ខេត្តកំពង់ស្ពឺ ៖ អ្នកទោសប្រមាណជិត៣០នាក់បាននាំគ្នាប៉ុនប៉ងរត់គេចចេញពីគុក ខណៈអនុរក្សពន្ធនាគារចូលទៅមើលអ្នកទោសម្នាក់ដែលឈឺ ដើម្បីយកទៅមន្ទីរពេទ្យ ។ ទោះជាបែបណា ការប៉ងរត់ចេញពីគុកនេះមិនបានសម្រេចនោះទេ ដោយសារក្រុមអគ្គានុរក្ស និងនគរបាលព្រមទាំងកងរាជអាវុធហត្ថចេញអន្តរាគមន៍បង្ក្រាបនិងចាប់ខ្លួនបញ្ជូនទៅក្នុងបន្ទប់ឃុំឃាំងវិញ បានទាន់ពេលវេលា ។
បើតាមមន្ត្រីកងរាជអាវុធហត្ថបានឱ្យដឹងថា នៅវេលាព្រលប់ថ្ងៃទី១៩ មេសា ២០២០ អ្នកទោសចំនួន២៦នាក់ បានព្រួតគ្នាវាយក្រុមអគ្គារនុរក្ស ដើម្បីរត់ចេញពីគុក ។ ប្រភពបានឱ្យដឹងថា មុនពេលកើតហេតុ មានអ្នកទោសម្នាក់ឈឺ ត្រូវបញ្ជូនទៅសង្គ្រោះនៅមន្ទីរពេទ្យខេត្ត ស្របពេលដែលមន្ត្រីចូលទៅមើលអ្នកជំងឺ ទើបក្រុមពិរុទ្ធជន និងទណ្ឌិតចំនួន២៦នាក់បានសំរុកចេញពីក្នុងបន្ទប់ឃុំឃាំង ។
ប្រភពបន្តថា ដោយឃើញស្ថានភាពមិនស្រួល មន្ត្រីអគ្គានុរក្សបានបិទទ្វារ ហើយប្រកាសអាសន្នដោយស្នើសុំឱ្យមានកិច្ចអន្តរាមន៍ពីកម្លាំងនគរបាល ក៏ដូចកងរាជអាវុធហត្ថខេត្តផងដែរ ។ តែទោះជាបែបនេះក្តី អ្នកទោសទាំងអស់ ត្រូវបានសមត្ថកិច្ចឆ្មាំគុក កងរាជអាវុធហត្ថ និងនគរបាល ធ្វើការការពារនិងបង្ក្រាបបានទាន់ពេលវេលា ដោយគ្មានអ្នកទោសណាម្នាក់រត់រួចឡើយ ។
ពេលនេះ អ្នកទោសទាំងអស់ ត្រូវបានប្រមូលចូលបន្ទប់ឃុំឃាំងទាំង២៦នាក់វិញទាំងអស់ ដោយគ្មានអ្នកទោសណាម្នាក់រត់គេចចេញពីបរិវេណពន្ធនាគារបានឡើយ ។ លោក ទីន សុវណ្ណនី ប្រធានពន្ធនាគារខេត្តកំពង់ស្ពឺបានប្រាប់ឲ្យដឹងថា ករណីអ្នកទោសជិត៣០នាក់ ហែកគុកបម្រុងរត់គេចខ្លួននេះ គឺដោយសារមានអ្នកទោសម្នាក់ត្រូវមន្ត្រីយាមនៅក្នុងពន្ធនាគារដាក់ឱ្យនៅដោយឡែកពីគេ ព្រោះជាអ្នកទោសទើបនឹងចូលថ្មី ដើម្បីការពារខ្លាចឆ្លងជំងឺកូវីដ១៩ ។
អ្នកទោសរូបនោះបានធ្វើពុតជាឈឺ ហើយស្រែកឱ្យមន្ត្រីអគ្គានុរក្សជួយ ។ ស្របពេលនោះដែរ មន្ត្រីរបស់លោកចំនួន៤នាក់បានចូលទៅជួយដែលស្ថិតនៅក្នុងរបងសុវត្ថិភាព ។ ពេលមន្ត្រីរបស់លោកចូលទៅជួយអ្នកទោសជាច្រើននាក់ បានស្ទុះមកវាយមន្ត្រីទាំងនោះ ហើយអ្នកទោសជាច្រើននាក់បានព្យាយាមរត់ចេញតែត្រូវទប់ស្កាត់ទាន់ពេលវេលា ។
លោកប្រធានបន្តថា អ្នកទោសដែលជាប់គុកថ្មីនេះ គឺត្រូវបានដាក់ដោយឡែកពីគេ អ្នកទោសរូបនេះធ្វើពុតជាឈឺចុកស្រែកឲ្យជួយ ។ ដោយសារគេមានបំណងនឹងផែនការចង់រត់ចេញពីគុក ស្របពេលដែលមន្ត្រីចូលទៅជួយគាត់ ស្រាប់តែអ្នកទោសផ្សេងទៀតស្ទុះមកព្រួត វាយធ្វើឲ្យរបួសហើយអ្នកទោសទាំងនោះបានព្យាយាមរត់ចេញ តែមិនបានសម្រេចដូចបំណង ។
លោក វ៉ី សំណាង អភិបាលខេត្តកំពង់ស្ពឺជាអ្នកដឹកនាំប្រតិបត្តិការបង្ក្រាបក្រុមអ្នកទោសចង់រត់ចេញពីគុកនេះបានប្រាប់ថា អ្នកទោសដែលរត់បានដល់ក្រៅបន្ទប់ ក៏ត្រូវបានចាប់មកវិញទាំងអស់ មិនដូចពាក្យចចាមអារ៉ាមថាមានអ្នកទោសរត់រួចរាប់រយនាក់នោះទេ ។ លោកអភិបាលខេត្តថា ករណីនេះ សមត្ថកិច្ចប្រើប្រាស់កម្លាំងនគរបាល និងកងរាជអាវុធហត្ថប៉ុណ្ណោះ តែបើសិនជានៅតែមិនអាចធានាបានលោកនឹងស្នើសុំកម្លាំងយោធាបន្ថែមទៀត ដើម្បីគ្រប់គ្រងសភាពការណ៍ ៕
ចែករំលែកព័តមាននេះ