ក្របខ័ណ្ឌកំពូលប្រចាំទ្វីបអឺរ៉ុប Champions League និង Europa League ទំនងជាត្រូវត្រឡប់មកកាន់ការប្រកួតវិញនៅក្នុងខែសីហា បន្ទាប់ពីមានការពិភាក្សាបន្ថែមទៀតអំពីបញ្ហាដែលនៅសេសសល់នៃរដូវកាល ២០១៩-២០ កាលពីថ្ងៃពុធ…
ក្របខ័ណ្ឌកំពូលប្រចាំទ្វីបអឺរ៉ុប Champions League និង Europa League ទំនងជាត្រូវត្រឡប់មកកាន់ការប្រកួតវិញនៅក្នុងខែសីហា បន្ទាប់ពីមានការពិភាក្សាបន្ថែមទៀតអំពីបញ្ហាដែលនៅសេសសល់នៃរដូវកាល ២០១៩-២០ កាលពីថ្ងៃពុធ ។
សហព័ន្ធកីឡាបាល់ទាត់ទ្វីបអឺរ៉ុប (UEFA) បានប្រាប់សមាគមជាសមាជិកទាំង៥៥កាលពីថ្ងៃអង្គារថា ការប្រកួតក្របខ័ណ្ឌទាំង ២ នៅតែមានលទ្ធភាពសម្រាប់ការប្រកួតដែលត្រូវបានលេងពេញមួយខែក្នុងចំណោមខែមិថុនា កក្កដា និងសីហា ។
ក្នុងនោះបើយោងតាមការចុះផ្សាយពីគេហទំព័រ BBC បានឲ្យដឹងថា កិច្ចពិភាក្សាចុងក្រោយ បានលើកនិយាយអំពីផែនការដើម្បីបញ្ចប់បាល់ទាត់លីគក្នុងស្រុកទាំងអស់ត្រឹមថ្ងៃទី ៣១ ខែ កក្កដា ហើយការប្រកួតក្របខ័ណ្ឌអឺរ៉ុបទាំង ២ នឹងធ្វើឡើងបន្ទាប់ក្នុងខែ សីហា ។
វាមិនទាន់មានការប្រកាសជាផ្លូវការនៅឡើយទេ ប៉ុន្តែ UEFA ចង់បានការសម្រេចចិត្តច្បាស់លាស់មួយយ៉ាងឆាប់រហ័សបំផុត តាមដែលអាចធ្វើទៅបាន ។
បើក្រឡេកមកមើលក្របខ័ណ្ឌ Premier League នៅសល់ការប្រកួតចំនួន ៩ ជុំទៀត ប៉ុន្តែនៅប្រទេសអេស្ប៉ាញ La Liga និងអុីតាលី Serie A ដែលរងផលប៉ះពាល់យ៉ាងធ្ងន់ធ្ងរដោយសារវីរុសកូវីដ១៩ នៅមានការប្រកួតចំនួន១១ និង១២ជុំបន្តទៀត ។
UEFA សង្ឃឹមថាស្ថានភាពនឹងកាន់តែច្បាស់លាស់នៅពីរសប្តាហ៍ក្រោយ ប៉ុន្តែការបញ្ចប់រដូវកាលតាមរបៀបនេះ វានឹងបណ្តាលឱ្យមានការរំខានតិចតួចបំផុតចំពោះការប្រកួតជម្រុះសម្រាប់ក្របខ័ណ្ឌកំពូលអឺរ៉ុបទាំង២នៅរដូវកាលក្រោយ ដែលត្រូវបានរំពឹងថានឹងចាប់ផ្តើមនៅចុងខែមិថុនា ឆ្នាំ ២០២០ ប៉ុន្តែត្រូវបានពន្យារពេលដោយគ្មានកំណត់ ៕
ចែករំលែកព័តមាននេះ