ចិន ៖ ប្រទេសចិនបរិច្ចាគថវិកាចំនួន ៣០លានដុល្លារបន្ថែមទៀតដល់អង្គការសុខភាពពិភពលោក (WHO) ដើម្បីគាំទ្រដល់ការប្រឆាំងនឹងការឆ្លងរាតត្បាតពីសំណាក់ជម្ងឺកូវីដ១៩។ នេះបើយោងតាមសារបង្ហោះលើ Twitter របស់អ្នកនាំពាក្យក្រសួងការបរទេស លោកស្រី…
ចិន ៖ ប្រទេសចិនបរិច្ចាគថវិកាចំនួន ៣០លានដុល្លារបន្ថែមទៀតដល់អង្គការសុខភាពពិភពលោក (WHO) ដើម្បីគាំទ្រដល់ការប្រឆាំងនឹងការឆ្លងរាតត្បាតពីសំណាក់ជម្ងឺកូវីដ១៩។ នេះបើយោងតាមសារបង្ហោះលើ Twitter របស់អ្នកនាំពាក្យក្រសួងការបរទេស លោកស្រី Hua Chunying កាលពីថ្ងៃព្រហស្បត្តិ៍។
លោកស្រី Chunying បានសរសេរនៅលើបណ្តាញសង្គម Twitter ថា៖ «ប្រទេសចិនបានសម្រេចចិត្តបរិច្ចាគថវិកាចំនួន ៣០លានដុល្លារបន្ថែមទៀត ដល់អង្គការសុខភាពពិភពលោក ដើម្បីគាំទ្រដល់ការប្រយុទ្ធជាសកលរបស់ខ្លួនប្រឆាំងនឹងជម្ងឺកូវីដ១៩ ជាពិសេសពង្រឹងប្រព័ន្ធសុខាភិបាលរបស់ប្រទេសកំពុងអភិវឌ្ឍន៍»។
លោកស្រីបានបន្ថែមទៀត ថាកន្លងមកប្រទេសចិនបានបរិច្ចាគថវិកាចំនួន ២០លានដុល្លារដល់អង្គការសុខភាពពិភពលោកកាលពីថ្ងៃទី១១ ខែមីនា។
កាលពីសប្តាហ៍មុន ប្រធានាធិបតីអាមេរិក លោក Trump បានប្រកាសថា លោកនឹងបញ្ឈប់ការផ្តល់មូលនិធិដល់អង្គការសុខភាពពិភពលោក ដោយនិយាយថា អង្គការនេះមិនអាចគ្រប់គ្រងការរីករាលដាលបានត្រឹមត្រូវ។
គួរបញ្ជាក់ផងដែរថា ប្រទេសចិនបានចូលរួមវិភាគទាននិងវិភាគទានស្ម័គ្រចិត្តជិត ៨៦លានដុល្លារក្នុងវដ្តនៃការផ្តល់មូលនិធិរយៈពេល ២ឆ្នាំ ពីឆ្នាំ២០១៨ ដល់ ឆ្នាំ២០១៩៕ (យោងតាមប្រភពពី edition.cnn.com)
ចែករំលែកព័តមាននេះ