ខេត្តស្ទឹងត្រែង ៖ មន្ត្រីយោធាជាន់ខ្ពស់មួយរូប ឋានៈឧត្តមសេនីយ៍ទោ រួមទាំងគ្រឿងចក្រចំនួន៣គ្រឿង បានរងការឃាត់ខ្លួន និងដកហូត ខណៈបញ្ជា និងធ្វើសកម្មភាពឈូសឆាយដីព្រៃបម្រុងទុករបស់រដ្ឋរាប់សិបហិចតា ស្ថិតនៅក្នុងភូមិស្រឡៅ ឃុំអន្លង់ជ្រៃ ស្រុកថាឡា បរិវ៉ាត់កាលថ្ងៃទី២៤ មេសា ឆ្នាំ២០២០ ក្រោយពីទទួលបានបទបញ្ជាពីអភិបាលខេត្តស្ទឹងត្រែង លោក ម៉ុម សារឿន ។
សមត្ថកិច្ចនៅក្នុងការបង្ក្រាប ការទន្ទ្រានឈូសឆាយដីព្រៃរដ្ឋ ក្រសោបធ្វើជាកម្មសិទ្ធផ្ទាល់នោះ បានបង្ហាញកំណត់ហេតុបង្ក្រាបអោយដឹងថា នៅក្នុងប្រតិបត្តិការនេះកម្លាំងសមត្ថកិច្ចចម្រុះខេត្តបានអនុវត្តតាមបទបញ្ជារបស់ប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង លោក ម៉ុម សារឿន ហើយបានចុះទៅដល់គោលដៅ និងបានប្រទះឃើញសកម្មភាពឈូសឆាយដីព្រៃបម្រុងទុក របស់រដ្ឋរាប់សិបហិកតា ។
កំណត់ហេតុបានបង្ហាញទៀតថា កម្លាំងសមត្ថកិច្ចបានឃាត់ទុកគ្រឿងចក្រចំនួន៣គ្រឿង ទី១- អេស្កាវ៉ាទ័រ ១គ្រឿង ២- ត្រាក់ទ័រ ១គ្រឿង និងទី៣-ប៊ុល ធុនតូច១គ្រឿង ។
ចំណែកម្ចាស់ទីតាំងដែលបានប្រើប្រាស់គ្រឿងចក្រឈូសឆាយដីព្រៃនោះបានប្រាប់សមត្ថកិច្ចថា លោកមានឈ្មោះ ចាន់ សំអាត មានមុខងារជាមន្ត្រីយោធាជាន់ខ្ពស់មានឋានន្តរស័ក្តឧត្តមសេនីយ៍ទោ ។ លោកថា លោកមានផ្ទៃដីទំហំទទឹង ៣០០ម៉ែត្រ និងបណ្តោយប្រវែង ១៦០០ម៉ែត្រមាន លិខិតកាន់កាប់ដីនេះ ដោយមានការទទួលស្គាល់ពីអាជ្ញាធរឃុំអន្លង់ជ្រៃ លើទំហំផ្ទៃដីសរុបចំនួន៤៨ហិកតា ។
កំណត់ហេតុសមត្ថកិច្ចបានបញ្ជាក់ថា ក្រោយការស្តាប់ការបំភ្លឺរបស់ម្ចាស់ទីតាំងដីលោកឧត្តមសេនីយ៍ទោ ចាន់ សំអាត នោះមកក្រុមសមត្ថកិច្ចចម្រុះបានចុះទៅពិនិត្យទីតាំងឈូសឆាយដីនោះឃើញថា ដីព្រៃដែលបានឈូសឆាយរួចរាល់ គឺមានប្រមាណជា ៣៦ហិកតា ហើយផ្ទៃដីព្រៃដែលមិនបានកាប់រាន និងឈូសឆាយនៅសល់ប្រមាណជា ៣២ហិកតាទៀតផងដែរ ។ ដោយពិនិត្យឃើញពីការទន្ទ្រានឈូសឆាយយកដីព្រៃបម្រុងទុករបស់រដ្ឋ រាប់សិបហិកតាយ៉ាងដូច្នេះ សមត្ថកិច្ចបានសម្រេចដកហូតទុកគ្រឿងចក្រ ៣គ្រឿង និងឃាត់ខ្លួនម្ចាស់ទីតាំងឈូសឆាយដីព្រៃ ដែលជាមន្ត្រីយោធាផ្កាយ២ម្នាក់ នាំមកសាកសួរនៅស្នងការដ្ឋាននគរបាលខេត្តស្ទឹងត្រែង ។ ហើយរហូតមកទល់នឹងពេលនេះគេនៅមិនទាន់ដឹងពីលទ្ធផលនៃការសាកសួរនោះនៅឡើយទេ ។
ចំណែកមេឃុំម្នាក់ ដែលហ៊ានចេញលិខិតកាន់កាប់ និងឈូសឆាយដីព្រៃរដ្ឋ រាប់សិបហិកតានោះ អាជ្ញាធរមានសមត្ថកិច្ចក៏នឹងមានវិធានការផ្លូវច្បាប់បែបណា ទៅលើបុគ្គលខិលខូចរូបនោះនៅឡើយដែរ? ៕
ចែករំលែកព័តមាននេះ