ប្រធាន UEFA លោក Aleksander Ceferin បាននិយាយកាលពីថ្ងៃចន្ទថា លីគបាល់ទាត់នានានៅទូទាំងទ្វីបអឺរ៉ុប បានត្រៀមខ្លួនរួចជាស្រេចក្នុងការវិលត្រឡប់ទៅរកសកម្មភាពឡើងវិញ ប៉ុន្តែស្ថិតនៅពីក្រោយការបិទទ្វារ ក្នុងគោលបំណងកាត់បន្ថយការរីករាលដាលនៃរីរុសកូវីដ១៩…
ប្រធាន UEFA លោក Aleksander Ceferin បាននិយាយកាលពីថ្ងៃចន្ទថា លីគបាល់ទាត់នានានៅទូទាំងទ្វីបអឺរ៉ុប បានត្រៀមខ្លួនរួចជាស្រេចក្នុងការវិលត្រឡប់ទៅរកសកម្មភាពឡើងវិញ ប៉ុន្តែស្ថិតនៅពីក្រោយការបិទទ្វារ ក្នុងគោលបំណងកាត់បន្ថយការរីករាលដាលនៃរីរុសកូវីដ១៩ ។
លីគបាល់ទាត់នៅទ្វីបអឺរ៉ុប ត្រូវបានផ្អាកចាប់តាំងពីពាក់កណ្តាលខែ មីនា ដោយសារការផ្ទុកឡើងនៃវីរុសកូវីដ១៩ ដែលបានសម្លាប់មនុស្សជាង ១៧ ម៉ឺននាក់នៅទូទាំងពិភពលោក ។
ប៉ុន្តែប្រធានកីឡាបាល់ទាត់ទ្វីបអឺរ៉ុបជឿជាក់ថា ការលេងឡើងវិញពីក្រោយការបិទទ្វារ គឺជាជម្រើសដ៏សំខាន់ ដើម្បីចៀសវាងការខាតបង់ផ្នែកហិរញ្ញវត្ថុយ៉ាងធ្ងន់ធ្ងរសម្រាប់លីគ ។
លោក Aleksander Ceferin បាននិយាយនៅក្នុងបទសម្ភាសន៍ជាមួយកាសែតអុីតាលី Corriere della Sera ថា «ខ្ញុំជឿជាក់ថាមានជំរើសជាច្រើន ដែលអាចអោយយើងចាប់ផ្តើមការប្រកួតឡើងវិញ និងបំពេញវាឲ្យចប់សព្វគ្រប់ ។ យើងប្រហែលជាត្រូវលេងដោយគ្មានអ្នកទស្សនាផ្ទាល់» ។
«ធ្លាប់មានមតិជាច្រើននិយាយថា វាប្រហែលមិនអាចបញ្ចប់រដូវកាលនេះបានទេ ប៉ុន្តែផលប៉ះពាល់នឹងអាក្រក់បំផុតសម្រាប់ក្លិប និងលីគ» ។
បុរសជនជាតិស្លូវេនីរូបនេះ ក៏បានលើកឡើងថា ប្រសិនបើលីគអាចវិលត្រឡប់មកវិញឆាប់ៗ នោះការប្រកួតក្របខ័ណ្ឌ Champions League និង Europa League អាចលេងស្របគ្នា ដោយគ្មានការកំណត់កាលបរិច្ឆេទការប្រកួតវគ្គផ្តាច់ព្រ័ត្រ ។
លោកបានបន្តថា «យើងអាចបញ្ចប់រដូវកាលបាន ប៉ុន្តែយើងត្រូវតែគោរពតាមការសម្រេចចិត្តរបស់អាជ្ញាធរ ។ សុខភាពរបស់អ្នកគាំទ្រ កីឡាករ និងគ្រូបង្វឹក រួមទាំងអ្នកពាក់ព័ន្ធទាំងអស់គឺជាអាទិភាពចំបង»។
សូមបញ្ជាក់ថា UEFA នឹងមានកិច្ចប្រជុំសំខាន់មួយតាមរយៈខ្សែអាត់វីដេអូ (videoconference) ជាមួយប្រទេសជាសមាជិកទាំង៥៥ ក្នុងថ្ងៃនេះ ដើម្បីតាមដានពីបច្ចុប្បន្នភាពរបស់ប្រទេសទាំងនោះ ៕
ចែករំលែកព័តមាននេះ