រាជធានីភ្នំពេញ ៖ អូស្ត្រាលីកំពុងផ្តល់ការគាំទ្រផ្នែកហិរញ្ញវត្ថុជំនាញបច្ចេកទេស និងការកសាងសមត្ថភាពដើម្បីផ្តល់អំណាចដល់ប្រជាជនកម្ពុជា ដើម្បីឆ្លើយតបប្រកបដោយប្រសិទ្ធភាព ចំពោះបញ្ហាប្រឈមដែលមិនធ្លាប់មានពីមុននៃកូវីដ-១៩ ។ កិច្ចសហប្រតិបត្តិការរបស់អូស្ត្រាលី កសាងបន្ថែមលើការគាំទ្រយូរអង្វែងរបស់យើង សម្រាប់ការអភិវឌ្ឍប្រទេសកម្ពុជា។ ប្រទេសអូស្ត្រាលីមានគោលបំណងកសាងប្រព័ន្ធ និងស្ថាប័ននៅប្រទេសកម្ពុជា ដែលអាចដោះស្រាយវិបត្តិសុខាភិបាល និងសេដ្ឋកិច្ច តាមវិធីដែលមានការសម្របសម្រួល ហើយផ្តល់លទ្ធផលដែលមានការថិតថេរ។
លោក Pablo Kang ឯកអគ្គរាជទូតអូស្ត្រាលីប្រចាំនៅកម្ពុជាបានមានប្រសាសន៍ថា «វិធីសាស្ត្ររបស់អូស្ត្រាលី គឺផ្តោតលើការផ្តល់អំណាចដល់រដ្ឋាភិបាលកម្ពុជា វិស័យឯកជន និងសង្គមស៊ីវិលដើម្បីអនុវត្តវិធានការមានការសម្របសម្រួល ដើម្បីជាប្រយោជន៍ដល់ប្រជាជនកម្ពុជាទាំងអស់។ នៅក្នុងបរិបទនៃកូវីដ-១៩ វាមិនគួរផ្តោតសំខាន់លើម្ចាស់ជំនួយ ដូចជាអូស្ត្រាលីនាំមុខក្នុងកិច្ចខិតខំប្រឹងប្រែង និងទាមទារពិន្ទុទាំងអស់នោះទេ។ ជំនួយក្នុងវិស័យសុខាភិបាលរបស់យើង កំពុងជួយប្រទេសកម្ពុជាក្នុងការអនុវត្តផែនការមេកូវីដ-១៩របស់ខ្លួន។ តាមវិធីនោះ កិច្ចសហប្រតិបត្តិការរបស់យើងទំនងជានាំទៅរកវិធានការណ៍ដែលសមស្របបំផុតសម្រាប់ប្រទេសកម្ពុជា ហើយទីបំផុតនឹងមានផលប្រកបដោយចីរភាពជាងមុន»។
ឯកអគ្គរាជទូត Kang បានមានប្រសាសន៍បន្តថា «ក្នុងនាមជាប្រទេសជិតខាង និងជាមិត្តដ៏យូរអង្វែងរបស់ប្រទេសកម្ពុជា អូស្ត្រាលីមានចំណែកនៅក្នុងសុខភាព និងសុខុមាលភាពរបស់ប្រជាជនកម្ពុជា។ យើងបានផ្តល់ជំនួយជាង ១៥០លានដុល្លារអូស្ត្រាលី ដើម្បីធ្វើទំនើបកម្មសេវាកម្មសុខាភិបាលរបស់ប្រទេសកម្ពុជា ក្នុងរយៈពេលមួយទសវត្សរ៍កន្លងមកដែលក្នុងប៉ុន្មានឆ្នាំថ្មីៗនេះ មានការពាក់ព័ន្ធយកចិត្តទុកដាក់លើការពង្រឹងប្រព័ន្ធហិរញ្ញប្បទានសុខាភិបាល។ នេះអាចជួយឱ្យមូលនិធិត្រូវបានប្រើប្រាស់កាន់តែមានប្រសិទ្ធិភាព និងនាំយកទៅកន្លែងដែលត្រឹមត្រូវ បានឆាប់រហ័សក្នុងពេលមានវិបត្តិដូចជាជំងឺរាតត្បាតនាពេលបច្ចុប្បន្ននេះ» ។
