រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៤ មេសា នេះ បានប្រកាសសាលក្រមផ្តន្ទាទោសលើសំណុំរឿងបទបង្ញរូបភាព និងសម្ភារអាសអាភាស សម្រេចដាក់ពន្ធនាគារលើជនជាប់ចោទកំណត់៦ខែ ប៉ុន្តែតម្រូវឲ្យអនុវត្តទោសក្នុងពន្ធនាគារត្រឹម២ខែ១៥ថ្ងៃ ទោសនៅសល់ប៉ុន្មានត្រូវព្យួរទាំងអស់ ។ សាលក្រមបានទុកពេលឲ្យជនជាប់ចោទប្តឹងឧទ្ធរណ៍តាមកំណត់ច្បាប់ ។ ជនជាប់ចោទឈ្មោះ វ៉ែន រចនា ហៅថៃ ស្រីនាង ភេទស្រី អាយុ៣៩ឆ្នាំ ។
សូមរំលឹកថា សាលាដំបូងរាជធានីភ្នំពេញ កាលពីព្រឹកថ្ងៃទី៣ មេសា ឆ្នាំ២០២០ បានលើកយកសំណុំអ្នកស្រី វ៉ែន រចនា ហៅ ស្រីនាង ដែលគេស្គាល់ថា ជាអ្នកលក់ផលិតផលតាមអនឡាយ ដែលបង្ហោះរូបភាពរបៀបសិចស៊ី អាសអាភាស មកបើកសវនាការ ដើម្បីផ្តន្ទាទោសលើជនត្រូវចោទ ។ ប៉ុន្តែនៅពេលសវនាការសាកសួរដេញដោល លើជនជាប់ចោទចប់សព្វគ្រប់ ហើយ ចៅក្រមជំនុំជម្រះបានលើកពេលប្រកាសសាលក្រម ផ្តន្ទាទោសលើជនជាប់ចោទទៅថ្ងៃទី២៤ ខែមេសា ឆ្នាំ២០២០ ខាងមុខនេះ ។
សវនាការនោះមានការដឹកនាំដោយលោក កិត សុជាតិ ចៅក្រមជំនុំជម្រះ នៃសាលាដំ បូងរាជធានីភ្នំពេញ នឹងលោក សុក កែវបណ្ឌិត ព្រះរាជអាជ្ញារង ជាតំណាងអយ្យការ ដែលមានជនជាប់ចោទឈ្មោះ វ៉ែន រចនា ហៅ ថៃ ស្រីនាង ស្ថិតក្នុងរង្វង់ក្រចកសេះ បានរងនូវការចោទប្រកាន់ពីបទ.បង្ហាញរូបភាព និងសម្ភារៈអាសអាភាស ដែលបទល្មើសនេះយោងតាមមាត្រា៣៨ មាត្រា៣៩ កថាខណ្ឌទី៣ នៃច្បាប់ស្តីពីការធ្វើអាជីវកម្មផ្លូវភេទ នឹងមាត្រា២៤៩ បទ.បង្ហាញកេរ្ត៌ភេទ ។ នៅចំពោះមុខសវនាការជន ជាប់ចោទ ថៃ ស្រីនាង បានសារភាពថា នាងពិតជាបានធ្វើខុសច្បាប់ និងទំនៀមទំលាប់ប្រពៃណីខ្មែរពិតមែន ហើយនាងសូមទទួលស្គាល់នូវអំពើដែលខ្លួនបានធ្វើ ប៉ុន្តែសុំឲ្យតុលាការមេត្តាអព្យាស្រ័យ និងបន្ធូបន្ថយទោសចំពោះកំហុសឆ្គងដល់រូបនាងជាជនជាប់ចោទផងដែរ ។
សូមរំលឹកថា នាព្រឹកថ្ងៃទី២១ ខែកុម្ភៈ ឆ្នាំ២០២០ លោក គុជ គឹមឡុង ព្រះ រាជអាជ្ញារអមសាលាដំបូងរាជធានីភ្នំពេញ ដែលកាន់សំណុំរឿងនេះ បានស ម្រេចធ្វើការចោទប្រកាន់លើជនសង្ស័យជាផ្លូវការ ។ លោក គុជ គឹមឡុង ព្រះរាជអាជ្ញារង នឹងជាអ្នកនាំពាក្យសាលាដំបូងរាជធានីភ្នំពេញ បានថ្លែងឲ្យដឹងថា ក្រោយពីតំណាងអយ្យការបើកការសាកសួរជនសង្ស័យ វ៉ែន រចនា ហៅ ថៃ ស្រីនាង ត្រូវបានសម្រេចធ្វើការចោទប្រកាន់ពីបទ.