ទីក្រុងម៉ូស្គូ ៖ មន្ត្រីក្រសួងការពារជាតិរុស្ស៊ី បាននិយាយកាលពីថ្ងៃចន្ទនេះថា យន្តហោះចម្បាំងរុស្ស៊ីមួយគ្រឿង បានបើកតាម និងបណ្ដេញយន្តហោះឈ្លបយកការណ៍អាមេរិកមួយគ្រឿង ចេញពីទីតាំងយោធាខ្លួន នៅស៊ីរី កាលពីថ្ងៃអាទិត្យទី១៩…
ទីក្រុងម៉ូស្គូ ៖ មន្ត្រីក្រសួងការពារជាតិរុស្ស៊ី បាននិយាយកាលពីថ្ងៃចន្ទនេះថា យន្តហោះចម្បាំងរុស្ស៊ីមួយគ្រឿង បានបើកតាម និងបណ្ដេញយន្តហោះឈ្លបយកការណ៍អាមេរិកមួយគ្រឿង ចេញពីទីតាំងយោធាខ្លួន នៅស៊ីរី កាលពីថ្ងៃអាទិត្យទី១៩ ខែមេសា ។
មន្ត្រីក្រសួងបាននិយាយបន្តថា ប្រព័ន្ធរ៉ាដារបស់រុស្ស៊ី ចាប់បានវត្ថុម្យ៉ាង កំពុងហោះហើរនៅលើដែនទឹកសមុទ្រមេឌីទែរ៉ាណេ ដែលឆ្ពោះទៅកាន់មូលដ្ឋានយោធារបស់ប្រទេសរុស្ស៊ី ។ ភ្លាមៗ យន្តហោះចម្បាំងរបស់រុស្ស៊ីមួយគ្រឿង បានហោះចេញពីមូលដ្ឋានអាកាស Hmeimim និងកំណត់បានគោលដៅជាក់ថា យន្តហោះស៊ើបការណ៍របស់សហរដ្ឋអាមេរិក ហើយចាប់ផ្តើមធ្វើការហោះតាមយន្តហោះនោះ ។
បន្ទាប់មក យន្តហោះស៊ើបការណ៍របស់សហរដ្ឋអាមេរិក បានផ្លាស់ប្តូរទិសដៅ ហើយហោះទៅឆ្ងាយ ទើបយន្តហោះចម្បាំងរបស់រុស្ស៊ី បានវិលត្រឡប់មកមូលដ្ឋានវិញ ។
កាលពីថ្ងៃអាទិត្យ កងទ័ពជើងទឹកសហរដ្ឋអាមេរិក បានចេញសេចក្តីថ្លែងការណ៍មួយ ដោយត្អូញត្អែរថា យន្តហោះចម្បាំង Su-35 របស់រុស្ស៊ី បានស្ទាក់ចាប់យន្តហោះស៊ើបការណ៍អាមេរិក P-8A លើសមុទ្រមេឌីទែរ៉ាណេ ក្នុងលក្ខណៈ«បង្កគ្រោះថ្នាក់ និងបង្កហេតុ» ទោះបីជាក្រសួងការពារជាតិរុស្ស៊ីបាននិយាយថា កងកម្លាំងទ័ពអាកាសរបស់ខ្លួនតែងតែធ្វើស្របតាមច្បាប់អន្តរជាតិ ៕
ចែករំលែកព័តមាននេះ