រាជធានីភ្នំពេញ ៖ ការប្រកួតប្រដាល់ដណ្ដើមពានរង្វាន់ម៉ា សេរី លើកទី៤ ដែលនឹងរៀបចំធ្វើនៅថ្ងៃសៅរ៍ ទី២៥ មេសា នៅសង្វៀនទូរទស្សន៍ស៊ីអិនស៊ី ឬស្សីកែវ សប្ដាហ៍នេះ សម្រាប់បេក្ខភាពដែលត្រូវចូលរួមប្រកួតក្នុងព្រឹត្តិការណ៍នេះមិនមែនហ៊ឺម សេរី ប៉ះខាំ ខ្លានាង ដូចការលើកឡើងនាពេលកន្លងមកទេ គឺរៀមច្បងមឿន សុខហ៊ុច មកពីក្លិបពុទ្ធសិរីវង្សពោធិ៍សែនជ័យ ប៉ះជើងខ្លាំងវ័យក្មេង ឡៅ ចិត្រាមកពីក្លិបកងពលតូចទ័ពពិសេសឆត្រយោង៩១១ ក្នុងកម្មវិធីអ្នកតស៊ូគុនខ្មែរគោជល់ វេលាម៉ោង៦ល្ងាច ។
អ្នកនិយមទស្សនាការប្រកួតប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករទាំងពីររូបនេះមួយណាសម្រេចគោលដៅក្នុងពេលពួកគេសុទ្ធតែជាជើងខ្លាំងដូចគ្នានៅក្នុងពិភពប្រដាល់បែបហ្នឹងនោះ ។ ក្នុងជំនួបគ្នាពេលនេះកីឡាករទាំងពីរសុទ្ធតែតាំងចិត្តប្រកួតឱ្យអស់ពីសមត្ថភាពបន្ទាប់ពីការប្រកួតរបស់កីឡាករជួរមុខកម្ពុជាមួយចំនួនកាលពីសប្តាហ៍កន្លងទៅ ធ្វើឱ្យអ្នកគាំទ្រជាច្រើនរិះគន់ចាស់ដៃចំពោះការប្រកួតមិនអស់ពីសមត្ថភាពរបស់ពួកគេ ។
គួររំលឹកថា ពានរង្វាន់ ម៉ា សេរី ធ្វើឡើងដើម្បីរំលឹកដល់លោកគ្រូ ម៉ា សេរី ដែលជាស្ថាបនិកគុនខ្មែរដ៏ឆ្នើមដែលបានទទួលមរណភាពកាលពីឆ្នាំ២០១៧ ដោយរោគាពាធ ។ សម្រាប់ការប្រកួតដណ្តើមពានរង្វាន់នេះលើកទី១ម្ចាស់ពានបានទៅលើកីឡាករថៃ នឹងត្រាក់កាន ដោយឈ្នះ អ៊ុំ ចំរើន លើកទី២ បានទៅលើ រឿង សោភ័ណ្ឌ ដោយឈ្នះកីឡាករថៃ សុ៊បពើឆ័យ និងលើកទី៣ ក្នុងឆ្នាំ២០១៩ បានទៅលើកីឡាករឈុត សេរីវ៉ាន់ថង ដោយឈ្នះកីឡាករ អេលីត សាន់ ៕ (កែសម្រួលដោយ ៖ បុប្ផា)
ចែករំលែកព័តមាននេះ