លោកមហាសេដ្ឋី វ៉ារេន បាហ្វេត (Warren Buffett) ដែលជាវិនិយោគិនដ៏ជោគជ័យក្នុងប្រវត្តិសាស្ត្រមិនត្រឹមតែមានចំណេះដឹង និងបទពិសោធន៍ទូលំទូលាយផ្នែកវិភាគអាជីវកម្មទេ តែលោកក៏ជាប្រភពនៃចំណេះដឹងក្នុងជីវិតជាច្រើនដែលមានអត្ថប្រយោជន៍សម្រាប់មនុស្សគ្រប់វ័យ ។ លោកធ្លាប់បាននិយាយក្នុងអត្ថបទដែលលោកសរសេរថា…
លោកមហាសេដ្ឋី វ៉ារេន បាហ្វេត (Warren Buffett) ដែលជាវិនិយោគិនដ៏ជោគជ័យក្នុងប្រវត្តិសាស្ត្រមិនត្រឹមតែមានចំណេះដឹង និងបទពិសោធន៍ទូលំទូលាយផ្នែកវិភាគអាជីវកម្មទេ តែលោកក៏ជាប្រភពនៃចំណេះដឹងក្នុងជីវិតជាច្រើនដែលមានអត្ថប្រយោជន៍សម្រាប់មនុស្សគ្រប់វ័យ ។
លោកធ្លាប់បាននិយាយក្នុងអត្ថបទដែលលោកសរសេរថា សារសំខាន់ដែលលោកគិតថាអ្នកនៅវ័យក្មេងគួរតែយកចិត្តទុកដាក់លើ គឺការមើលថែរក្សារាងកាយ និងសតិឲ្យបានល្អ ។ លោកបានលោកឧទាហរណ៍ដ៏ងាយយល់មួយដើម្បីបកស្រាយ ។«ឧទាហរណ៍ថា ខ្ញុំស្នើទិញរថយន្តក្នុងក្តីសុបិនឲ្យអ្នកមួយគ្រឿង ។ អ្នកអាចជ្រើសរថយន្តប្រភេទណាក៏បានដែរ ហើយពេលដែលអ្នកចេញពីរៀននៅពេលរសៀល រថយន្តនោះនឹងរងចាំអ្នកនៅផ្ទះ» ។ ប៉ុន្តែមានលក្ខខណ្ឌមួយនោះ គឺវាជារថយន្តតែមួយគត់ដែលអ្នកអាចមានក្នុងមួយជីវិតនេះ ។
បន្ទាប់ពីដឹងលក្ខខណ្ឌហើយ តើអ្នកនឹងធ្វើយ៉ាងដូចម្តេចលើរថយន្តនោះ? លោក បាហ្វេត បានបន្តថា «អ្នកប្រហែលជាអានសេចក្តីណែនាំបួនដងមុនពេលបើកបរវា អ្នកប្រហែលជាចតវាទុកនៅផ្ទះ ការពារវាគ្រប់ពេល ឧស្សាហ៍ប្តូរប្រេងជាងធម្មតាដល់ទៅពីរដង ។ ប្រសិនបើអ្នកមើលឃើញភាពច្រេះបន្តិច អ្នកនឹងយកវាទៅជួសជុលភ្លាមដើម្បីការពារមិនឲ្យវារីករាលដាល ព្រោះអ្នកដឹងថាវាត្រូវតែនៅល្អអស់មួយជីវិតរបស់អ្នក» ។
លោក បាហ្វេត បាននិយាយថា វាប្រៀបបាននឹងរាងកាយ និងសតិរបស់អ្នកដែរ ។ ការមើលថែរថយន្តរបស់អ្នកមិនគួរមានភាពខុសគ្នាពីការមើលថែរាងកាយរបស់អ្នកទេ ។ លោកបានបកស្រាយថា «អ្នកមានសតិ និងរាងកាយតែមួយទេអស់មួយជីវិតនេះ ។ ប្រសិនបើអ្នកមិនមើលថែវាពេលដែលអ្នកនៅវ័យក្មេង វាប្រៀបបានដូចនឹងចតរថយន្តចោលនៅក្រៅខណៈដែលមានព្យុះទឹកកក និងការទុកឲ្យដុះច្រេះពេញរថយន្តជាដើម ។ ប្រសិនបើអ្នកមិនមើលថែសតិ និងរាងកាយរបស់អ្នកពេលនេះទេ ពេលដែលអ្នកអាយុ ៤០ ឬ ៥០ឆ្នាំ អ្នកប្រៀបបានដូចជារថយន្តមួយគ្រឿងដែលមិនអាចបើកទៅមុខបាន» ។
សម្រាប់លោក បាហ្វេត ផ្ទាល់ លោកក៏ព្យាយាមអនុវត្តតាមដំបូន្មានដែលលោកប្រាប់ដល់អ្នកដទៃដែរ ។ កាលពីឆ្នាំ ២០០៧ ឬពេលដែលលោកមានអាយុខ្ទង់ ៧០ លោកបានប្រាប់ដល់ CNBC ថា វេជ្ជណ្ឌិតរបស់លោកបានប្រាប់លោកកាលពីពីរឆ្នាំមុនថា លោកត្រូវតែជ្រើសរើសរវាងទទួលទានអាហារដែលមិនប៉ះពាល់ដល់សុខភាព ឬធ្វើលំហាត់ប្រាណ ។ លោក បាហ្វេត បានជ្រើសរើសជម្រើសទីពីរ ៕
ចែករំលែកព័តមាននេះ