ពិនិត្យទល់យប់ ក្នុងចំណោមកម្មករ១,០១៨នាក់ ដែលដាក់នៅ១៤ថ្ងៃ មាន១៨នាក់ ត្រូវយកសំណាកទៅពិសោធន៍បន្ត
រាជធានីភ្នំពេញ ៖ លោក ហេង សួរ អ្នកនាំពាក្យក្រសួងការងារបានឲ្យដឹងថា នៅថ្ងៃទី២០ មេសានេះ ក្រសួងការងារ និងបណ្តុះបណ្តាលវិជ្ជាជីវៈ…
រាជធានីភ្នំពេញ ៖ លោក ហេង សួរ អ្នកនាំពាក្យក្រសួងការងារបានឲ្យដឹងថា នៅថ្ងៃទី២០ មេសានេះ ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយ រដ្ឋបាលរាជធានីភ្នំពេញ ក្រុមគ្រូពេទ្យស្ម័គ្រចិត្តសម្តេចតេជោ ក្រសួងសុខាភិបាល ក៏ដូចជាមន្ទីរសុខាភិបាលរាជធានីភ្នំពេញ បានដាក់ដំណើរការមណ្ឌលត្រួតពិនិត្យសុខភាពចំនួន១០មណ្ឌល ដើម្បីពិនិត្យសុខភាព កម្មកររោងចក្រដែលបានឈប់ពេលចូលឆ្នាំ និងទើបវិលត្រឡប់ចូលធ្វើការវិញ ។
លោកបញ្ជាក់ថា ម៉ោង ៧និង៤០នាទីយប់យើងបានបញ្ចប់ការងារថ្ងៃទី១របស់យើង ទម្រាំរៀបសម្ភារបរិក្ខាចប់ ប្រហែលជាម៉ោងជិត៩យប់ ប៉ុន្តែថ្ងៃទី២០ មេសានេះយើងរួមសហការគ្នាត្រួតពិនិត្យសុខភាព ជូនបងប្អូនកម្មកររោងចក្របានចំនួន ១,០១៨នាក់ ក្នុងនោះ ៖
-យកសំណាកទៅពិសោធន៍បន្ត ចំនួន១៨នាក់ ដោយដាក់ឲ្យស្នាក់នៅមណ្ឌលចត្តាឡីស័កកម្រឹត២ វិទ្យាល័យជម្ពូវន្ត ទាំង២១នាក់ ។ (សូមបញ្ជាក់អ្នកទាំង ២១នាក់នេះ មិនមែនជាអ្នកមានវិជ្ជមានកូវីដ-១៩ទេ) ។
-ដាក់ឲ្យស្នាក់នៅមណ្ឌចត្តាឡីស័កកម្រិត១ (វិទ្យាល័យជម្ពូវន្ត) ចំនួន៣៨នាក់ ។
-ដាក់ឲ្យធ្វើចត្តាឡីស័កនៅផ្ទះ១៤ថ្ងៃ ចំនួន៩៥៩នាក់ ។
គួរជម្រាបផងដែរ កាលពីរសៀលថ្ងៃនេះ ក្នុងចំណោម កម្មករកម្មការិនី ធ្វើការនៅភ្នំពេញ ប្រមាណ៣០០នាក់ ដែលបានមកពិនិត្យសុខភាពនោះ មន្ត្រីចត្តាឡីស័កបានរកឃើញ កម្មករចំនួន២នាក់ ដែលមានអាការខ្លះៗនៃរោគសញ្ញារបស់ជំងឺកូវីដ១៩ ហើយពួកគេត្រូវបានយកសំណាកទៅត្រួតពិនិត្យបន្ត ផងដែរ នេះបើតាមលោក ហេង សួរ ថ្លែងទៅកាន់ក្រុមអ្នកសារព័ត៌មាន នៅតំបន់សេដ្ឋកិច្ចពិសេសភ្នំពេញ ។
សូមបញ្ជាក់ថា ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំឲ្យមានមណ្ឌលចត្តាឡីស័កចំនួន ១០កន្លែង នៅតាមតំបន់ដែលមានរោងចក្រច្រើន នៅរាជធានីភ្នំពេញ សម្រាប់ដាក់កម្មករនិយោជិតឲ្យនៅដាច់ដោយឡែកចំនួន ១៤ថ្ងៃ ក្រោយគេត្រលប់ពីស្រុកកំណើត និងឈប់សម្រាកក្នុងឱកាសបុណ្យចូលឆ្នាំថ្មីកន្លងទៅ ៕
ចែករំលែកព័តមាននេះ