ប្រពន្ធទី8របស់តាកុងសែត្បូងបដិសេធការចោទសម្លា.ប់ប្តី
- ប៉ៃលិន
ខេត្តប៉ៃលិន ៖ ស្ត្រីម្នាក់ឈ្មោះ អេង សារឿន អាយុ៥៤ឆ្នាំ ដែលជាប្រពន្ធទី៨ រស់នៅភូមិវត្ត សង្កាត់ប៉ៃលិន ក្រុងប៉ៃលិនបានសម្តែងការហួសចិត្តយ៉ាងខ្លាំង…
ខេត្តប៉ៃលិន ៖ ស្ត្រីម្នាក់ឈ្មោះ អេង សារឿន អាយុ៥៤ឆ្នាំ ដែលជាប្រពន្ធទី៨ រស់នៅភូមិវត្ត សង្កាត់ប៉ៃលិន ក្រុងប៉ៃលិនបានសម្តែងការហួសចិត្តយ៉ាងខ្លាំង ខណ:ពេលឃើញលិខិតអញ្ជើញចំនួន២ច្បាប់ដែលចេញដោយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តប៉ៃលិន កាលពីខែមីនា និងខែមេសា ឆ្នាំ២០២០នេះ ឱ្យគាត់ចូលបំភ្លឺពាក់ព័ន្ធនឹងបណ្តឹងរបស់ស្ត្រីម្នាក់ឈ្មោះ លីម គា ហៅម៉ី អាយុ៣៨ឆ្នាំ ជាប្រពន្ធទី៧ ដែលប្តឹងចោទប្រកាន់ពីបទធ្វើឃាតលើបុរសចំណាស់ជាប្តីឈ្មោះងិន មេង អាយុ៦៩ឆ្នាំ ដែលបានស្លាប់ កាលពីថ្ងៃទី១៧ ខែមីនា ឆ្នាំ២០២០ ដោយសាររោគាពាធ កាលពីពេលកន្លងមកនេះ ។
បើតាមប្រភពព័ត៌មានពីស្ត្រីឈ្មោះ អេង សារឿន ដែលជាប្រពន្ធទី៨ បានរៀបរាប់ឱ្យដឹងថា កាលពីជាង៣ឆ្នាំមុន ស្ត្រីឈ្មោះ លីម គា ហៅម៉ី ជាប្រពន្ធទី៧ បានឈ្លោះទាស់ទែងជាមួយប្តី រួចបានធ្វើលិខិតលែងលះគ្នានៅសង្កាត់ប៉ៃលិនដាច់ស្រេចអស់ហើយ ថែមទាំងទៅយកប្តីម្នាក់ទៀត និងមករស់នៅក្នុងផ្ទះល្វែង៥បន្ទប់ ដែលគាត់ចែកឱ្យ រួមជាមួយនឹងដីចំនួន២ប្លង់ថែមទៀត ។ ការបានគ្នាជាប្រពន្ធប្តីទី៨នេះ ខណៈបុរសចំណាស់ពោះម៉ាយជាប្តីបានពឹងចាស់ទុំក្នុងភូមិស្តីដណ្តឹងគាត់ ប្រពន្ធទី៨ ដែលជាស្ត្រីមេម៉ាយ រួចក៏ធ្វើការសែនព្រេនតាមផ្លូវច្បាប់មករស់នៅផ្ទះរបស់គាត់ រួចក្រោយមកប្តីចំណាស់នេះ ក៏នាំគាត់ទៅធ្វើសំបុត្រអាពាហ៍ពិពាហ៍ជាមួយគ្នា កាលពីថ្ងៃទី១៥ ខែសីហា ឆ្នាំ២០១៨ ។
ប្រភពបន្តទៀតថា ដោយខ្លាចក្រែងប្រពន្ធទី៧បន្តរករឿង ទើបគាត់មានគំនិតធ្វើលិខិតផ្ទេរទ្រព្យសម្បត្តិផ្ទះធំដែលស្នាក់នៅនឹងផ្ទះជួល៤បន្ទប់ និងសម្ភារដែលនៅសេសសល់ទាំងអស់ ឱ្យមកគាត់ជាប្រពន្ធទី៨ កាលពីថ្ងៃទី៤ មករា ឆ្នាំ២០២០ ដោយមានសាក្សី និងមេភូមិទទួលស្គាល់ ។ ប៉ុន្តែរឿងរ៉ាវក៏នៅតែចៀសមិនផុត ខណៈគាត់ជាប់រវល់ទៅផ្សារទិញម្ហូបអាហារ ស្រាប់តែមានស្រីម្នាក់ បានដាក់ថ្នាំបំពុលប្តីរបស់គាត់ ដោយយកអស់ខ្សែក.មាសទម្ងន់១តម្លឹង២ជី១ខ្សែ ខ្សែដៃមាស១ខ្សែ និងចិញ្ចៀនពេជ្រ១វង់ផងដែរ និងធ្វើឱ្យគាត់សន្លប់អស់រយ:ពេល៧យប់៧ថ្ងៃនៅក្នុងមន្ទីរពេទ្យ ។ លុះពេលជាសះស្បើយរួចមក គាត់បានក្លាយទៅជាមនុស្សបាត់បង់ស្មារតី និងមានការវង្វេងជាញឹកញាប់ ជួនកាលដើរដួល និងធ្លាក់ប្រឡាយជាច្រើនដង ដោយសារឥទ្ធិពលថ្នាំបំពុលនោះ ។