បង្ហាញរូបភាព និងសម្ភារៈអាសអាភាស តាមមាត្រា៣៨ និងមាត្រា៣៩ ច្បាប់ស្តីពីការធ្វើអាជីវកម្មផ្លូវភេទ នឹងមាត្រា២៤៩ នៃក្រមព្រហ្មទណ្ឌ ច្បាប់ស្តីពីការបង្ហាញកេរ្ត៍ភេទដែលនាំឲ្យអ្នកដ៏ទៃមើលឃើញ នៅក្នុងទីកន្លែងមួយដែលសាធារណៈជនអាចមើលឃើញ ដែលបទល្មើសនេះតម្រូវឲ្យផ្តន្ទាទោលើជនជាប់ចោទ ដាក់ពន្ធនាគារចាប់ពី ១ខែ ទៅ១ឆ្នាំ ។ បន្ទាប់ពីតំណាងអយ្យការចោទបានធ្វើប្រកាន់ជាផ្លូវការហើយ សំណុំរឿងនេះបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន នៅរសៀលថ្ងទី២១ ខែកុម្ភៈ ។
សូមបញ្ជាក់ទៀតថា នៅថ្ងៃទី១៨ ខែកុម្ភៈ ឆ្នាំ២០២០ ឈ្មោះ ថៃ ស្រីនាង ត្រូវបានកម្លាំងសមត្ថកិច្ចនគរបាលខណ្ឌទួលគោក នាំខ្លួនទៅធ្វេីការអប់រំ ណែនាំ និងឲ្យធ្វេីកិច្ចសន្យាចំពោះមុខ ដើម្បីទទួលកំហុសឆ្គង ដែលគេបានផុសរូបភាព និងវីដេអូខ្លីប តាមសង្គមហ្វេសប៊ុក ធ្វេីឲ្យប៉ះពាល់ដល់ទំនៀមទំលាប់ប្រពៃណីខ្មែរ ជាពិសេសធ្វើប៉ះពាល់យ៉ាងធ្ងន់ធ្ងរដល់កិត្តិយសរបស់ស្ត្រីទៀតផង ។ ជនសង្ស័យបានយល់ព្រមថតជាវីដេអូឡាយ ដេីម្បីសុំទោសសាធារណ:ជន នូវកំហុសខុសឆ្គងទាំងឡាយនោះ ។ បន្ទាប់ពីធ្វេីកិច្ចសន្យា និងសារភាពកំហុសរួចហើយ វេលាម៉ោង១១ នឹង ៣០ នាទីព្រឹកសមត្តកិច្ចបានអនុញ្ញាតអ្នកស្រីត្រឡប់ទៅផ្ទះវិញ ។
លុះស្រាប់តែម៉ោង២ នឹង៣៥នាទីរសៀលថ្ងៃដដែលនោះ ជនសង្ស័យ ថៃ ស្រីនាង នៅតែមិនរាងចាល ថែមទាំងផុសរូបអាក្រាតកាយ ស្លៀកពាក់សល់តែអាវទ្រនប់ នឹងខោលីអូ បង្ហោះឌឺដងថែមទៀត ។ ដោយយល់ឃើញជនសង្ស័យនៅតែប្រព្រឹត្តបទល្មើស ម្តងហើយម្តងទៀតមិនគោរពកិច្ចសន្យា លោក កែវ សុធា ព្រះរាជអាជ្ញា អមសាលាដំបូងរាជធានីភ្នំពេញ បានបញ្ជាឲ្យកម្លាំងមានសម្តកិច្ចធ្វើការឃាត់ខ្លួនជនសង្ស័យ នឹងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់តែម្តងទៅ ។ មហាជនបាន និងកំពុងរង់ចាំមើលតើវាសនាតារា ហ្វេសប៊ុក ផ្សាយលក់ផលិតផលតាមអនឡាញ បង្ហាញរូបភាពសិចស៊ីលេចលើលេចក្រោមនេះ មានទោសប៉ុន្មានខែប៉ុន្មានថ្ងៃ ?
ចែករំលែកព័តមាននេះ