គ្រាអាសន្នជាឱកាសក្នុងការរៀនជំនាញថ្មីៗ និងដុះខាត់អាកប្បកិរិយាដែលនឹងជួយឲ្យអ្នកក្លាយជាអ្នកដឹកនាំមានសមត្ថភាពខ្ពស់ ។ ការផ្ទុះជំងឺកូវីដ ១៩ ក៏ជាឱកាសសម្រាប់ការរៀនសូត្រដែរ ជាពិសេស គឺពីប្រភពព័ត៌មានដែលអ្នកគួរទុកចិត្ត ។
លោកមហាសេដ្ឋី ឆាលី ម៉ាងហ្គឺ (Charlie Munger) ដែលជាដៃគូវិនិយោគរបស់លោកមហាសេដ្ឋី វ៉ារេន បាហ្វេត (Warren Buffett) នៅក្រុមហ៊ុន Berkshire Hathaway មានការសាកល្បងមួយដែលអាចវែកញែកថាមនុស្សម្នាក់ពិតជាគួរឲ្យទុកចិត្តបាន ឬអត់ ។
១. វាស់វែងចំណេះដឹងរបស់ពួកគេ
មនុស្សដែលមានចំណេះដឹងពិតប្រាកដលើប្រធានបទណាមួយភាគច្រើនជាមនុស្សដែលមានបទពិសោធន៍ច្រើន និងមនុស្សដែលត្រូវបានអ្នកដទៃទទួលស្គាល់ក្នុងវិស័យរបស់ពួកគេ ។ ឧទាហរណ៍ដូចជាក្នុងកំឡុងការផ្ទុះជំងឺកូវីដ ១៩ នេះជាដើម ។ ប្រភពព័ត៌មានដែលគួរឲ្យជឿទុកចិត្តបំផុត គឺគួរតែអ្នកជំនាញដែលមានបទពិសោធន៍ច្បាស់លាស់ មិនមែនអ្នកប្រើប្រាស់ហ្វេសប៊ុកដែលអ្នកឃើញលើប្រព័ន្ធសង្គមទេ ។
ក្នុងអាជីវកម្ម អ្នកនឹងជួបមនុស្សជាច្រើនដែលគិតថាខ្លួនដឹងច្រើន ឬព្យាយាមបង្ហាញថាខ្លួនដឹងច្រើនទោះជាមិនមានបទពិសោធន៍ ឬបានធ្វើការស្រាវជ្រាវច្បាស់លាស់ជាមុនសិនក៏ដោយ ។ ជាទូទៅ អ្នកអាចរកឃើញមនុស្សទាំងនេះបានប្រសិនបើអ្នកសួរនាំបន្ថែមលើអំណះអំណាងរបស់ពួកគេឲ្យកាន់តែជ្រៅ ។
២. វាស់វែងអ្វីដែលពួកគេមិនចេះ
យោងទៅតាមអ្នកនិពន្ធសៀវភៅ The Art of Thinking Clearly បានឲ្យដឹងថា ចំណុចមួយដែលបែងចែករវាងអ្នកជំនាញពិតប្រាកដ និងអ្នកដែលធ្វើពុតជាអ្នកចេះ គឺអ្នកជំនាញពិតប្រាកដទទួលស្គាល់អ្វីដែលខ្លួនមិនចេះ ឬមិនច្បាស់លាស់ ។ ប្រសិនបើពួកគេប្រទះឃើញថា ខ្លួនមិនអាចឆ្លើយនឹងសំណួរអ្វីមួយ ពួកគេមិនខ្លាចនឹងឆ្លើយថាពួកគេមិនចេះឡើយ ។
ជាក់ស្តែង មនុស្សម្នាក់ៗតែងតែមានទស្សនៈរៀងៗខ្លួនជាពិសេសពេលដែលអនាគតពោរពេញទៅដោយភាពមិនច្បាស់លាស់ ។ ប៉ុន្តែវាមិនមែនមានន័យថា គំនិតរបស់មនុស្សគួរតែមានតម្លៃស្មើៗគ្នាទេ ។ សម្រាប់មនុស្សដែលត្រូវធ្វើការសម្រេចចិត្តធំៗ អ្នកត្រូវចេះថ្លឹងថ្លែងឲ្យបានច្បាស់លាស់ដើម្បីរកមនុស្សដែលអ្នកអាចពឹងផ្អែកបានមុនពេលធ្វើការសម្រេចចិត្ត ៕
ចែករំលែកព័តមាននេះ