អ្នកនាំពាក្យរបស់អង្គការសុខភាពពិភពលោក (WHO) បាននិយាយកាលពីថ្ងៃអង្គារថា ភ័ស្តុតាងបង្ហាញថា មេរោគនេះ មានដើមកំណើតសត្វប្រចៀវ នៅក្នុងប្រទេសចិន កាលពីចុងឆ្នាំ២០១៩ ហើយមិនត្រូវបានគេផលិតនៅក្នុងមន្ទីរពិសោធន៍ទេ នេះបើតាមទីភ្នាក់ងារសារព័ត៌មាន រ៉យទ័រ ចេញផ្សាយនៅថ្ងៃទី២១ មេសានេះ។
ការអត្ថាធិប្បាយរបស់ទីភ្នាក់ងារសុខភាព របស់អង្គការសហប្រជាជាតិ ធ្វើឡើងបន្ទាប់ពីសប្តាហ៍មុន ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកកំពុងព្យាយាមកំណត់ថា តើវីរុសនេះ មានប្រភពមកពីមន្ទីរពិសោធន៍មួយនៅទីក្រុង Wuhan ប្រទេសចិន ។
អ្នកនាំពាក្យរបស់អង្គការសុខភាពពិភពលោកស្រី Fadela Chaib បានប្រាប់ក្នុងសន្និសីទសារព័ត៌មានមួយ នៅទីក្រុងហ្សឺណែវថា “រាល់ភ័ស្តុតាងដែលអាចរកបាន គឺបង្ហាញថា វីរុសនេះ មានដើមកំណើតពីសត្វ ហើយមិនមែនជាមេរោគដែលត្រូវបានរៀបចំឬបង្កើតនៅក្នុងបន្ទប់ពិសោធន៍ ឬកន្លែងផ្សេងទៀតទេ” ។
លោកស្រីបាននិយាយបន្តថា វាមិនច្បាស់ទេ ថាតើវីរុសបានឆ្លងដល់មនុស្សយ៉ាងដូចម្តេច ប៉ុន្តែពិតជាមានសត្វកណ្តាលមួយមុនពេលមេរោគនេះឆ្លងទៅមនុស្ស “វាអាចទៅរួចដែលវីរុសនេះមានដើមកំណើតពីសត្វ” ។
ទីភ្នាក់ងារ WHO បាននិយាយទៀតថា ខ្លួនកំពុងវាយតំលៃផលប៉ះពាល់ នៃការរាំងខ្ទប់ថវិការបស់សហរដ្ឋអាមេរិក ដល់អង្គការសហប្រជាជាតិ ហើយថា ខ្លួននឹងធ្វើការជាមួយដៃគូរបស់ខ្លួន ដើម្បីបំពេញចន្លោះខ្វះខាតណាមួយ ។
កាលពីសប្តាហ៍មុន លោកប្រធានាធិបតី បានប្រកាសថា លោកបញ្ឈប់ការផ្តល់មូលនិធិរបស់សហរដ្ឋអាមេរិក ដល់អង្គការនេះ។ លោក Trump បានចោទប្រកាន់ WHO ថា បានបំភាន់ការឆ្លើយតបរបស់ខ្លួនចំពោះជំងឺរាតត្បាត ។ អង្គការសុខភាពពិភពលោកបានឆ្លើយតបដោយនិយាយថា វាមិនសមហេតុផលទេ ក្នុងការផ្អាកការផ្តល់មូលនិធិ ក្នុងកំឡុងពេលមានការផ្ទុះឡើងនៃពិភពលោក ។
សហរដ្ឋអាមេរិក គឺជាម្ចាស់ជំនួយធំបំផុត របស់ទីភ្នាក់ងារសុខភាព ដែលមានមូលដ្ឋាននៅទីក្រុងហ្សឺណែវ ។ អ្នកចូលរួមវិភាគទានធំៗ ផ្សេងទៀត គឺមូលនិធិ ហ្គេតស៍ និងអង់គ្លេស ។
វីរុសនេះត្រូវបានឆ្លងរាលដាលដល់មនុស្សជាង ២,៥ លាននាក់ហើយ បណ្តាលឱ្យមនុស្សជាង ១៧០.០០០ នាក់បានស្លាប់ នៅជុំវិញពិភពលោក ៕
ចែករំលែកព័តមាននេះ