កុមារគឺជាទំពាំងស្នងឫស្សីមិនអាចខ្វះបានសម្រាប់គ្រួសារ ព្រះពុទ្ធសាសនា និងសង្គមជាតិ ។ កុមារត្រូវតែមានសុខភាពល្អ៤ប្រការគឺ សុខភាពផ្លូវកាយ សុខភាពខួរក្បាល សុខភាពស្មារតី និងសុខភាពផ្លូវចិត្ត ។ ដើម្បីសម្រេចតាមវត្ថុបំណងទាំងនេះ កុមារត្រូវតែចៀសផុតពីអំពើហិង្សាជាដាច់ខាត ។
មើលឃើញគុណតម្លៃនៃសិទ្ធិកុមារ ព្រះពុទ្ធសាសនាជាសាសនាមួយដែលបានលើកកម្ពស់យ៉ាងខ្លាំងដល់កាតព្វកិច្ចកុមារដែលមានបញ្ជាក់ក្នុងសង្គហធម៌ទាំង៥របស់មាតាបិតាចំពោះបុត្រ និងព្រហ្មវិហារធម៌ទាំងបួនជាដើម ។
ដោយអនុវត្តតាមគោលនយោបាយរបស់រាជរដ្ឋាភិបាលក្នុងការលើកកម្ពស់សិទ្ធិកុមារ ពុទ្ធសាសនាបានសហការជាមួយដៃគូអភិវឌ្ឍជាតិ និងអន្តរជាតិបានបង្កើតនូវកម្មវិធីសិក្សាបញ្ចូលមេរៀនព្រះពុទ្ធសាសនាដើម្បីផ្តល់ចំណេះដឹង និងផ្ទេរចំណេះដឹងដល់សមណនិស្សិត-និស្សិត និងពុទ្ធបរិស័ទក្នុងការលើកកម្ពស់ការយកចិត្តទុកដាក់ខ្ពស់ពីមាតាបិតា ក្រុមគ្រួសារ សហគមន៍ និងសង្កមចំពោះកុមារកម្ពុជាទាំងមូល ធ្វើយ៉ាងណាដើម្បីបញ្ចៀសការប្រើហិង្សាលើកុមារជាចម្បង ។
មេរៀនពុទ្ធសាសនា គឺជាឧបករណ៍ និងឯកសារដ៏មានតម្លៃបំផុតសម្រាប់ផ្សព្វផ្សាយ និងលើកកម្ពស់ការយល់ដឹងពីសិទ្ធិកុមារធ្វើយ៉ាងណាឲ្យកុមារកម្ពុជាចៀសផុតពីអំពើហិង្សា។ មេរៀននេះ ពិតជាមេរៀនដែលបង្កើតឡើងដោយមានខ្លឹមសារចម្រុះរវាងទ្រឹស្តីព្រះពុទ្ធសាសនា ច្បាប់ជាតិ និងច្បាប់អន្តរជាតិក្នុងការធ្វើឲ្យប្រសើរឡើងនូវការគោរពសិទ្ធិកុមារឱ្យពិតប្រាកដ ។ សាន សារិន
ចែករំលែកព័តមាននេះ