រាជធានីភ្នំពេញ ៖ គម្រោងសម្តែងល្ខោនខោលដ៏ធំនាចុងឆ្នាំ២០២០នេះ អាចនឹងត្រូវលើកពេលទៅឆ្នាំក្រោយ ដោយសារការរីករាលដាលនៃជំងឺកូវីដ១៩ ក្នុងប្រទេសកម្ពុជា និងនៅទូទាំងសកលលោក ខណៈពេលដែលមូលនិធិប្រមូលថវិកា១០០០រៀលពីសប្បុរសជននៅតែបន្តធ្វើដដែល។ នេះបើតាមការអះអាងរបស់លោក ស៊ុប ស័ក្ខរា នាយកសាលសិល្បៈហ្វូណន និងជាសមាជិកមួយរូបដែលជាអ្នកផ្ជុងផ្តើមការសម្តែងល្ខោនខោលដ៏ធំនេះ ប្រាប់កោះសន្តិភាពឱ្យដឹង កាលពីថ្ងៃទី២៣ ខែមេសា ឆ្នាំ២០២០នេះ តាមសារអេឡិចត្រូបនិច។
លោកបញ្ជាក់ថា តាមគម្រោងព្រឹត្តិការណ៍សម្តែងល្ខោនខោលដ៏ធំនេះ គ្រោងនឹងធ្វើឡើងនៅបំណាច់ឆ្នាំ២០២០នេះ ប៉ុន្តែដោយសារការរីករាលដាលនៃជំងឺកូនវីដ១៩ នាពេលនេះ កម្មវិធីរបស់យើងអាចនឹងលើកពេលទៅសម្តែងនៅឆ្នាំក្រោយ ក្នុងពេលដែលរហូតមកទល់ពេលនេះមូលធិនិទទួលថវិកាសប្បុរសជននានានៅតែបន្តធ្វើ។
លោកបានលើកឡើងបន្តថា បើទោះបីជាការសម្តែងល្ខោនខោលដ៏ធំនេះ ត្រូវបានលើកពេលក៏ដោយ ប៉ុន្តែប្រសិនបើស្ថានភាពជំងឺកូវីដ១៩នៅកម្ពុជាអាចមានភាពប្រសើរឡើងវិញនោះ យើងក៏នឹងរៀបចំកម្មវិធីសម្តែងតូចមួយនៅចំថ្ងៃដដែលនោះ សម្រាប់មហាជនទស្សនា ហើយក៏ឆ្លៀតពេលប្រកាសពីការពន្យាពេលការសម្តែងដ៏ធំរបស់យើងនៅឆ្នាំក្រោយ។
បើតាមលោក ស៊ុប ស័ក្ខរា ថា រហូតមកដល់បច្ចុប្បន្នសម្រាប់មូលនិធិ១០០០រៀល សម្រាប់រ៉ៃអង្គាសថវិកាទ្រទ្រង់ការសម្តែងល្ខោនខោលដ៏ធំនេះ គឺយើងទទួលបានមួយចំណែកតូចប៉ុណ្ណោះ ប៉ុន្តែយ៉ាងណា យើងនៅតែបន្តទទួលក្នុងពេលដែលយើងទទួលបានការគាំទ្រច្រើនផងដែរពីមហាជន។
ជាការកត់សម្គាល់ កន្លងមក លោក ស៊ុប ស័ក្ខរា ធ្លាប់បានលើកឡើងថា គម្រោងរៃអង្គាសថវិកាសប្បុរសធម៌ចំនួន១ពាន់រៀលពីប្រជាពលរដ្ឋម្នាក់ នៅទូទាំងប្រទេសសម្រាប់ទ្រទ្រង់ការសម្តែងនាពេលនេះ គឺបង្ហាញពីការសាមគ្គីភាព អំពីការផ្តល់សេចក្តីស្រឡាញ់ចូលរួម ដើម្បីជីវិតល្ខោនខោល។
លោកបញ្ជាក់ថា បន្ទាប់ពីមានការប្រកាសរៃអង្គាសថវិកានេះផងឃើញថា មានប្រជាពលរដ្ឋជាច្រើនបានគាំទ្រ ប៉ុន្តែលោកមិនទាន់អាចបញ្ជាក់បានពីតួលេខនៃចំនួនអ្នកដែលបានចូលរួម និងថវិកាដែលទទួលបាននាពេលនេះឡើយ ដោយអ្វីៗកំពុងតែដំណើរការទៅមុខ។ លោកបន្ថែមថា តាមគម្រោងយើងត្រូវការថវិកាប្រមាណ១លានដុល្លារ ដែលថវិកាទាំងនោះត្រូវបានបែងចែកទាំងការសម្តែង និងការបញ្ជៀបទម្រង់ល្ខោនខោលទៅកាន់មហាវិទ្យាល័យចំនួន៣០នៅក្នុងប្រទេសកម្ពុជា។
លោកបានឲ្យដឹងទៀតថា គម្រោងសម្តែងលោ្ខនខោលដ៏ធំរបស់យើងបានគ្រោងសម្តែងនៅចុងខែធ្នូ ឆ្នាំ២០២០ នៅស្តាតចាស់ ឬនៅកោះពេជ្រ ខណៈពេលយើងរំពឹងថា ការចូលទស្សនាពីសំណាក់ទស្សនិកជនអាចមានដល់រាប់ម៉ឺននាក់ ក្នុងនោះយើងបានរៀបចំសិល្បករចូលរួមសម្តែងប្រមាណ២០០នាក់។
ទោះជាយ៉ាងណា បើទោះបីជាការសម្តែងព្រឹត្តិការណ៍ល្ខោនខោលដ៏ធំនេះ ត្រូវបានលើកពេលក៏ដោយ ប៉ុន្តែលោកនៅតែរំពឹងថា សប្បុរសជនទាំងអស់នឹងនៅតែគាំទ្រ ចូលរួមបរិច្ចាគថវិកា១០០០រៀលក្នុងម្នាក់ ដើម្បីទ្រទ្រង់ការសម្តែង ក៏ដូចជាការចូលរួមលើកស្ទួយ និងថែរក្សាសិល្បៈបុរាណដូចតាខ្មែរឲ្យបានគង់វង្សកុំឲ្យបាត់បង់៕ (កែសម្រួលដោយ ៖ បុប្ផា)
ចែករំលែកព័តមាននេះ