ខេត្តកំពង់ឆ្នាំង ៖ ដើមរាំងយ៉ាងធំមួយដើម និងមានមែកសាខា ក្នុងចំណោមដើមរាំងជាច្រើនដើម ត្រូវបានក្រុមជនខិលខូចលួចគាស់ ក្នុងគោលបំណងដឹកចេញ ប៉ុន្តែត្រូវបែកការណ៍ ទើបរថយន្តដែលត្រូវមកដឹកដើមរាំងខាងលើ បានបើកគេចបាត់ បន្សល់ទុកតែដើមរាំងដែលគាស់ចេញពីដីរួចស្រេចនៅកន្លែងកើតហេតុ ។
ហេតុការណ៍ខាងលើនេះបានកើតឡើងតាំងពីយប់ថ្ងៃទី១៩ មេសា ប៉ុន្តែនៅព្រឹកថ្ងៃទី២០ ខែមេសា ទើបមានការភ្ញាក់ផ្អើល បន្ទាប់ពីប្រជាពលរដ្ឋចេញទៅប្រកបរបរនេសាទប្រទះឃើញដើមរាំងមួយដើមធំខាងលើដែលជនខិលខូចឆ្លៀតឱកាសកាប់គាស់បំណងដឹកចេញមិនសម្រេចនេះ មានទីតាំងនៅចំណុចកោះអាចម៍ ភូមិកោះតាម៉ូវ ឃុំកំពង់ព្រះគគី ស្រុកបរិបូរណ៌ ។
តាមប្រភពពីប្រជាពលរដ្ឋនៅភូមិកោះតាម៉ូវ ឃុំកំពង់ព្រះគគី បានឱ្យដឹងថា នៅយប់ថ្ងៃកើតហេតុ មាន ក្រុមជនខិលខូចមួយក្រុមបានលួចចូលទៅដល់ចំណុចកោះអាចម៍ ជាតំបន់ព្រៃលិចទឹក ដែលមានដើមរាំងរាប់សិបដើម ហើយបានធ្វើសកម្មភាពលួចគាស់ និងកាត់ដើមរាំងយ៉ាងធំមួយដើម ដើម្បីដឹកចេញ ។ លុះនៅម៉ោងជាង៩យប់ ក៏មានរថយន្តស្ទូចមួយគ្រឿងបានចូលទៅក្នុងភូមិកោះតាម៉ូវ ដើម្បីទៅដឹកដើមរាំងខាងលើ តែត្រូវបែកការ ដោយសារដឹងដល់មន្ត្រីជំនាញបានចាត់កម្លាំងទៅស្ទាក់ចាប់ទាំងយប់ ប៉ុន្តែចាប់មិនបានឡើយ ដោយសារជនខិលខូចរត់គេចជាមួយនិងរថយន្តបាត់អស់ទៅ ។
លោក លី ឡា នាយខណ្ឌ័រដ្ឋបាលជលផលខេត្តកំពង់ឆ្នាំងបានឱ្យដឹងថា ក្រោយពីទទួលបានព័ត៌មាន ខាងលើ លោកបានដាក់កម្លាំងចេញស្ទាក់ចាប់ទាំងយប់ ប៉ុន្តែដោយសារភូមិសាស្ត្រឆ្ងាយពេក ជាប់ព្រុំប្រទល់ឃុំឆ្នុកទ្រូ ទំរាំសមត្ថកិច្ចទៅដល់ ជនល្មើសបានរត់គេចខ្លួនបាត់អស់ ។
លោកនាយខណ្ឌរដ្ឋបាលជលផលខេត្តបានរំឮកផងដែរថា កាលពីឆ្នាំកន្លងទៅ នៅចំណុចកោះអាចម៍នេះ ក៏មានការលួចចូលកាប់គាស់យកដើមរាំងដូចគ្នានេះដែរ តែត្រូវបែកការណ៍ ហើយក្រុមជនល្មើសបានគេចខ្លួនបាត់អស់ សល់តែដើមរាំងដែលគាស់រួចមួយដើម ប៉ុន្តែមកដល់ពេលនេះដើមរាំងនោះបានងាប់ទៅហើយ គួរសោកស្តាយ ។
ពាក់ព័ន្ឋនឹងករណីដើមរាំងមួយដើមដែលត្រូវក្រុមជនល្មើសលួចគាស់បំណងដឹកចេញមិនសម្រេចខាងលើនេះដែរ លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តកំពង់ឆ្នាំង បានឱ្យដឹងថា ចំពោះដើមរាំងមួយដើមខាងលើនេះ លោកមិនទុកឱ្យងាប់ដូចឆ្នាំមុននោះទេ លោកនឹងសុំអាជ្ញាធរខេត្តដឹកយកដើមរាំងនោះទៅដាំលំអរក្នុងសួនច្បារក្នុងក្រុងកំពង់ឆ្នាំង តែមិនទាន់ច្បាស់ថា សួនណាទេ អាចដាក់ក្នុងសួន វិមានឯករាជ្យ ឬដាក់ក្នុងសួនសម្តេចចៅហ្វាវាំងគង់ សំអុល ៕
ចែករំលែកព័តមាននេះ