រាជធានីភ្នំពេញ, ថ្ងៃទី២២ ខែមេសា ឆ្នាំ២០២០ ៖ នៅខណៈពេលដែលប្រទេសកម្ពុជាកំពុងខិតខំទប់ស្កាត់ការរាតត្បាតនៃវីរុសកូវីដ-១៩ អាជីវកម្មលក់ដូរទាំងឡាយក៏ប្រែជាស្ងាត់ជ្រងំ ដោយហេតុថា អតិថិជនជាទូទៅកំពុងអនុវត្តវិធានការរក្សាគម្លាតពីសង្គម ។
ក្នុងនោះផងដែរ អាជីវកម្មតូចៗដែលត្រូវបានអនុញ្ញាតឱ្យបន្តដំណើរការអាជីវកម្មជាធម្មតានោះ ក៏កំពុងប្រឈមនឹងការលំបាកច្រើនណាស់ដែរ ក្នុងការរក្សាទំនាក់ទំនង និងផ្គត់ផ្គង់សេវាកម្មរបស់ខ្លួនជូនដល់អតិថិជន ជាហេតុនាំឱ្យអាជីវកម្មរបស់ពួកគាត់ត្រូវធ្លាក់ចុះទាំងមិនមានតម្រុយថា តើពេលណា ទើបស្ថានការណ៍ត្រលប់មកប្រសើរដូចដើមវិញ0x017d7
ក្នុងនាមជាក្រុមហ៊ុនផ្ដល់សេវាកក់ការធ្វើដំណើរដ៏ពេញនិយមនៅកម្ពុជា ក្រុមហ៊ុន TADA កំពុងផ្ដល់ដំណោះស្រាយមួយជូនដល់អាជីវករចំពោះបញ្ហានេះ ដោយក្រុមហ៊ុនបានបើកឱ្យដំណើរការនូវសេវាដឹកជញ្ជូន TADA Delivery សម្រាប់ជួយឱ្យអាជីវករអាចបន្តផ្គត់ផ្គង់សេវាកម្មជូនដល់អតិថិជនរបស់ខ្លួនបាន នៅគ្រប់ទិសទីក្នុងរាជធានីភ្នំពេញ ។
ជាផ្នែកមួយនៃការបើកដំណើរការសេវានេះ ក្រុមហ៊ុន TADA នឹងបើកបម្រើសេវាកម្មនេះ ជូនដល់អាជីវករប្រើប្រាស់ដោយឥតគិតថ្លៃរយៈពេលមួយខែពេញ ។ ដើម្បីប្រើប្រាស់សេវានេះ អាជីវករគ្រាន់តែចុះឈ្មោះងាយៗ ដោយផ្ញើសារទៅកាន់ទំព័រហ្វេសប៊ុករបស់ក្រុមហ៊ុន (https://www.facebook.com/TADAKHM/ ) ឬទូរស័ព្ទ ឬផ្ញើសារទៅកាន់គណនី Telegram របស់ក្រុមហ៊ុនតាមរយៈលេខទូរស័ព្ទ 061555643 ឬ 010555643 ។ សូមបញ្ជាក់ផងដែរថា សេវានេះ ចាប់បើកដំណើរការចាប់ពីសប្តាហ៍នេះតទៅ ។
លោក ជីម ប៉ូលី ប្រធានចាត់ការទូទៅក្រុមហ៊ុន TADA CAMBODIA បានមានប្រសាសន៍ថា៖ «ហេតុផលដែលយើងបើកនូវសេវាកម្មដឹកជញ្ជូននេះ គឺយើងចង់ធ្វើការគាំទ្រមិនត្រឹមតែអ្នកបើកបរប៉ុណ្ណោះទេ គឺយើងចង់គាំទ្ររហូតទៅដល់អាជីវករ និងអាជីវកម្មក្នុងស្រុករបស់យើង ដែលកំពុងជួបការលំបាកនៅក្នុងពេល កូវីដ-១៩ ព្រោះអាជីវករភាគច្រើនមិនមានលទ្ធភាព ក្នុងការជួលសេវាដឹកជញ្ជូនដោយផ្ទាល់ខ្លួននោះទេ ។ យើងផ្ដល់ឱ្យគាត់ក្នុងរយៈពេល១ខែ ក្នុងការដឹកជញ្ជូនឱ្យគាត់ដោយឥតគិតថ្លៃក្នុងទីក្រុងភ្នំពេញ អ៊ីចឹងសង្ឃឹមថា ការផ្ដល់ជូនដោយឥតគិតថ្លៃនេះ អាចជួយអាជីវករម្មគាត់ និងការទំនាក់ទំនងឡើងវិញជាមួយអតិថិជនរបស់គាត់» ។
សេវា TADA Delivery ដំណើរការដោយប្រព័ន្ធគ្រប់គ្រងការដឹកជញ្ជូនតាមអនឡាញដ៏ទំនើបមិនធ្លាប់មាននៅកម្ពុជា ព្រមទាំងអាចជួយឱ្យអាជីវករកក់ និងពិនិត្យមើលលំហូរនៃការដឹកជញ្ជូនទំនិញរបស់ពួកគាត់បានយ៉ាងងាយស្រួល ។ ប្រព័ន្ធនេះ ក៏ជួយឱ្យអាជីវករអាចគ្រប់គ្រងការបង់ប្រាក់ថ្លៃទំនិញរបស់ខ្លួនបានផងដែរ ទាំងការទូទាត់ជាក្រដាសប្រាក់ និងទូទាត់តាមគណនី ដោយថវិកានោះនឹងត្រូវទទួលជំនួសដោយអ្នកបើករ៉ឺម៉ក់កង់បី ។
