យោងទៅសារព័ត៌មាន Bloomberg បានឲ្យដឹងថា អ្នកដែលមានទ្រព្យសម្បត្តិស្តុកស្តម្ភ ដែលរួមមានមនុស្សជាច្រើនដែលរស់នៅតំបន់ Silicon Valley ក្នុងសហរដ្ឋអាមេរិក បាននាំគ្នារត់ចេញពីប្រទេសទៅកាន់ប្រទេសណូវែលសេឡង់ដែលមានប្រជាប្រិយភាពក្នុងផ្នែកសាងសង់បន្ទប់ក្រោមដីមានសុវត្ថិភាពខ្ពស់ ។…
យោងទៅសារព័ត៌មាន Bloomberg បានឲ្យដឹងថា អ្នកដែលមានទ្រព្យសម្បត្តិស្តុកស្តម្ភ ដែលរួមមានមនុស្សជាច្រើនដែលរស់នៅតំបន់ Silicon Valley ក្នុងសហរដ្ឋអាមេរិក បាននាំគ្នារត់ចេញពីប្រទេសទៅកាន់ប្រទេសណូវែលសេឡង់ដែលមានប្រជាប្រិយភាពក្នុងផ្នែកសាងសង់បន្ទប់ក្រោមដីមានសុវត្ថិភាពខ្ពស់ ។
យោងតាមសេចក្តីរាយការណ៍ខាងលើបានឲ្យដឹងថា មហាសេដ្ឋីមួយចំនួនបានចាកចេញពីសហរដ្ឋអាមេរិកទៅកាន់បន្ទប់ក្រោមដីដ៏ប្រណីតរបស់ពួកគេហើយដើម្បីគេចខ្លួនពីកូវីដ ១៩ ។
លោក មីហៃ ឌីនូឡេស្កូ (Mihai Dinulescu) និងភរិយាត្រូវបានប្រទះឃើញលើជើងហោះហើរទៅកាន់នូវែលសេឡង់កាលពីដើមខែមិនាកន្លងមកនេះ ប្រមាណ ៤ថ្ងៃមុនពេលនូវែលសេឡង់ចេញបញ្ជាបិទព្រំប្រទល់សម្រាប់ជនបរទេសទាំងអស់ ។
លោក ឌីនូឡេស្កូ បានប្រាប់ដល់ Bloomberg ថា តាំងពីពេលនោះមក លោកបានរក្សាទំនាក់ទំនងជាមួយនឹងមនុស្ស ១០នាក់ទៀតដែលបានចាកចេញពីសហរដ្ឋអាមេរិកដែរ ។ក្នុងកំឡុងពេលប៉ុន្មានឆ្នាំថ្មីៗនេះ មហាសេដ្ឋីមួយចំនួនបានវិនិយោគលើការត្រៀមខ្លួនសម្រាប់ទីបញ្ចប់នៃពិភពលោកព្រោះតែមូលហេតុជាច្រើន ។ តែក្នុងនោះ មូលហេតុដែលធំជាងគេគឺព្រោះតែពួកគេមានសមត្ថភាពក្នុងការរស់នៅបែបនេះ ។
យោងទៅតាមលោក យីសាន វ៉ង (Yishan Wong) ដែលជាអតីតនាយកប្រតិបត្តិរបស់ក្រុមហ៊ុន Reddit បានឲ្យដឹងថា សម្រាប់ទ្រព្យសម្បត្តិស្តុកស្តម្ភដែលពួកគេមាន ការចំណាយបន្តិចបន្តួចដើម្បីការពារខ្លួនទុកពេលមានអាសន្នមិនខុសប្រក្រតីទេ ។
មហាសេដ្ឋីមកពីវិស័យបច្ចេកវិទ្យាក្នុងសហរដ្ឋអាមេរិកមិនមែនជាក្រុមមនុស្សតែមួយដែលចាប់អារម្មណ៍នឹងបន្ទប់ក្រោមដីទាំងនេះទេ មហាសេដ្ឋីដែលជាវិនិយោគិនធំៗក្នុងទីផ្សារភាគហ៊ុនអាមេរិកក៏បានងាកមកចាប់អារម្មណ៍លើទីផ្សារនេះដែររហូតដល់ប្រទេសណូវែលសេឡង់ចេញច្បាប់ហាមឃាត់មិនឲ្យជនបរទេសទិញផ្ទះ ឬដីក្នុងប្រទេសកាលពីឆ្នាំ ២០១៨ កន្លងមកនេះ ។
គួរបញ្ជាក់ផងដែរថា ណូវែលសេឡង់កំពុងតែទប់ទល់នឹងកូវីដ ១៩ បានយ៉ាងល្អបើធៀបនឹងប្រទេសដទៃ ។ យោងទៅតាម Bloomberg បានឲ្យដឹងថា ប្រទេសនេះមានចំនួនមនុស្សទទួលមរណភាពពីកូវីដ ១៩ ប្រមាណ ១២នាក់ ដែលជាចំនួនទាបជាងឆ្ងាយបើធៀបនឹងសហរដ្ឋអាមេរិក ៕
ចែករំលែកព័តមាននេះ