ខេត្តបាត់ដំបង ៖ យោងតាមសេចក្ដីរាយការណ៍បានឲ្យដឹងថា ស្រុកចំនួន០៤ក្នុងខេត្តបាត់ដំបង បានរងការវាយប្រហារដោយខ្យល់កន្ត្រាក់ កាលពីល្ងាចថ្ងៃទី២៤ មេសា ដែលបណ្ដាលឲ្យខូចខាតលំនៅឋានរបស់ប្រជាពលរដ្ឋអស់ប្រមាណជាង៤២០ខ្នង តែមិនទាន់មានរបាយការណ៏ស្ដីពីគ្រោះថ្នាក់មនុស្ស ឬខូចខាតផលដំណាំនៅឡើយទេ ។
របាយការណ៍នានាដែលសមត្ថកិច្ចបានឲ្យដឹងថា ខ្យល់កន្ត្រាក់ដ៏សាហាវដែលលាយឡំជាមួយភ្លៀង និង ផ្ទររន្ទះផង បានចាប់កើតឡើងតាំងពីរសៀលរហូតដល់យប់ ហើយបានប៉ះទង្កិចទៅលើស្រុកចំនួន០៤ គឺស្រុករុក្ខគិរី ស្រុកបាណន់ ស្រុករតនមណ្ឌល និងស្រុកកំរៀង ។ បើតាមរបាយការណ៍ដដែល ស្រុករុក្ខគិរី ប៉ះទៅលើឃុំចំនួន០៣ គឺឃុំបាសាក់ ខូចខាតផ្ទះអស់ចំនួន៣៩ខ្នង ឃុំស្ដុកប្រវឹក ខូចខាតផ្ទះអស់ចំនួន១០ខ្នង និង ឃុំមុខរាហ៏ ខូចខាតផ្ទះអស់ចំនួន០៤ខ្នង សរុបអស់ចំនួន៥៣ខ្នង ។
ស្រុកបាណន់ ប៉ះទង្កិចទៅលើភូមិមួយចំនួន នៅឃុំស្នឹង ខូចខាតផ្ទះអស់ចំនួន២២ខ្នង។ ស្រុកកំរៀង ប៉ះទៅលើឃុំចំនួន០៥ គឺឃុំត្រាង ខូចខាតផ្ទះអស់ចំនួន៩ខ្នង, ឃុំអូរដា ខូចខាតផ្ទះអស់ចំនួន១០ខ្នង, ឃុំកំរៀង ខូចខាតផ្ទះអស់ចំនួន១២ខ្នង, ឃុំតាសែន អស់ចំនួន៨៥ខ្នង និង ឃុំតាក្រី អស់ចំនួន១១០ខ្នង សរុបខូចខាតអស់ចំនួន២២៦ខ្នង។ ស្រុករតនមណ្ឌល ប៉ះពាល់ទៅលលភូមិចំនួន០៦ នៅក្នុងឃុំរស្នីសង្ហា បណ្ដាលឲ្យខូចខាតសរុបចំនួន១២៧ខ្នង។
ប៉ុន្តែភាគច្រើនលើសលុបគឺលំនៅឋានទាំងនោះខូចខាតដំបូល តែមិនទាន់មានសេចក្ដីរាយការណ៏អំពីការខូចខាតផលដំណាំ ឬ គ្រោះថ្នាក់ដល់មនុស្សនៅឡើយទេ។ មន្ត្រីរដ្ឋបាលខេត្ត បាននិយាយថា នេះគ្រាន់តែជារបាយករណ៍បឋម ដែលមន្ត្រីមូលដ្ឋានបានរាយការណ៍ ប៉ុន្តែពេលនេះមន្ត្រីជំនាញ កំពុងចុះពិនិត្យ និង ធ្វើការស្រាវជ្រាវតាមបណ្ដាស្រុកដែលរងការវាយប្រហារដោយខ្យល់កន្ត្រាក់ដ៏ខ្លាំងក្លានេះ ដើម្បីធ្វើរបាយការណ៍ជូនថ្នាក់លើ ហើយពេលនេះអាជ្ញាធរខេត្ត និង សាខាកកាបាទក្រហមខេត្ត ក៏កំពុងរៀបចំអំណោយដើម្បីសង្គ្រោះបន្ទាន់ដល់គ្រួសាររងគ្រោះទាំងនោះដែរ ៕
ចែករំលែកព័តមាននេះ