ខេត្តប៉ៃលិន ៖ កម្លាំងនគរបាលក្រុងប៉ៃលិនឆ្មក់ចុះឆែកឆេរក្នុងផ្ទះមួយកន្លែង និងឃាត់ខ្លួនជនសង្ស័យប្រុសស្រីចំនួន៩នាក់ ក្រោយមកក៏បានដោះលែងមនុស្សចំនួន៤នាក់វិញ ដោយសារពិនិត្យរកមិនឃើញមានសារធាតុញៀន និងធ្វើការផាកពិន័យរួច ក៏ឱ្យត្រឡប់ទៅផ្ទះវិញ ។
ប្រតិបត្តិការខាងលើនេះបានធ្វើឡើងកាលពីវេលាម៉ៅង១០ព្រឹកថ្ងៃទី២០ ខែមេសា ឆ្នាំ២០២០ នៅចំណុចផ្ទះមួយកន្លេង ស្ថិតក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន ។
តាមប្រភពព័ត៌មានបានឱ្យដឹងថា កម្លាំងនគរបាលក្រុងប៉ៃលិនបានធ្វើការឆែកឆេរផ្ទះមួយកន្លែង បន្ទាប់ពីធ្វើការតាមដានអស់រយៈពេលជាយូរហើយ ជាលទ្ធផលបានឆែកឆេររកឃើញថ្នាំញៀនប្រភេទម្សៅក្រាមពណ៌សថ្លា សង្ស័យជាម៉ាទឹកកកចំនួន៥កញ្ចប់តូច និងនាំខ្លួនជនសង្ស័យចំនួន៩នាក់ ក្នុងនោះមានស្ត្រីម្នាក់ទៅកាន់អធិការដ្ឋាននគរបាលក្រុងប៉ៃលិន ដើម្បីធ្វើការសាកសួរបន្ថែម ។
តាមប្រភពព័ត៌មានបានបន្តថា ក្រោយពីធ្វើការសាកសួរ និងធ្វើតេស្តរកសារធាតុញៀនរួច បានរកឃើញអ្នកផ្ទុកសារធាតុញៀនក្នុងខ្លួនមានចំនួន៥នាក់ រួមមាន ១-ឈ្មោះ ប៊ូ ហ៊ាន ភេទប្រុស អាយុ៥៤ឆ្នាំ មុខរបរកសិករ ជាម្ចាស់ផ្ទះ រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន) ២- ឈ្មោះ ចាន់ ធឿន ភេទប្រុស អាយុ២២ឆ្នាំ មុខរបរកម្មករ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន និងឆែកឃើញមានថ្នាំញៀននៅលើដងខ្លួន ) ។
៣-ឈ្មោះ វ៉ាន់ រតនា ភេទប្រុស អាយុ២០ឆ្នាំ មុខរបរកសិករ រស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន (មានផ្ទុកសារធាតុញៀន) ៤-ឈ្មោះ ស្រ៊ន ម៉េងស្រៀង ភេទប្រុស អាយុ១៩ឆ្នាំ មុខរបរកសិករ រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន) និង៥-ឈ្មោះ ញ៉ឹក ផល្លី ភេទប្រុស អាយុ២២ឆ្នាំ មុខរបរជាងមាស រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន) ។
ជនសង្ស័យទាំង៥នាក់ខាងលើនេះត្រូវបានឃាត់ខ្លួននៅអធិការដ្ឋាននគរបាលក្រុងប៉ៃលិន តាមបទបញ្ជារបស់លោក ជា សារ ព្រះរាជអាជ្ញារងអមលាសាដំបូងខេត្តប៉ៃលិន ដើម្បីបន្តនីតិវិធី និងពិនិត្យឃើញអ្នកដែលមិនមានផ្ទុកសារធាតុញៀនក្នុងខ្លួនចំនួន៤នាក់ ។ ចំពោះអ្នកដែលមិនមានផ្ទុកសារធាតុញៀនទាំង៤នាក់ (ស្រី១នាក់) បន្ទាប់ពីពិន័យជាប្រាក់១ចំនួនរួច ក៏ត្រូវបានអនុញ្ញាតឱ្យត្រឡប់ទៅផ្ទះវិញ ។
បច្ចុប្បន្ន ករណីខាងលើនេះ គឺនគរបាលកំពុងធ្វើការសាកសួរជនសង្ស័យ និងកំពុងបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