រាជធានីភ្នំពេញ ៖ តាញ់ មករា មកពីសមាគមកីឡាប្រដាល់ក្រសួងការពារជាតិ បានយកឈ្នះឡុង ជិន អ្នកប្រដាល់មកពីក្លិបខ្លារខិនមានរិទ្ធ និងក្លាយជាម្ចាស់ប្រាក់លានក្នុងកម្មវិធីប្រដាល់ កម្ពុជា សង្វៀនគុនខ្មែរ ដែលបានរៀបចំធ្វើនៅលើសង្វៀនស៊ីអិនស៊ី កាលពីថ្ងៃទី២៥ មេសា ខណៈលួន សុខខេង មកពីក្លិបពុទ្ធសេរីវង្សពោធិសែនជ័យ បរាជ័យក្នុងការប្រកួតដណ្ដើមប្រាក់លានដែរបន្ទាប់ពីបាក់ក្ដោងច្រមុះដោយសារកណ្ដាប់ដៃកីឡាករ ឈឿន វ៉ៃ មកពីក្លិបនាគរាជចតុមុខ។
ការប្រកួតនៅថ្ងៃនោះគ្រាន់តែនៅក្នុងទឹកទី១ តាញ់ មករា បានទាត់ជើងក្រោមឡុងជិន ពេញទំហឹងបណ្ដាលឱ្យដួលរហូតត្រូវអាជ្ញាកណ្ដាលរាប់៨ទើបគេអាចក្រោកបន្តការប្រកួតទៀតបាន ។ ប៉ុន្តែនៅក្នុងទឹកទី២និងទី៣តាញ់ មករា មិនខុសពីផ្ទាំងស៊ីបរបស់ឡុង ជិននោះទេ ដោយគេឃើញឡុង ជិន វាយសន្ធាប់ចូលមុខនិងពោះទឹកពេញៗ និងត្រូវឡុង ជិនដាក់សម្ពាធជាប់រហូត ។
លុះចូលដល់ទឹកទី៤និងទី៥ តាញ់ មករា ចាប់ផ្ដើមបង្កើនការវាយសម្រុកវិញ ក្នុងបំណងផ្ដួលគូប្រកួត ប៉ុន្តែមិនអាចធ្វើទៅបាន ទើបចប់ការប្រកួតទឹកទី៥ តាញ់ មករាបានត្រឹមឈ្នះពិន្ទុឡុង ជិន ទាំងប្រផិតប្រផើយ ប៉ុណ្ណោះ។
កីឡាករ ឈឿន វ៉ៃ មកពីក្លិបបក្សីស្លាបដែកបានផ្ដល់មេរៀនជូរចត់ដល់អ្នកប្រដាល់ចាស់វស្សាលួន សុខខេង យ៉ាងចាញ់ដៃតាមរយៈការវាយបំបាក់ក្ដោងច្រមុះគូប្រកួតហើយត្រូវអាជ្ញាកណ្ដាលបញ្ឈប់លែងឱ្យប្រកួតត្រឹមទឹកទី៤ និងបានក្លាយជាម្ចាស់ប្រាក់លានក្នុងសប្ដាហ៍នេះដែរ។
ការប្រកួតរវាងគូនេះចាប់តាំងពីទឹកទី១ដល់ទឹកទី៣ លួន សុខខេង វាយចូលគោលដៅច្រើនជាង
ប៉ុន្តែសំណាងមិនល្អត្រូវឈឿន វ៉ៃ ម៉ាត់ចូលមុខមួយដៃយ៉ាងពេញទំហឹងបណ្ដាលឱ្យបាក់ក្ដោង
ច្រមុះមិនអាចបន្តការប្រកួតទៀតបាន។
នៅលើសង្វៀនដដែល សួន ចាន់នី មកពីក្លិបបក្សីស្លាបដែក មុននឹងដណ្ដើមបានប្រាក់លានពីការប្រកួតលើកនេះក៏វេទនាខ្លួនមិនតិចដែរដោយត្រូវឡុង បេនលឿន មកពីក្លិបសាលវ័ន្តកីឡា វាយឡើងទ្រមខ្លួននិងឈ្នះពិន្ទុទាំងលំបាក។
ឡុង បេនលឿន បើទោះជាគេមិនធ្លាប់ជួបប្រកួតជាមួយ សួន ចាន់នី ពីមុនមកក្ដីតែសម្រាប់ការប្រកួតលើកនេះគេមិនសុខចិត្តបណ្ដោយឱ្យសួន ចាន់នី ធ្វើព្យុះភ្លៀងស្រេចតែចិត្តនោះទេ គេបានប្រើកណ្ដាប់ដៃនិងជង្គង់ វាយនិងបុកទៅលើសួន ចាន់នី តាំងពីទឹកទី១ តែត្រូវ សួន ចាន់នី ទាត់និងធាក់ចេញធ្វើឱ្យគេបាត់បង់ឱកាសវាយចូលដោយអន្លើ ។ ទោះជាយ៉ាងណា ការប្រកួតរវាងគូនេះធ្វើឱ្យមានការចាប់អារម្មណ៍យ៉ាងខ្លាំងព្រោះកីឡាករទាំងពីរប្រកួតគ្នាអស់ពីសមត្ថភាពរៀងៗខ្លួន៕ (កែសម្រួលដោយ ៖ បុប្ផា)
ចែករំលែកព័តមាននេះ