឡាំពិកកម្ពុជា បានអះអាងថា ដំណើរការសាងសង់កីឡដ្ឋានមរតកតេជោ ដើម្បីត្រៀមខ្លួនរៀបចំព្រឹត្តិការណ៍ស៊ីហ្គេម អោយទាន់នាឆ្នាំ២០២៣ មិនមានការបង្អាក់ ឬរយាលនោះទេ បើទោះជាក្នុងកាលៈទេសៈនេះ កម្ពុជារងផលប៉ះពាល់ពីវីរុសកូវីដ១៩ក៏ដោយ។ គម្រោងទាំងមូល កាន់តែពន្លឿនទៅវិញ ព្រោះខ្លាចដល់ពេលរៀបចំ បែរជាស្ថាបនាមិនទាន់ពេល។
មន្ត្រីទទួលបន្ទុក និងពាក់ព័ន្ធលើការងារនេះ សុទ្ធតែអះអាងថា ត្បិតថាផ្ទុះកូវីដ១៩ ប៉ុន្តែក្រុមការងារសាងសង់មិនត្រូវបានរំសាយ ឬអនុញ្ញាតិអោយសម្រាកទេ ផ្ទុយទៅវិញ មានតែរឹតត្បិតម៉ោងពេលមិនអោយទៅវិញទេ។ តាមការបញ្ជាក់ បើមានកម្មករចិន ឬខ្មែរណាម្នាក់ ចេញពីបរិវេណសាងសង់ដោយគ្មានការអនុញ្ញាត ពួកគេនឹងត្រូវដាក់ឲ្យនៅដាច់ដោយឡែកចំនួន១៤ថ្ងៃ ទើបអនុញ្ញាតឲ្យចូលធ្វើការវិញ។
ការធ្វើបែបនេះ គឺដើម្បីបង្ការ និងទប់ស្កាត់ការរីករាលដាលនៃជំងឺកូវីដ-១៩ ដើម្បីមិនអោយមានការសុំសម្រាកខុសពីគោលការណ៍ និងដើម្បីពន្លឿននូវការសាងសង់ទីតាំងទាំងមូល។
ជាក់ស្តែង សូម្បីតែកាលពីឱកាសបុណ្យចូលឆ្នាំខ្មែរកន្លងទៅ ក៏ក្រុមកម្មករដែលធ្វើការនៅទីនោះ ពុំត្រូវបានអនុញ្ញាតឲ្យឈប់សម្រាកនោះដែរ ដោយសារខ្លាចគម្រោងសាងសង់ស្តាត និងទីតាំងសម្រាប់រៀបចំស៊ីហ្គេមរបស់កម្ពុជា សាងសង់មិនទាន់ ឬ មានការខ្វះចន្លោះ។ (កែសម្រួលដោយ ៖ បុប្ផា)
ចែករំលែកព័តមាននេះ