ខេត្តកណ្តាល ៖ ដោយសារឈាមស្រែកស្បែកហៅ កម្លាំងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកណ្តាល បានសហការជាមួយអធិការដ្ឋានស្រុកកណ្តាលស្ទឹង ធ្វើការស្រាវជ្រាវអស់រយៈពេលជិត១សប្តាហ៍ ទីបំផុត បានឃាត់ខ្លួនឃាតករដៃដល់ដែលវៃសម្លាប់សង្សារបានហើយ ។ ហេតុការណ៍ឃាត់ខ្លួននេះ ធ្វើឡើងនៅថ្ងៃទី១៧ មេសា ឆ្នាំ២០២០ វេលាម៉ោង១៦និង២០នាទី នៅភូមិក្រូចសើច ឃុំដើមឫស ស្រុកកណ្ដាលស្ទឹង ខេត្តកណ្តាល ។
ជនសង្ស័យឆ្លើយសារភាពថា ពួកគេបានឈ្លោះប្រកែកគ្នាពីរឿងឱ្យជូនទៅផ្ទះ តែជនដៃដល់មិនព្រមជូនទៅ ទើបនារីរងគ្រោះ បានទះកំផ្លៀងជនសង្ស័យ៣ដៃចំកណ្តាលមុខ និងជេរបញ្ចោរថែមទៀត ទើបធ្វើឱ្យជនដៃដល់ខឹងនិងចង់ដោះដៃផង បានលេសក៏យកឈេីជ្រុងដែលនៅក្បែរកន្លែងកើតហេតុ មកវាយជនរងគ្រោះចំកញ្ចឹងកពីក្រោយចំនួន២ដំបង បណ្តាលឲ្យស្លាប់ភ្លាម ។ ជនសង្ស័យបានយកដុំថ្ម១ដុំប៉ុនភ្លៅមនុស្សចាស់ ដាក់ចូលក្នុងអាវជនរងគ្រោះខាងក្រោយ រួចរុញទម្លាក់ចូលក្នុងទឹករណ្តៅដីខ្សាច់លិចបាត់ទៅ ។
គួរបញ្ជាក់ថា នារីរងគ្រោះឈ្មោះ ម៉ន ច័ន្ទថន អាយុ២៧ឆ្នាំ ជាកម្មការិនីរោងចក្រ មានទីលំនៅ ភូមិថ្លុកព្រាល ឃុំព្រះនិពាន្ដ ស្រុកគងពិសី ខេត្តកំពង់ស្ពឺ ។ ចំណែកជនដៃដល់ឈ្មោះ ឌឿន ឌី ភេទប្រុស អាយុ២៤ឆ្នាំ ជាកម្មកររោងចក្រ មានទីលំនៅភូមិក្រូចសើច ឃុំដើមឫស ស្រុកកណ្ដាលស្ទឹង ខេត្តកណ្តាល ។
ជនដៃដល់បានសារភាពថា កន្លងមក នៅថ្ងៃទី៩ ខែមេសា ឆ្នាំ២០២០ វេលាម៉ោង១៧ ខ្លួន និងឈ្មោះ យឿន គន្ធា ភេទស្រី រស់នៅភូមិឃុំជាមួយគ្នា(ត្រូវជាប្អូនជីដូនមួយ)បានជិះម៉ូតូ១គ្រឿងម៉ាកហុងដា សេ១២៥ពណ៌ខ្មៅ ពាក់ស្លាកលេខភ្នំពេញ 1HF-6858 ជាម៉ូតូរបស់ឈ្មោះយឿន គន្ធា ចេញពីផ្ទះទៅយកនារីរងគ្រោះនៅភូមិថ្លុកព្រាល ឃុំព្រះនិព្វាន្ដ ស្រុកគងពិសី ខេត្តកំពង់ស្ពឺ ដេីម្បីទៅហូបបង្អែមនៅផ្សារកំពង់កន្ទួត ។ ពេលមកដល់ផ្សារកំពង់កន្ទួត ពុំបានហូបបង្អែមទេ ដោយសារមេឃចង់ភ្លៀង ក៏នាំគ្នាជិះម៉ូតូទៅកន្លែងកើតហេតុ ហើយឈ្មោះ យឿន គន្ធា ត្រឡប់មកផ្ទះខ្លួនវិញបាត់ទៅ ដោយទុកគូសង្សារទាំង២នៅជាមួយគ្នា រហូតដល់វេលាម៉ោង១២និង៤០នាទីរំលងអធ្រាត្រ ឈានចូលថ្ងៃទី១០ មេសា ខែឆ្នាំដដែល ។
សមត្ថកិច្ចបានប្រាប់អោយដឹងដែរថា នៅថ្ងៃទី១៦ ខែមេសា ឆ្នាំ២០២០ មានប្រជាពលរដ្ឋបានរាយ
ការណ៍ថា ឃើញសពនារីម្នាក់អណ្ដែតទឹកក្នុងរណ្ដៅដី ភូមិក្រូចសើច ឃុំដើមឫស ស្រុកកណ្ដាលស្ទឹង ខេត្តកណ្ដាល។
ដោយមានការបញ្ជាផ្ទាល់ពីលោកឧត្តមសេនីយ៍ត្រី ឈឿន សុចិត្ត ស្នងការនគរបាលខេត្តកណ្ដាល និងមានការសម្របសម្រួលនីតិវិធី ដោយលោក ឯក ស៊ុនរស្មី ព្រះរាជអាជ្ញារងសាលាដំបូងខេត្តកណ្ដាលផែនការងារនគរបាលព្រហ្មទណ្ឌ ការិយាល័យកម្រិតធ្ងន់ និងការិយាល័យបច្ចេកទេសវិទ្យាសាស្ត្រ បានសហការជាមួយកម្លាំងនគរបាលស្រុកកណ្ដាលស្ទឹង ក្រោយពីបានប្រកាសរកអត្តសញ្ញាណជនរងគ្រោះ និងបានជួបជាមួយក្រុមគ្រួសារសាច់ញាតិជនរងគ្រោះរួចមក សមត្ថកិច្ចជំនាញបានឈានដល់ការកំណត់មុខសញ្ញា គឺឈ្មោះ ឌឿន ឌី ភេទប្រុស ត្រូវជាគូស្នេហ៍ជនរងគ្រោះ ដែលទើបតែស្គាល់គ្នាជិត២ខែ និងធ្លាប់បានរួមរ័កជាមួយគ្នាបាន២លើកផងដែរ ។
ចែករំលែកព័តមាននេះ