តារាសម្តែងលោក ហេង នរះកក្កដា បានចេញមុខធ្វើការបដិសេធចោលទាំងស្រុងនូវពាក្យចចាមអារ៉ាមដែលបានអះអាងថា លោកកំពុងជំងឺកូវីដ១៩ ខណៈពេលកំពុងស្នាក់នៅប្រទេសអូស្ត្រាលី។ តារារូបនេះ ត្រូវមហាជនមួយចំនួនធ្វើការសន្និដ្ឋានថា លោកបានផ្ទុកជំងឺកូវីដ១៩ ហើយមិនអាចវិលមកកម្ពុជាវិញបាន ក្នុងពេលប្រទេសអូស្ត្រាលី កំពុងតែរីករាលដាលយ៉ាងខ្លាំងនូវជំងឺដ៏កាចសាហាវមួយនេះ។
យ៉ាងណាម៉ិញ លោក ហេង នរះកក្កដា បានចេញមុខបដិសេធភ្លាមៗ ដោយបានអះអាងថា ការលើកឡើងខាងលើនេះ គឺជាពាក្យចចាមអារ៉ាម ខណៈពេលដែលមានសុខភាពល្អជាធម្មតា។
បើតាមរយៈវីដេអូឃ្លីបដែលបានបង្ហោះតាមបណ្តាញសង្គមហ្វេសប៊ុកកាលពីពេលថ្មី ហេង នរះកក្កដា បានអះអាងថា លោកសុំធ្វើការបដិសេធចោលទាំងស្រុងនូវពាក្យចចាមអារ៉ាមដែលបានចោទលោកថា កំពុងផ្ទុកនូវជំងឺកូវីដ១៩។
លោកបញ្ជាក់ថា រហូតមកទល់ពេលនេះ លោកមានសុខភាពល្អធម្មតា មិនបានកើតជំងឺកូវីដ១៩ ដូចការចោទប្រកាន់នោះឡើយ បើទោះបីជាលោកបានស្នាក់នៅប្រទេសអូស្ត្រាលីជាង២ខែមកនេះក៏ដោយ។ លោកថា បច្ចុប្បន្នប្រទេសអូស្ត្រាលីមានការរីករាលដាលយ៉ាងខ្លាំងនូវជំងឺមួយនេះ ដូច្នេះរដ្ឋាភិបាលគេបានបិទជេ់ងហោះហើរទាំងអស់ ហេតុនេះហើយទើបលោកមិនអាចវិលមកកម្ពុជាបានឡើយ។ មូលហេតុនេះ ទើបបានជាលោកមិនអាចវិលទៅវិញបាន ដោយមិនស្ថិតនៅលើហេតុផលលោកកើតជំងឺមួយនេះនោះឡើយ។
ទោះជាយ៉ាងណា លោក ហេង នរះកក្កដា បានស្នើសុំដល់ទស្សនិក ជាពិសេសអ្នកដែលបានយល់ច្រឡំចំពោះលោកលើបញ្ហាខាងលើនះ សូមកុំមានការភាន់ច្រឡំបន្តទៀត។ ហើយលោកក៏ថ្លែងអំណរគុណផងដែរ ចំពោះទស្សនិកជន បងប្អូន មិត្តភក្តិទាំងអស់ដែលតែងតែយកចិត្តទុកសុខទុក្ខរបស់លោកជារៀងរហូតមក ហើយលោកនឹងវិលមកកាន់ប្រទេសកម្ពុជាវិញ នៅពេលដែលជើងហោះហើរត្រូវបានបើកឡើងវិញ។
គួរបញ្ជាក់ថា តារាសម្តែងលោក ហេង នរះកក្កដា, កញ្ញា អ៊ឹងនិមល និងលោក អេន ឌី កំពុងជាប់គាំងក្នុងប្រទេសអូស្ត្រាលី មិនអាចវិលមកកម្ពុជាវិញបាន ដោយសារការរីករាលដាលនៃជំងឺកូវីដ១៩ ក្នុងពេលដែលពួកគេបានចេញទៅសម្តែងនៅទីនោះមុនពេលជំងឺនេះមិនទាន់មានការរីករាលដាលខ្លាំង៕ (កែសម្រួលដោយ ៖ បុប្ផា)
ចែករំលែកព័តមាននេះ