រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅរសៀលថ្ងៃទី២១ ខែមេសា ឆ្នាំ២០២០នេះ បានប្រកាសអោយដឹងថា ក្រសួងធ្វើចត្តាឡីស័ក ចំពោះកម្មកររោងចក្រ ក្នុងរាជធានីភ្នំពេញ ដែលឈប់សម្រាកអំឡុងពេលបុណ្យចូលឆ្នាំ ហើយត្រឡប់ចូលបម្រើការងារវិញ បានចំនួន១៤២៣នាក់ ។
ក្នុងសេចក្តីប្រកាសព័ត៌មានរបស់ក្រសួងការងារ បញ្ជាក់ថា ថ្ងៃទី២០ ខែមេសា ឆ្នាំ២០២០ គិតត្រឹមម៉ោង១៨៖០០នាទីយប់ មានកម្មកររោងចក្រមកត្រតពិនិត្យសុខភាព ចំនួន ១,០១៨នាក់ក្នុងនោះ ដាក់ឱ្យធ្វើចត្តាឡីស័កនៅផ្ទះ១៤ថ្ងៃ ចំនួន៩៥៩នាក់ ដាក់ឱ្យស្នាក់នៅមណ្ឌលចត្តាឡីស័កកម្រិត១ (វិទ្យាល័យជម្ពូវ័ន) ចំនួន៣៨នាក់ និងយកសំណាកទៅពិសោធន៍បន្តចំនួន១៨នាក់ និងដាក់ឱ្យស្នាក់នៅមណ្ឌលចត្តាឡីស័ក កម្រិត២ (វិទ្យាល័យជម្ពូវ័ន) ចំនួន២១នាក់ ។
សម្រាប់ ថ្ងៃទី២១ ខែមេសា ឆ្នាំ២០២០ គិតត្រឹមម៉ោង១១៖០០នាទីព្រឹក មានកម្មកររោងចក្រមកត្រួតពិនិត្យសុខភាពចំនួន ៤០៥នាក់ក្នុងនោះ ដាក់ឱ្យធ្វើចត្តាឡីស័កនៅផ្ទះ១៤ថ្ងៃ ចំនួន៣៧៦នាក់ ដាក់ឱ្យស្នាក់នៅមណ្ឌលចត្តាឡីស័កកម្រិត១ ចំនួន៦នាក់ និងដាក់ឱ្យស្នាក់នៅមណ្ឌលចត្តាឡីស័កកម្រិត២ ចំនួន ២៣នាក់ ។
សូមជម្រាបថា គោលបំណងនៃការត្រួតពិនិត្យសុខភាពនេះគឺដើម្បីការពារសុខភាពបងប្អូនកម្មកររោងចក្រជាង ៩៥% ដែលបានមកធ្វើការងារធម្មតាក្នុងអំឡុងពេលចូលឆ្នាំ ក៏ដូចជាការពារសុខភាពបងប្អូនដែលបានឈប់នោះផងដែរ ៕
ចែករំលែកព័តមាននេះ