ស្ត្រីដែលជាប្រពន្ធទី៨បានរំលឹកថា ពេលគាត់រវល់ទៅទិញម្ហូប បានចាក់សោប្តី ឱ្យនៅក្នុងបន្ទប់ ស្រាប់តែមានគេថតសកម្មភាពរបស់គាត់បង្ហោះពេញបណ្តាញសង្គមហ្វេសប៊ុកថា គាត់បានចាក់សោ ឃុំឃាំងប្តីខុសច្បាប់ បង្អត់អាហាររវល់ទៅលេងល្បែង ដែលធ្វើឱ្យមហាជនមានការយល់ច្រឡំយ៉ាងខ្លាំង ហើយវីដេអូដែលគេលួចថតបង្ហោះនោះក៏នៅតែមានអ្នកបន្តចែករំលែក(Share) រហូតមកដល់ពេលនេះផងដែរ ។ គាត់អះអាងថា ប្លង់ផ្ទះទាំងអស់ គឺមិនមានប្លង់ណាមួយ នៅក្នុងដៃរបស់គាត់នោះទេ គឺប្រពន្ធទី៧គេយកទុកទាំងអស់ ទោះបីជាគាត់ទាមទារយ៉ាងណា ក៏គេមិនឱ្យដែរ ដូច្នេះគាត់កំពុងតែរកមេធាវីឱ្យជួយដល់រឿងក្តីមួយនេះផងដែរ ។
ទាក់ទិនការចោទប្រកាន់គ្នារវាងប្រពន្ធទី៧ និងទី៨ ស្ត្រីម្នាក់ឈ្មោះ មេង គឹមឡាង ជាកូនទី៣ របស់ប្រពន្ធទី១ បានរៀបរាប់ឱ្យដឹងថា ឪពុករបស់គាត់ ពិតជាបានប្រគល់ទ្រព្យសម្បត្តិទាំងអស់ដែលនៅសេសសល់ទាំងប៉ុន្មានឱ្យទៅប្រពន្ធទី៨ ពិតប្រាកដមែន ថែមទាំងធ្វើលិខិតផ្ទេរ មុនពេលគាត់ស្លាប់ថែមទៀតផង ។ ប៉ុន្តែ ក្រោយមកស្រាប់តែប្រពន្ធទី៧ ដែលចុះចោលឪពុករបស់គាត់រត់ទៅយកប្តីក្មេងម្នាក់ទៀត ហើយមករស់នៅលើផ្ទះដែលឪពុកខ្លួនចែកឱ្យ បែរជាជំទាស់ទៅវិញ ថែមទាំងប្តឹងនគរបាលចោទពីរឿងធ្វើឃាតផងដែរ។ ដូច្នេះក្នុងនាមគាត់ជាកូនដែរ មិនសុខចិត្តនោះទេ ហើយក៏មិនព្រមឱ្យទ្រព្យសម្បត្តិទាំងនេះបានទៅស្ត្រីដែលចុះចោលឪពុករបស់ខ្លួននោះឡើយ ។
កូនស្រីប្រពន្ធទី១(ដើម) បានអះអាងថា ស្ត្រីជាប្រពន្ធទី៨ បានមើលថែទាំឪពុករបស់ខ្លួន ផ្តល់ទឹកក្តៅទឹកត្រជាក់រហូតដល់គាត់ស្លាប់ ដូច្នេះទ្រព្យសម្បត្តិទាំងនេះ ត្រូវតែបានចំណែកទៅលើគាត់ដែរ ។ ពាក់ព័ន្ធនឹងបញ្ហាគេចោទថាស្ត្រីប្រពន្ធទី៨ឃុំឃាំងប្តីខុសច្បាប់ និងធ្វើឃាតបុរសចំណាស់ជាប្តីនោះ លោក យ៉ែម សារិទ្ធ អធិការនគរបាលក្រុងប៉ៃលិន បានបំភ្លឺឱ្យដឹងកាលពីរសៀលថ្ងៃទី២១ ខែមេសា ២០២០នេះថា សូមកុំសូវជឿទៅលើបណ្តាញសង្គមខ្លាំងពេក ព្រោះគេថតវីដេអូបុរសចំណាស់ខាងលើកាលពីគាត់នៅរស់ គឺពេលនោះគាត់វង្វេងស្មារតីព្រោះមានជំងឺ ខណ:ប្រពន្ធទៅទិញម្ហូបអាហារ នៅផ្សារ បើមិនចាក់សោឱ្យគាត់នៅក្នុងផ្ទះទេ គាត់នឹងដើរចេញពីផ្ទះ វង្វេងទៅកន្លែងផ្សេងៗ អាចនឹងធ្លាក់ប្រឡាយ ធ្លាក់លូឈ្លក់ទឹកស្លាប់ជាក់ជាមិនខាន ព្រោះបញ្ហាបែបនេះធ្លាប់កើតឡើងជាញឹកញាប់មកហើយ ។