អាជីវករដែលបានចុះឈ្មោះរួច បានឱ្យដឹងថា សេវា TADA Delivery ផ្ដល់ជំនួយបានច្រើនដល់អាជីវកម្មរបស់ពួកគាត់ ។
កញ្ញា ភា ស្រីម៉ុម អ្នកតំណាងហាងលក់សម្ភារៈកីឡា Lifeshion បានឱ្យដឹងថា៖ «តាំងពីពេល កូវីដ-១៩ បានមកដល់ប្រទេសកម្ពុជា ការលក់នូវឧបករណ៍ហាត់ប្រាណមានការធ្លាក់ចុះ ហើយភ្ញៀវក៏មិនហ៊ានដើរចូលមកហាងផ្ទាល់ដែរ អ៊ីចឹងដើម្បីបម្រើដល់អតិថិជនយើងមានការសហការជាមួយនឹងក្រុមហ៊ុន TADA សម្រាប់ការ Delivery ជូនភ្ញៀវ ដែលជាសេវាកម្មរហ័សទាន់ចិត្ត»។
អតិថិជនដែលជាអ្នកទិញទំនិញ ក៏នឹងទទួលបានអត្ថប្រយោជន៍ពីសេវាដឹកជញ្ជូននេះផងដែរ ពីព្រោះពួកគាត់អាចទិញទំនិញបានដោយមិនចាំបាច់ធ្វើដំណើរទៅកាន់ហាងដោយផ្ទាល់នោះទេ ព្រោះសេវានេះនឹងដឹកទំនិញរបស់គាត់ ជូនដល់គេហដ្ឋានតែម្ដង ។
រីឯសម្រាប់អ្នករត់រ៉ឺម៉ក់កង់បីដែលជាកម្លាំងស្នូលនៃសេវា TADA Delivery វិញ ពួកគាត់យល់ឃើញថា សេវានេះ ពិតជាអាចជួយសម្រាលបន្ទុកផ្នែកសេដ្ឋកិច្ចរបស់ពួកគាត់បានមួយកម្រិតដែរនៅក្នុងកាលៈទេសៈដ៏លំបាកនេះ ។
លោក ហែ ផល្លី អ្នករត់រ៉ឺម៉ក់កង់បីម្នាក់ បានឱ្យដឹងថា៖ «មួយរយៈនេះ ខ្សត់ភ្ញៀវហៅកង់បីជិះណាស់ ។ តែដល់ពេលមានសេវាដឹកឥវ៉ាន់នេះ វាក៏ជួយជីវភាពខ្ញុំបានច្រើនគួរសមដែរ ។ បើសិនជាគ្មានសេវាដឹកឥវ៉ាន់នេះទេ វាធ្វើឱ្យអ្នករត់កង់បីនេះមានការលំបាកយ៉ាងខ្លាំង» ។
ក្រុមហ៊ុន TADA បានឱ្យដឹងថា ពីដំបូងឡើយ ក្រុមហ៊ុនគ្រោងនឹងដាក់ឱ្យដំណើរការនូវសេវាដឹកជញ្ជូននេះ នៅពីរបីខែខាងមុខឯណោះទេ ។ ប៉ុន្តែដោយហេតុថាវីរុសកូវីដ-១៩ បានរាតត្បាតពាសពេញពិភពលោក ក្រុមហ៊ុនក៏សម្រេចចិត្តពន្លឿនពេលបើកដំណើរការសេវានេះមុនផែនការវិញ ដើម្បីឆ្លើយតបទៅតាមសេចក្ដីត្រូវការដ៏ចាំបាច់របស់អាជីវករ នាទីក្រុងភ្នំពេញ ។
លោក ជីម ប៉ូលី ប្រធានចាត់ការទូទៅក្រុមហ៊ុន TADA CAMBODIA បានបន្ថែមថា៖ «នេះ គឺជាផ្នែកមួយសំខាន់ក្នុងការចូលរួមចំណែកក្នុងការសម្រេចនូវចក្ខុវិស័យរបស់យើងថា យើងមិនត្រឹមតែអាចជួយដៃគូរបើកបររបស់យើងតែប៉ុណ្ណោះទេ យើងចង់ជួយដល់អាជីវកម្ម អាជីវករ ឬក៏ដៃគូររកស៊ីជាមួយយើងទាំងអស់គ្នា ជាពិសេសគឺចង់បន្ថែមទៅលើកិច្ចខំប្រឹងប្រែងរបស់រដ្ឋាភិបាល ដើម្បីធ្វើម៉េចស្ដារលទ្ធភាពសេដ្ឋកិច្ចយើងឱ្យដូចដើមវិញ ។
មិនតែប៉ុណ្ណោះសេវាកម្មរបស់យើងនៅមានច្រើនទៀតដែលយើងនឹងធ្វើការប្រកាសក្នុងពេលឆាប់ៗនេះ ហើយទាំងអស់ហ្នឹង គឺជាផ្នែកមួយដែលយើងព្យាយាមធ្វើដើម្បីរួមចំណែកក្នុងការសម្រេចបាននូវចក្ខុវិស័យរយៈពេលវែងរបស់យើង» ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