រាជធានីភ្នំពេញ ៖ ការប្រកួតបាល់ទាត់ក្របខ័ណ្ឌលីគកំពូលកម្ពុជា រដូវកាល២០២០នេះ បានដំណើរការអស់ចំនួន៥ប្រកួតហើយ ខណៈបច្ចុប្បន្នត្រូវរាំងស្ទះដោយសារការរីករាលដាល នៃជំងឺឆ្លង COVID-19 ធ្វើឱ្យមានការពន្យារពេលការប្រកួត ឬប្រមូលផ្ដុំហ្វឹកហាត់ក្នុងទ្រង់ទ្រាយធំសម្រាប់ក្លិបទាំង១៣។…
រាជធានីភ្នំពេញ ៖ ការប្រកួតបាល់ទាត់ក្របខ័ណ្ឌលីគកំពូលកម្ពុជា រដូវកាល២០២០នេះ បានដំណើរការអស់ចំនួន៥ប្រកួតហើយ ខណៈបច្ចុប្បន្នត្រូវរាំងស្ទះដោយសារការរីករាលដាល នៃជំងឺឆ្លង COVID-19 ធ្វើឱ្យមានការពន្យារពេលការប្រកួត ឬប្រមូលផ្ដុំហ្វឹកហាត់ក្នុងទ្រង់ទ្រាយធំសម្រាប់ក្លិបទាំង១៣។
ជាមួយគ្នានេះ កីឡាករវ័យក្មេង៤រូប ត្រូវបានក្លិបផ្ដាច់កុងត្រារបស់ពួកគេ ដោយសារតែបំពាននឹងក្រមសីលធម៌ជាកីឡាករអាជីពក្នុងនោះរួមមាន ម៉ាត់ យ៉ាមីន, សេង កុសែន, ប្រាក់ សុវណ្ណពិសិដ្ឋ និង សឿង សុបញ្ញា។
ម៉ាត់ យ៉ាមីន គឺជាកីឡាកររបស់ក្លិបបឹងកេត អែហ្វស៊ី ដែលកាលពីដើមខែកុម្ភៈកន្លងទៅ ត្រូវបានក្លិបរបស់ខ្លួនប្រកាសជាផ្លូវការបញ្ឈប់កិច្ចសន្យារវាងភាគីទាំងពីរក្រោយពីខ្សែបម្រើកណ្តាលវ័យក្មេងរូបនេះ បានប្រព្រឹត្តកំហុសឆ្គងនឹងវិន័យក្លិប ។ កីឡាករ សេង កុសែន របស់ក្លិបភ្នំពេញក្រោន ក៏ត្រូវបានក្លិបប្រកាសពីការបញ្ឈប់កិច្ចសន្យានេះដូចគ្នាផងដែរ។
ក្នុងបរិបទដូចគ្នានេះដែរ កាលពីថ្ងៃទី១៧ ខែមេសា ឆ្នាំ២០២០ ថ្មីៗកន្លងទៅនេះ ក្លិបបាល់ទាត់សូលទីឡូអង្គរ ដែលមានមូលដ្ឋាននៅក្នុងទឹកដី នៃខេត្តសៀមរាប ក៏បានប្រកាសអំពីការបញ្ឈប់កិច្ចសន្យាជាមួយកីឡាករវ័យក្មេង២រូបថែមទៀតគឺ កីឡាករ ប្រាក់ សុវណ្ណពិសិដ្ឋ និងកីឡាករ សឿង សុបញ្ញា ដោយសារពួកគេទាំងពីរបានធ្វើខុសពីក្រមសីលធម៌ក្លិបដែលមិនអាចលើកលែងឲ្យបាន។
គួរឲ្យដឹងថា គ្រាដែលមិនមានការប្រកួតនាពេលបច្ចុប្បន្ននេះ ក្លិបបាល់ទាត់ទាំង១៣ក្នុងក្របខ័ណ្ឌលីគកំពូលកម្ពុជា មិនទាន់ចាប់ផ្ដើមការហ្វឹកហាត់លក្ខណៈផ្លូវការនៅឡើយទេ ដោយក្លិបខ្លះបានកាត់បន្ថយថ្ងៃហ្វឹកហាត់ និងបែងចែកកីឡាករជាក្រុមធ្វើការហ្វឹកហាត់ និងខ្លះទៀតធ្វើលំហាត់នៅតាមផ្ទះរបស់ពួកគេ តាមការរៀបចំឲ្យដោយក្រុមគ្រូបង្វឹក ដើម្បីត្រៀមលក្ខណៈមុនការវិលមកវិញ នៃលីគកំពូលកម្ពុជា ៕ (កែសម្រួលដោយ ៖ បុប្ផា)
ចែករំលែកព័តមាននេះ