អូស្ត្រាលីគឺជាអ្នកផ្តល់ជំនួយឥតសំណងនាំមុខគេ ដល់គម្រោងលើកកំពស់គុណភាពនិងសមធម៌សុខាភិបាលកម្ពុជា (H-EQIP) ដែលត្រូវបានអនុវត្តរួមគ្នាដោយធនាគារពិភពលោកនិងរដ្ឋាភិបាលកម្ពុជា។ អូស្ត្រាលីបានចំណាយថវិកាចំនួន ៤០លានដុល្លារអូស្ត្រាលីទៅក្នុង គម្រោងលើកកំពស់គុណភាពនិងសមធម៌សុខាភិបាលកម្ពុជា (H-EQIP) ហើយបានប្តេជ្ញារួមវិភាគទានចំនួន ១០លានដុល្លារអូស្ត្រាលីបន្ថែមទៀតក្នុងរយៈពេល២ឆ្នាំខាងមុខ។
ក្រៅពីការងាររយៈពេលវែងរបស់ខ្លួនដើម្បីលើកកម្ពស់គុណភាពសេវាសុខភាពសាធារណៈនៅទូទាំងប្រទេស គម្រោងលើកកំពស់គុណភាពនិងសមធម៌សុខាភិបាលកម្ពុជា (H-EQIP) ក៏បានប្រមូលថវិកាបន្ទាន់ជាច្រើន ដើម្បីជួយរដ្ឋាភិបាលកម្ពុជាក្នុងការផ្តល់មូលនិធិដល់សេចក្តីត្រូវការបន្ទាន់ប្រយុទ្ធប្រឆាំងនឹងកូវីដ-១៩។ កាលពីដើមខែនេះថវិកាចំនួន ១៤ លានដុល្លាររបស់គម្រោងលើកកំពស់គុណភាពនិងសមធម៌សុខាភិបាលកម្ពុជា (H-EQIP) ត្រូវបានបែងចែកដើម្បីទិញរថយន្តសង្គ្រោះបន្ទាន់ចំនួន២០គ្រឿង ឧបករណ៍វេជ្ជសាស្ត្រ និងអភិវឌ្ឍមន្ទីរពិសោធន៍នៅប្រទេសកម្ពុជាដើម្បីឆ្លើយតបទៅនឹងកូវីដ-១៩ ។
អូស្ត្រាលីក៏កំពុងរៀបចំឡើងវិញនូវគំនិតផ្តួចផ្តើមកិច្ចសហប្រតិបត្តិការអភិវឌ្ឍន៍ដែលមានស្រាប់ ដើម្បីគាំទ្រដល់ការគ្រប់គ្រងផលប៉ះពាល់ផ្នែកសុខភាព និងសេដ្ឋកិច្ចរបស់ប្រទេសកម្ពុជាដោយកូវីដ-១៩។ នេះរួមបញ្ចូលទាំងការលើកកម្ពស់សន្តិសុខស្បៀង និងការបង្កើតឱកាសចិញ្ចឹមជីវិតនៅតាមជនបទ សម្រាប់អ្នកដែលបាត់បង់ការងារនៅក្នុងទីក្រុង គាំទ្រដល់ការបន្តសេវាកម្មសម្រាប់ស្ត្រីដែលទទួលរងនូវអំពើហឹង្សាប្រឆាំងយេនឌ័រ និងផ្តល់នូវឧបករណ៍ការពារផ្ទាល់ខ្លួន និងព័ត៌មានដែលជនមានពិការភាពអាចទទួលបានអំពីកូវីដ -១៩ ដល់ប្រជាជនកម្ពុជាដែលមានភាពពិការ។
អូស្ត្រាលីក៏នឹងបន្តផ្តល់ថវិកាដល់ការបញ្ជូនទឹកស្អាត ដល់សហគមន៍ជនបទនៅកម្ពុជាតាមរយៈកម្មវិធីវិនិយោគក្នុងវិស័យហេដ្ឋារចនាសម្ព័ន្ធ (៣i)។
ឯកអគ្គរាជទូត Kang បានមានប្រសាសន៍បន្តថា «យើងប៉ាន់ប្រមាណថា ដោយមានជំនួយពីអូស្ត្រាលី ប្រជាជនកម្ពុជាចំនួន ១,១ លាននាក់នឹងទទួលបានទឹកស្អាតប្រើប្រាស់ជាលើកដំបូង។ យើងសង្ឃឹមថាពួកគេនឹងប្រើវាជាមួយសាប៊ូដើម្បីលាងដៃឱ្យបានញឹកញាប់ និងត្រឹមត្រូវ!» ៕
ចែករំលែកព័តមាននេះ