រាជធានីភ្នំពេញ ៖ ពាក់ព័ន្ធនឹងវិស័យទឹកស្អាតនៅកម្ពុជា ថ្នាក់ដឹកនាំក្រសួងក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ បានលើកឡើងថា បរិមាណផលិតទឹកស្អាតទូទាំងប្រទេសកម្ពុជាទាំងពីវិស័យសាធារណៈនិងឯកជន មានការកើនឡើងដល់ចំនួន…
រាជធានីភ្នំពេញ ៖ ពាក់ព័ន្ធនឹងវិស័យទឹកស្អាតនៅកម្ពុជា ថ្នាក់ដឹកនាំក្រសួងក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ បានលើកឡើងថា បរិមាណផលិតទឹកស្អាតទូទាំងប្រទេសកម្ពុជាទាំងពីវិស័យសាធារណៈនិងឯកជន មានការកើនឡើងដល់ចំនួន ៣៤៦៩២១០១៦ ម៣ កើនលើសឆ្នាំ២០១៨ ដែលមានចំនួនត្រឹមតែ ៣៩១៦៨៧៥៤ ម៣។
ថ្លែងនៅ សន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍» នាព្រឹកថ្ងៃទី២៣ ខែមេសា ឆ្នាំ២០២០ នៅទីស្តីការគណៈរដ្ឋមន្ត្រី លោក ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ បានលើកឡើងថាបច្ចុប្បន្ននេះ ប្រជាជនកម្បុជាជាង ៥៦ភាគរយ ទទួលទឹកស្អាតប្រើប្រាស់ប្រចាំថ្ងៃ ក្នុងនោះនៅរាជធានីភ្នំពេញមានជាង ៨៥ភាគរយ ហើយក្រសួងគ្រោងនឹងបង្កើនការផ្គត់ផ្គង់ទឹកស្អាតក្នុងឆ្នាំ២០២៥ នឹងសម្រេចឲ្យបាន ១០០ភាគរយ ។
លោក ហេង សុខគង់ បានបន្តថាក្រសួងនឹងបន្តខិតខំការផ្គត់ផ្គង់ទឹកស្អាតឲ្យមានគ្រប់តំបន់ទីប្រជុំជននាឆ្នាំ ២០២៥ ហើយតម្លៃទឹកស្អាតទៀតសោតនឹងមានតម្លៃធូរថ្លៃ ។ លោកបានបញ្ជាក់ឲ្យដឹងផងដែរ អត្រាគ្របដណ្តប់ក្នុងតំបន់សេវាផ្គត់ផ្គង់ទឹកស្អាត នៅទីប្រជុំជនទូទាំងប្រទេស ជាមធ្យម ប្រមាណ ៥៦,៣៧%។ ដោយឡែក រាជធានីភ្នំពេញ សម្រេចបានជាង ៨៥%។
ក្នុងប្រជាជនរស់នៅទីប្រជុំជន ចំនួន ៨៩៤៧១៨ គ្រួសារ ស្មើនឹង ៤៩៨៩២៨៨នាក់ បានទទួលទឹកស្អាតប្រើប្រាស់ ( ៥៦,៣៧% )។ រីឯបណ្តាញចែកចាយទឹកស្អាត រដ្ឋាករទឹកសាធារណៈ មានប្រវែង ៣១៣៧ គ.ម ក្នុងឆ្នាំ២០១៣ កើនដល់ ៥១៤៨,២៧ គ.ម នៅឆ្នាំ២០១៩។
លោកបានបន្ថែមក្រសួងក៏មានផែនការនឹងពង្រីកវិសាលភាពនៃការផ្គត់ផ្គង់ទឹកស្អាត នៅទីក្រុង និងទីប្រជុំជនឲ្យបាន ៩០% នៅឆ្នាំ២០២៣ និង១០០% ត្រឹមឆ្នាំ២០២៥។ ការអភិវឌ្ឍការពង្រីកប្រព័ន្ធផ្គត់ផ្គង់ទឹកស្អាត ទាំងផ្នែកសាធារណៈ និងផ្នែកឯកជន ឲ្យបាន ៩០% នៅឆ្នាំ២០២៣ និង ១០០% នៅឆ្នាំ២០២៥ ត្រូវបានក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ បញ្ជាក់ថា ដោយឈរលើបុរេលក្ខខណ្ឌ បួនយ៉ាង គឺ៖ «ទឹកត្រូវមានគុណភាព សុវត្ថិភាព និរន្តរភាព និងតម្លៃសមរម្យ»។
ជាពិសេសក្រសួងបានជំរុញការចូលរួមពីវិស័យឯកជន ក្នុងការសាងសង់ និងពង្រីកប្រព័ន្ធផ្គត់ផ្គង់ទឹកស្អាតដល់ឃុំសង្កាត់ ដែលពុំទាន់មានប្រព័ន្ធទឹកស្អាត៕
ចែករំលែកព័តមាននេះ