មុនពេលលោក ម៉ាក ឃ្យូបេន (Mark Cuban) ក្លាយជាមហាសេដ្ឋី លោកធ្លាប់ជាម្ចាស់អាជីវកម្មតូចមួយដែលធ្លាប់ឆ្លងកាត់ស្ថានការដែលស្តាប់តែប្រាក់ចំណូលត្រូវបានកាត់ផ្តាច់ទាំងស្រុង ដូចស្ថានការដែលអាជីវករជាច្រើនកំពុងជួបប្រទះព្រោះតែកូវីដ ១៩ ជាដើម ។ ប៉ុន្តែលោកបានឆ្លងកាត់ឧបសគ្គនេះដោយជោគជ័យ ព្រោះតែយុទ្ធសាស្ត្រខាងក្រោមដែលអាជីវករគួររៀនសូត្រតាម៖
១. ទទួលយកការពិតជាក់ស្តែង និងចេញសកម្មភាពភ្លាមៗ
មិនមាននរណាអាចទស្សន៍ទាយទុកមុនថាពិភពលោកនឹងជួបនូវវីរុសដ៏កាចសាហាវដែលត្រូវបានរាតត្បាតទូទាំងសកលបែបនេះទេ ។ ដូចគ្នាដែរ វាជារឿងធម្មតាក្នុងការជួបនូវអារម្មណ៍ខឹង និងភ័យខ្លាច ។ ប៉ុន្តែក្នុងនាមជាអាជីវករ អ្នកមិនអាចឈរស្ងៀមបានទេ អ្នកត្រូវតែចេញសកម្មភាពភ្លាមៗ ។
២. រក្សាតម្លាភាព
លោកមហាសេដ្ឋីខាងលើប្រាប់ដល់អាជីវករឲ្យរក្សាតម្លាភាពក្នុងការប្រាស្រ័យទាក់ទងជាមួយនឹងបុគ្គលិក និងមនុស្សដែលអ្នកជំពាក់ ។ ក្នុងកំឡុងពេលនេះ អ្នកត្រូវតែរក្សាទំនាក់ទំនងជាមួយបុគ្គលិកធនាគារ ម្ចាស់ផ្ទះ ឬដី និងបើកទូលាយពីស្ថានការដែលអ្នកកំពុងតែមាន ។
៣. រក្សាភាពស្មោះត្រង់
លោកបានបន្ថែមទៀតថា អ្នកមានការងារត្រូវធ្វើច្រើនណាស់ទើបអាចឆ្លងផុតស្ថានការនេះបានដូចេះ្នអ្នកមិនគួរកុហកពីស្ថានការរបស់អ្នកទេ ។ ការដឹកនាំអាជីវកម្មរបស់អ្នកឆ្លងកាត់កូវីដ ១៩ នេះតម្រូវឲ្យអ្នកបើកទូលាយពីបញ្ហាដែលអ្នកកំពុងតែជួបប្រទះ ។
៤. ផ្តោតសំខាន់លើទំនាក់ទំនង
ជាក់ស្តែង អតិថិជនជាច្រើនរបស់អ្នកប្រហែលជាមិនមានចំណាប់អារម្មណ៍ក្នុងការចំណាយថវិការបស់ពួកគេទេក្នុងកំឡុងពេលនេះ ដូច្នេះវាមិនមែនជាពេលល្អក្នុងការផ្តោតសំខាន់លើការលក់ទេទោះជាប្រាក់ចំណូលមានសារៈសំខាន់ពិតមែនក្តី ។
ផ្ទុយមកវិញលោកឃ្យូបេនផ្តល់យោបល់ឲ្យអាជីវករយកចិត្តទុកដាក់លើការកសាងទំនាក់ទំនងដែលមានស្រាប់ទៅវិញមិនថាតាមការសួរសុខទុក្ខ ឬការជួយគ្នាទៅវិញទៅមកទេ ។
៥. សិក្សាបន្ថែមពីកម្ចី
អ្នកអាចសួរយោបល់អ្នកជំនាញផ្នែកនេះ ឬព្យាយាមអប់រំខ្លួនបន្ថែមពីកម្ចីសម្រាប់អាជីវកម្មធន់តូច ។ អ្នកមិនគួរពឹងផ្អែកលើធនាគារទាំងស្រុងទេ ។ ព្រោះតែរដ្ឋាភិបាលនៅតាមដានស្ថានការ អ្នកគួរតែយល់ដឹងនូវរាល់វិធានការរដ្ឋាភិបាលដែលបានអនុម័តលើអាជីវកម្ម ៕
ចែករំលែកព័តមាននេះ