ក្លិបបាល់ទាត់ FC Midtjylland នៃលីគកំពូលប្រទេសដាណឺម៉ាក បានរកឃើញដំណោះស្រាយមួយសម្រាប់អ្នកគាំទ្រខ្លួន អាចធ្វើការទស្សនាការប្រកួតបាន បើទោះបីជាការប្រកួតតម្រូវឲ្យលេងដោយបិទទ្វារយ៉ាងក្តី ។
បើយោងតាមអ្នករៀបចំបានឲ្យដឹងថា ប្រសិនបើការប្រកួតបាល់ទាត់ក្នុងប្រទេសដាណឺម៉ាក អាចវិលត្រឡប់មកវិញ នោះការប្រកួតទាំងអស់ទំនងនឹងត្រូវលេងដោយបិទទ្វារ ។ ខណៈដែលលីគដាណឺម៉ាកបច្ចុប្បន្ន ត្រូវបានផ្អាករហូតដល់មានការជូនដំណឹងបន្ថែម ។
ក្នុងនោះក្លិប FC Midtjylland បានដាក់ផ្ទាំងអេក្រង់យក្សនៅចំណតរថយន្តខាងក្រៅកីឡដ្ឋាន MCH Arena របស់ខ្លួនសម្រាប់ឲ្យអ្នកគាំទ្រអង្គុយក្នុងរថយន្ត អាចទស្សនារាល់សកម្មភាពការប្រកួតលើផ្ទាំងអេក្រង់យក្សនោះ ។
អ្នកនាំពាក្យក្លិប FC Midtjylland លោក Mads Hviid Jakobsen បានថ្លែងប្រាប់ AFP ឲ្យដឹងថា «ចំណតរថយន្តរបស់យើងមានសមត្ថភាពអាចផ្ទុករថយន្តបាន ២.០០០គ្រឿង ហើយអាចមានមនុស្សចំនួន៥នាក់ក្នុងរថយន្តមួយគ្រឿង ដែលអាចទស្សនាការប្រកួតបាន» ។
ការប្រកាសនេះត្រូវបានអ្នកគាំទ្រជាច្រើនពេញចិត្តយ៉ាងខ្លាំង និងកោតសរសើរចំពោះដំណោះស្រាយនេះ ។
លោក Hviid Jakobsen រំពឹងថា ការប្រកួតនឹងវិលត្រឡប់មកវិញ ដែលនឹងចាប់ផ្តើមនៅអំឡុងថ្ងៃទី ២១ ដល់ថ្ងៃទី ៣១ ខែ ឧសភាខាងមុខ ។
លោកបានបន្ថែមថា «ប្រសិនបើវាទទួលជោគជ័យ យើងនឹងបន្តពង្រឹកកន្លែងផ្ទុករថយន្តបានរហូតដល់ ១២.០០០ គ្រឿង ។ នោះមានន័យថាការរៀបចំថ្មី អាចបំពេញបានដល់ប្រជាជន ៦០,០០០ នាក់ ដែលស្ទើរតែទាំងអស់នៃចំនួនប្រជាជនក្នុងទីក្រុង Herning ដែលជាមូលដ្ឋានរបស់ក្លិប FC Midtjylland ។
សូមបញ្ជាក់ថាទីក្រុង Herning មានប្រជាជនជាង ៨៧,០០០ នាក់កំពុងរស់នៅ ដោយឡែកកីឡដ្ឋាន MCH Arena របស់ក្លិប FC Midtjylland មានសមត្ថភាពអាចផ្ទុកអ្នកទស្សនាបានត្រឹមតែ ១,១៨០០ នាក់តែប៉ុណ្ណោះ ។
គិតមកទល់ថ្ងៃទី ២១ ខែ មេសា ប្រទេសដាណឺម៉ាក បានរកឃើញអ្នកផ្ទុកវីរុសកូវីដ១៩ចំនួន ៧,៥១៥ នាក់ និងមានមនុស្សបាត់បង់ជីវិតសរុប៣៦៤ នាក់ ក្នុងនោះអ្នកជាសះស្បើយមានចំនួន ៤,៣១២ នាក់ ៕
ចែករំលែកព័តមាននេះ