រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នារសៀលថ្ងៃទី២១ េមសា ឆ្នាំ២០២០ នេះ រដ្ឋបាលក្រុងសៀងហៃ ប្រទេសចិន បានប្រគល់អំណោយដល់សាលារាជធានីភ្នំពេញនូវម៉ាស់ប្រភេទ N95 ចំនួន៣ពាន់, ម៉ាស់វេជ្ជសាស្ត្រចំនួន២ម៉ឺន និងសម្លៀកបំពាក់ពេទ្យសម្រាប់ពាក់ការពារមេរោគចំនួន៥០០ឈុត ដែលពិធីនេះធ្វើឡើងក្នុងបរិវេណសាលារាជធានីភ្នំពេញ ក្រោមអធិបតីភាពតំណាងស្ថានទូតចិន ប្រចាំនៅកម្ពុជា និងលោកឃួង ស្រេង អភិបាលរាជធានី ។
នៅក្នុងពិធីខាងលើនេះដែរ លោកឃួង ស្រេង អភិបាលរាជធានីភ្នំពេញ បានអំពាវនាវដល់ប្រជាពលរដ្ឋឱ្យមានការប្រុងប្រយ័ត្ន ខណៈរយៈពេលប៉ុន្មានថ្ងៃនេះ ស្ងប់ស្ងាត់នៃការចេញផ្សាយព័ត៌មានដែលមិនមានរកឃើញករណីឆ្លងជំងឺកូវីដ១៩ ហើយគេសង្កេតឃើញថា ប្រជាពលរដ្ឋនៅរាជធានីភ្នំពេញបានចេញធ្វើដំណើរ និងប្រកបមុខរបរធ្វើអាជីវកម្មច្រើនឡើងវិញ ។ ទន្ទឹមនឹងនេះ ចំពោះការដើរហើររបស់ប្រជាពលរដ្ឋ គឺមិនមានការហាមឃាត់ទេ ប៉ុន្តែសូមឱ្យមានការប្រុងប្រយ័ត្នខ្ពស់ បើទោះបីជាស្ថានភាពជំងឺកូវីដ១៩ ធូរស្រាលបន្តិចក៏ដោយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