ខេត្តបាត់ដំបង ៖ បុរសម្នាក់បានបាត់បង់ជីវិតភ្លាមៗ ដោយសារតែក្រមាដែលគាត់បង់នៅ.ក បានទាក់រឹតជាប់ទៅនឹងម៉ាស៊ីនរែងគ្រាប់ស្រូវ ដែលកំពុងដំណើរការ កាលពីវេលាថ្ងៃត្រង់ថ្ងៃទី១៩ មេសា នៅចំណុចភូមិច្រាបក្រសាំង សង្កាត់វត្តគរ ក្រុងបាត់ដំបង ។
សមត្ថកិច្ចបានឱ្យដឹងថា ជនរងគ្រោះខាងលើ ឈ្មោះ ប្រែង ហ៊ីង ភេទប្រុសអាយុ៦៦ឆ្នាំ រស់នៅភូមិ, សង្កាត់ កើតហេតុ ។ សមត្ថកិច្ចបាននិយាយថា ជនរងគ្រោះបានស្លាប់ភ្លាមៗ ដោយសារបោកផ្ទប់ទៅនឹងដែកកញ្ច្រែងម៉ាស៊ីន រែងគ្រាប់ស្រូវ ជាមួយនឹងក្រមាដែលគាត់បង់នៅក ។ នេះជារឿងស្មានមិនដល់ តែក៏ជាការធ្វេសប្រហែសមួយផងដែរ ពេលកំពុងធ្វើការងារជាមួយគ្រឿងយន្ត។
បើតាមក្រុមគ្រួសារជនរងគ្រោះបានប្រាប់សមត្ថកិច្ចថា មុនពេលកើតហេតុ គាត់បានប្រមូលស្រូវពូជ យកទៅរែងនឹងម៉ាស៊ីន ។ ពេលដែលម៉ាស៊ីនកំពុងដំណើរ គាត់បានយកស្រូវទៅចាក់ក្នុងធុងខាងលើ ស្របពេលនោះ ស្រាប់តែក្រមាដែលគាត់បង់ក ទាក់ជាប់នឹងដែកទាញកញ្ច្រែងរែង ធ្វើឱ្យឆក់ទាញក្បាលគាត់បោកផ្ទប់ទៅនឹងដែកកញ្ច្រែងនោះពេញទំហឹងតែម្ដង ។ ក្បាលគាត់បោកពេញទំហឹង ជាមួយនឹងក្រមារឹតកគាត់ជាប់យ៉ាងខ្លាំងផង ធ្វើឱ្យគាត់ដាច់ខ្យល់ស្លាប់ភ្លាមៗយ៉ាងអណោចអធម័បំផុត បើទោះជាអ្នកនៅក្បែរនោះព្យាយាមពន្លត់ម៉ាស៊ីនភ្លាមៗក៏មិនអាចជួយបានដែរ។
សមត្ថកិច្ចមូលដ្ឋាននិងមន្ត្រីជំនាញបានចុះភ្លាមៗទៅកាន់កន្លែងកើតហេតុ ដើម្បីពិនិត្យ។ ប៉ុន្តែយ៉ាងណា មន្ត្រីជំនាញបានអះអាងជាបឋមថា ជនរងគ្រោះបានបោកក្បាលផ្ទប់នឹងដែកយ៉ាងធ្ងន់ធ្ងរ ថែមទាំងមានក្រម៉ារឹតកជាប់យ៉ាងខ្លាំងផង ធ្វើឱ្យគាត់ដាច់ខ្យល់ស្លាប់ភ្លាមៗ។ ដូច្នេះបើយោងលើការពិនិត្យជាក់ស្ដែង និង មានការបំភ្លឺជាក់លាក់ពីក្រុមគ្រួសារផង ជនរងគ្រោះពិតជាបានស្លាប់ ដោយសារទាក់ក្រមាបង់កនឹងម៉ាស៊ីនរែងស្រូវមែន ។ ក្រោយធ្វើការពិនិត្យ មន្ត្រីជំនាញបានធ្វើកំណត់ហេតុ ប្រគល់សពជនរងគ្រោះឱ្យទៅសាច់ញាតិធ្វើបុណ្យតាមប្រពៃណីហើយ៕
ចែករំលែកព័តមាននេះ