ទោះជាកូវីដ ១៩ មិនរើសអើងវណ្ណៈមនុស្សដែលអាចឆ្លងវាបានពិតមែនក្តី វាមិនប្រាកដថាកូវីដ ១៩ ជះឥទ្ធិពលលើអ្នកមាន និងអ្នកក្រដូចគ្នាទេ ។ ក្នុងរយៈពេលមួយខែដែលប្រជាជនអាមេរិកចំនួន ២២…
ទោះជាកូវីដ ១៩ មិនរើសអើងវណ្ណៈមនុស្សដែលអាចឆ្លងវាបានពិតមែនក្តី វាមិនប្រាកដថាកូវីដ ១៩ ជះឥទ្ធិពលលើអ្នកមាន និងអ្នកក្រដូចគ្នាទេ ។ ក្នុងរយៈពេលមួយខែដែលប្រជាជនអាមេរិកចំនួន ២២ លាននាក់បាត់បង់ការងារធ្វើ មហាសេដ្ឋីអាមេរិកបែរជារកចំណូលបានបន្ថែមប្រមាណ ១០% ទៅវិញ ដែលស្មើ ២៨២ប៊ីលានដុល្លារ ។
ជាដំបូង ក្រុមអ្នកមានជួបនឹងឧបសគ្គពេលដែលទីផ្សារភាគហ៊ុនអាមេរិកធ្លាក់ចុះយ៉ាងខ្លាំង ។ ពេលនោះ បុរសដែលមានទ្រព្យសម្បត្តិច្រើនជាងគេលើលោកគឺ ជេហ្វ បេសូស (Jeff Bezos) មើលឃើញទ្រព្យសម្បត្តិខ្លួនធ្លាក់មកស្មើ ១០៥ប៊ីលានដុល្លារកាលពីថ្ងៃទី ១២ខែមិនា ។ ប៉ុន្តែនៅថ្ងៃទី ១៥ ខែមេសាកន្លងមកនេះ ទ្រព្យសម្បត្តិសរុបរបស់លោកបានកើនឡើង ២៥ប៊ីលានដុល្លារ ។
ជាមួយគ្នានេះដែរ លោក អេរិក យាន់ (Eric Yuan) ដែលជាស្ថាបនិក និងនាយកប្រតិបត្តិរបស់ក្រុមហ៊ុន Zoom ស្ថិតក្នុងចំណោមក្រុមមនុស្សដែលរកចំណូលបានជាច្រើនបន្ទាប់ពីការផ្ទុះជំងឺខាងលើ ។
យោងទៅតាមវិទ្យាស្ថាន Institute for Policy Studies បានឲ្យដឹងថា អ្នកដែលរកលុយបានបន្ទាប់ពីការផ្ទុះជំងឺកូវីដ ១៩ ភាគច្រើនជាមនុស្សដែលមកពីក្រុមអ្នកប្រាជ្ញដែលមានគំនិតឈានមុខអ្នកដទៃ ។ យោងទៅតាមរបាយការណ៍របស់វិទ្យាស្ថានខាងលើបានឲ្យដឹងទៀតថា មហាសេដ្ឋីដែលរកចំណូលបានពីកូវីដ ១៩ ភាគច្រើនមកពីពួកគេចេញសកម្មភាពក្នុងពេលល្អ ។
វិទ្យាស្ថានខាងលើធ្លាប់បានចង្អុលបង្ហាញឲ្យដឹងដែរថា បន្ទាប់ពីវិបត្តិហិរញ្ញវត្ថុកាលពីឆ្នាំ ២០០៨ មហាសេដ្ឋីអាចរកទ្រព្យសម្បត្តិមកស្មើកម្រិតដូចដើមវិញក្នុងរយៈពេល ៣០ខែ ប៉ុណ្ណោះ ប៉ុន្តែនៅឆ្នាំ ២០១៩ មនុស្សដែលមានជីវភាពមធ្យមក្នុងសហរដ្ឋអាមេរិកនៅមិនទាន់ក្រោកឈរបានរួចរាល់ពីវិបត្តិសេដ្ឋកិច្ចនោះផង ។
សម្រាប់ប្រជាជនរាប់លាននាក់ដទៃដែលកំពុងជួបការលំបាកក្នុងការបង់ថ្លៃជួលផ្ទះ ទិញម្ហូបអាហារ និងព្យាយាមឆ្លងផុតស្ថានការនេះ អ្នកស្រាវជ្រាវមកពីវិទ្យាស្ថានខាងលើបានឲ្យដឹងថា កូវីដ ១៩ កំពុងតែឆ្លុះបញ្ចាំងពីវិសមភាពដ៏ធំរវាងអ្នកមាននិងអ្នកក្រក្នុងសង្គម ៕
ចែករំលែកព័តមាននេះ