ខេត្តកំពង់ឆ្នាំង ៖ នៅតាមបណ្ដោយផ្លូវជាតិលេខ៥ ត្រង់ចំណុចភូមិអូរសណ្ដាន់ ឃុំទឹកហូត ស្រុករលាប្អៀរ ជារៀងរាល់ថ្ងៃ គេតែងតែឃើញមានការដាក់តាំងលក់សត្វព្រៃមួយកន្លែង ដែលមានប្រមាណពី ២០…
ខេត្តកំពង់ឆ្នាំង ៖ នៅតាមបណ្ដោយផ្លូវជាតិលេខ៥ ត្រង់ចំណុចភូមិអូរសណ្ដាន់ ឃុំទឹកហូត ស្រុករលាប្អៀរ ជារៀងរាល់ថ្ងៃ គេតែងតែឃើញមានការដាក់តាំងលក់សត្វព្រៃមួយកន្លែង ដែលមានប្រមាណពី ២០ ទៅ ៣០ តូប ដោយពុំខ្លាចញញើតនឹងច្បាប់ទម្លាប់អ្វីសោះឡើយ។
ប៉ុន្តែយ៉ាងនេះក្តី មន្ទីរជំនាញបានសារភាពថា ការបង្ក្រាបប្រៀបដូចជាវែកចកក្នុងទឹកយ៉ាងនោះដែរ គឺបង្ក្រាបថ្ងៃហ្នឹង ថ្ងៃស្អែកដាក់លក់ទៀត ។ ទីតាំងលក់សត្វព្រៃនៅចំណុចភូមិអូរសណ្ដាន់ ឃុំទឹកហូត ស្រុករលាប្អៀរ នេះដែរ កាលពីដើមឡើយ គឺកាលពីប្រមាណជា៤ឆ្នាំមុន មានការតាំងលក់តែបន្តិចបន្តួចប៉ុណ្ណោះ។ ប៉ុន្តែបច្ចុប្បន្ននេះ មានការដាក់តាំងលក់យ៉ាងច្រើន ដោយសារតែការប្រកបមុខរបររកស៊ីបែបនេះ ប្រហែលកាកកបហើយមើលទៅ។
សត្វព្រៃទាំងនោះ មានរស់ មានងាប់ស្រាប់ ដូចជាសត្វខ្លាត្រី សត្វទន្សាយ សត្វស្លាបជាច្រើនប្រភេទដូចជា កុក ក្រួចមាន់ទឹក និងសត្វប្រវឹកជាដើម ក្រៅពីនោះនៅមានសត្វជៀស សត្វពស់ និងសត្វព្រៃដទៃទៀត ។
អ្នកលក់សត្វព្រៃម្នាក់ដែលមិនអនុញ្ញាតិឱ្យថតរូប បានប្រាប់ពីតម្លៃសត្វទាំងនោះថា សត្វទន្សាយ១ក្បាល ១១ម៉ឺនរៀល, សត្វខ្លាត្រី១ក្បាល ថ្លៃ៨ម៉ឺនរៀល ឬក្រោមនេះបន្តិចតាមសត្វតូច ឬធំ, សត្វប្រវឹក១ក្បាល ថ្លៃ៤ម៉ឺនរៀល, សត្វជាស១ក្បាលថ្លៃ៤ពាន់រៀល សត្វលលក១ក្បាល៤ពាន់រៀល សត្វក្រួច១ក្បាល៣ពាន់រៀល ។
អ្នកលក់រូបនោះបានបញ្ជាក់ថា ទម្រាំបានសត្វមកលក់ ពួកគាត់មានគ្នា៦-៧នាក់ ត្រូវទៅដេកព្រៃ១យប់ ទើបចាប់បាន និងយកមកលក់ចែកលុយគ្នាបន្តិចបន្តួចម្នាក់គ្រាន់រស់ ។ ចំណែកការដាក់លក់នេះដែរ ក៏ខ្លាចគេចាប់ដែរ ប៉ុន្តែធ្វើម៉េច បើអត់មុខរបរទៅហើយ ។
ចំពោះសំណួរសួរថា ៖ ចុះសត្វខ្លាត្រី ធ្លាប់ឮល្បីថា ជាសត្វឆ្មានោះមែនឬអត់?
អ្នកលក់ប្រាប់ថា ៖ គឺជាខ្លាត្រីមែនស្បថដល់ណាក៏ហ៊ានដែរ។
ជុំវិញបញ្ហានេះ លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង ក៏បានបញ្ជាក់ថា ធ្លាប់មានការបង្ក្រាបពី ២-៣ ដង រួចមកហើយ នៅទីតាំងលក់សាច់សត្វព្រៃនេះ ។ ប៉ុន្តែការបង្ក្រាបទៅនោះ ដូចវែកចក ចឹង ! បង្ក្រាបថ្ងៃហ្នឹង ថ្ងៃស្អែក គឺមានការដាក់តាំងលក់ទៀតដដែល គ្រាន់តែអន់បន្តិច ហើយយ៉ាងច្រើន ២-៣ថ្ងៃ គឺមានការដាក់លក់ពេញដូចដើមវិញដដែល ។ ការចាប់សត្វព្រៃមកលក់បែបនោះ គឺពិតជាខុសច្បាប់ហើយ ។
លោកប្រធានមន្ទីរកសិកម្ម បានអះអាងថា ចំពោះខ្លាត្រី គឺមិនមែនខ្លាត្រីពិតប្រាកដនោះទេ គឺជាសត្វឆ្មា ដែលគេយកមកកោសរោល ហើយបន្លំអតិថិជនថា ជាខ្លាត្រីតែប៉ុណ្ណោះ ។
សូមបញ្ជាក់ដែរថា ការតាំងលក់សត្វព្រៃទាំងនោះ កាលពីផ្លូវជាតិលេខ៥ មិនទាន់រៀបចំជួសជុលគេឃើញ តូបលក់ដូរសត្វព្រៃហាក់នៅលាក់លៀមនៅឡើយទេ ប៉ុន្តែក្រោយពីផ្លូវជាតិលេខ ៥ កំពុងឈូសឆាយអស់ទៅ គេឃើញតូបលក់សាច់សត្វព្រៃទាំងនោះលេចចេញកណ្ដាលវាលតែម្ដង ដូចមានក្នុងរូបភាពដែលយើងបានឃើញនេះស្រាប់៕ (កែសម្រួលដោយ ៖ បុប្ផា)
ចែករំលែកព័តមាននេះ