លោកបន្តទៀតថា ចំពោះការស្លាប់របស់បុរសចំណាស់មានប្រពន្ធដល់ទៅ៨នាក់ គឺដោយសាររោគាពាធ ព្រោះក្រោយពេលស្លាប់ភ្លាមខាងប៉ុស្តិ៍ប៉ៃលិន និងខាងគ្រូពេទ្យបានចុះទៅធ្វើកោសល្យវិច័យដែរ ឃើញថា មិនមានករណីឃាតកម្មអ្វីនោះទេ ។ ពាក់ព័ន្ធនឹងពាក្យបណ្តឹងចោទថា ស្ត្រីប្រពន្ធទី៨ធ្វើឃាតប្តី លោក អ៊ុំ សាឡន ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តប៉ៃលិន បានឱ្យដឹងកាលពីវេលាម៉ោង៨និង៤៣នាទីព្រឹកថ្ងៃទី២២ ខែមេសា ឆ្នាំ២០២០នេះថា បន្ទាប់ពីបានទទួលពាក្យបណ្តឹងពីស្ត្រីជា ប្រពន្ធទី៧នេះ ខាងលោកក៏បានសុំគោលការពីសាលាដំបូង ដោយដឹកនាំកម្លាំងនគរបាល ចុះទៅស៊ើបអង្កេតបឋម ករណីការស្លាប់របស់ លោក ងិន មេង ហៅតាឡេង ដោយមិនទាន់ទទួលបាននូវលទ្ធផលយ៉ាងណានៅឡើយនោះទេ ហើយខាងលោកក៏បានបញ្ជូនសំណុំរឿងនេះ ទៅអយ្យការអមសាលាដំបូងខេត្តប៉ៃលិនឱ្យចាត់ការបន្តទៅតាមនីតិវិធី ។
ពាក់ព័ន្ធករណីខាងលើនេះកោះសន្តិភាពបានស្វែងរកការបំភ្លឺពីស្ត្រីប្រពន្ធទី៧ ដែលបានលែងលះគ្នាទៅហើយ បានឱ្យដឹងថា ដោយមានការសង្ស័យថា ស្ត្រីប្រពន្ធទី៨ អាចនឹងជាប់ពាក់ព័ន្ធការស្លាប់របស់អតីតប្តីគាត់ ទើបគាត់ដាក់ពាក្យបណ្តឹងឱ្យនគរបាលចុះស៊ើបអង្កេត ព្រោះមុនពេលស្លាប់ឃើញគាត់ដើរធម្មតា និងហូបបាយដែលគាត់បញ្ចុកធម្មតាដែរ ស្រាប់តែនៅវេលាម៉ោង២រសៀលឃើញគាត់ស្លាប់ទើបមានការសង្ស័យ បើមិនពិតក៏មិនជាបញ្ហា អ្វីដែរ ។
លោក ងិន មេង ហៅតាឡេង ដែលស្លាប់ទៅបន្សល់ទុកជម្លោះដណ្តើមទ្រព្យគ្នានេះ គឺជាអតីតកុងសែត្បូងល្បីឈ្មោះម្នាក់នៅប៉ៃលិន ។ គាត់ក៏ជាម្ចាស់ដីធ្លីច្រើនកន្លែងផងដែរ ។ ទោះបីគាត់មានប្រពន្ធដល់ទៅ៨នាក់ក្តី តែគាត់មានកូនតែ៣នាក់ប៉ុណ្ណោះ គឺប្រុសម្នាក់ ស្រី២នាក់ ដែលជាកូនជាមួយប្រពន្ធទី១ ដែលជាប្រពន្ធ ដើម បានស្លាប់ទៅហើយ ។ ចំណែកប្រពន្ធទី២រហូតដល់ទី៨នេះ មិនមានកូននោះទេ ដោយក្នុងចំណោមប្រពន្ធក្រោយទាំង៧នាក់នេះ ខ្លះយកគាត់ធ្វើប្តីព្រោះតែចង់បានទ្រព្យប៉ុណ្ណោះ ដោយខ្លះក៏លែងលះគ្នាវិញ និងខ្លះរត់ចោលគាត់ ក្រោយពីបានទ្រព្យដែលចែកឱ្យរួចហើយនោះដូចជាប្រពន្ធទី៧ ក៏បានចែកទ្រព្យឱ្យដែរ និងមានប្តីថ្មីទៅហើយដែរ ៕
ចែករំលែកព័តមាននេះ